ടൊവീനോയും റിമയും ഒന്നിച്ച്, ബഷീറിന്റെ കഥ ; ഹിറ്റാകുമോ ആഷിഖ് അബുവിന്റെ നീലവെളിച്ചം

വൈക്കം മുഹമ്മദ് ബഷീറിന്റെ നീലവെളിച്ചം എന്ന പ്രശസ്തമായ ചെറുകഥയെ അടിസ്ഥാനമാക്കിയാണ് ചിത്രമൊരുക്കിയത്. ഏപ്രില്‍ 20നാണ് നീലവെളിച്ചം തിയേറ്ററുകളിത്തുന്നത്. ചിത്രത്തിന്റെതായി പുറത്തിറങ്ങിയ ട്രെയിലറിനും ഗാനങ്ങള്‍ക്കും മികച്ച സ്വീകാര്യതയായിരുന്നു പ്രേക്ഷകരുടെ ഭാഗത്ത് നിന്നും ലഭിച്ചത്. 

കാസ്റ്റിങ്ങ് കൊണ്ട് തുടക്കം മുതല്‍ ശ്രദ്ധിക്കപ്പെട്ട ചിത്രമാണ് നീലവെളിച്ചം. റിമയും ടൊവീനോയും പ്രധാന കഥാപാത്രങ്ങളായി എത്തുന്ന ചിത്രത്തിന്റെ പോസ്റ്ററുകള്‍ സോഷ്യല്‍മീഡിയയില്‍ ഏറെ ശ്രദ്ധിക്കപ്പെട്ടിരുന്നു. ചിത്രത്തില്‍ ബഷീറായി ടൊവീനോ എത്തുമ്പോള്‍ ഭാര്‍ഗവിയായി റിമ എത്തുന്നു. റോഷന്‍ മാത്യു ശശികുമാര്‍ എന്ന കഥാപാത്രത്തെ അവതരിപ്പിക്കുന്നു.

ടൊവീനോ തോമസ്, റിമ കല്ലിങ്കല്‍ എന്നിവരെ കൂടാതെ ഷൈന്‍ ടോം ചാക്കോ, റോഷന്‍ മാത്യു, രാജേഷ് മാധവന്‍, പ്രമോദ് വെളിയനാട് തുടങ്ങിയവരാണ് ചിത്രത്തിലെ മറ്റു താരങ്ങള്‍. ഗിരീഷ് ഗംഗാധരനാണ് ചിത്രത്തിന്റെ മനോഹരമായ ദൃശ്യങ്ങള്‍ പകര്‍ത്തിയത്. വി സാജനാണ് എഡിറ്റര്‍. ഒപിഎം സിനിമാസിന്റെ ബാനറില്‍ റിമ കല്ലിങ്കലും ആഷിക്ക് അബുവും ചേര്‍ന്നാണ് ചിത്രം നിര്‍മ്മിച്ചത്.

ചിത്രത്തില്‍ എം.എസ് ബാബുരാജിന്റെ ഗാനങ്ങള്‍ അനുമതിയില്ലാതെയാണ് ഉപയോഗിച്ചത് എന്ന ആരോപണവുമായി ബാബുരാജിന്റെ കുടുംബം മുമ്പോട്ട് വന്നിരുന്നു. തുടര്‍ന്ന് സംവിധായകന്‍ ആഷിഖ് അബു, സംഗീത സംവിധായകന്‍ ബിജിപാല്‍ എന്നിവര്‍ക്കെതിരെ ബാബുരാജിന്റെ കുടുംബം വക്കീല്‍ നോട്ടീസും അയച്ചിരുന്നു. 

താമസമെന്തേ വരുവാന്‍, ഏകാന്തതയുടെ അപാരതീരം എന്നീ ഗാനങ്ങളാണ് സിനിമയില്‍ ഉപയോഗിച്ചിട്ടുള്ളത്. തുടര്‍ന്ന് ആരോപണങ്ങള്‍ക്ക് മറുപടിയുമായി ആഷിഖ് അബു രംഗത്ത് വന്നിരുന്നു. ഗാനങ്ങളുടെ പകര്‍പ്പവകാശം കൈവശമുള്ളവര്‍ക്ക് പ്രതിഫലം നല്‍കിയാണ് സിനിമയില്‍ ബാബുരാജിന്റെ ഗാനങ്ങള്‍ ഉപയോഗിച്ചത് എന്നായിരുന്നു ആഷിഖിന്റെ മറുപടി.