സ്വീകരണമുറിയിൽ നിന്നും വെള്ളിത്തിരയിലേക്ക് ; അവതാരകരായി കരിയര്‍ ആരംഭിച്ച സിനിമാതാരങ്ങള്‍

യുവതാരങ്ങളില്‍ ശ്രദ്ധേയനായ ആസിഫ് അലി സിനിമയലേക്ക് വരുന്നതിനുമുന്‍പ് യെസ് ഇന്ത്യാവിഷന്‍ എന്ന ചാനലിന്റെ പ്രോഗ്രാം പ്രൊഡ്യൂസറും അവതാരകനുമായിരുന്നു. പിന്നീടാണ് ശ്യാമപ്രസാദ് സംവിധാനം ചെയ്ത ഋതുവിലൂടെ മലയാള സിനിമയിലെത്തുന്നത്.  

മലയാളത്തിന്റെ പ്രിയതാരം പാര്‍വതി തിരുവോത്ത് സിനിമയിലെത്തും മുന്‍പ് കിരണ്‍ ടിവിയിലെ തമിഴ് ഹിറ്റ്‌സ് എന്ന പ്രോഗ്രാമിന്റെ അവതാരകയായിരുന്നു. തുടര്‍ന്ന് കിരണ്‍ ടിവിയില്‍ നിന്നും മാറി കൈരളി ചാനലില്‍ ജോയിന്‍ ചെയ്യുകയും ഹലോ ഗുഡ് ഈവനിംഗ് എന്ന പ്രോഗ്രാം അവതരിപ്പിക്കുകയും ചെയ്തു. തുടര്‍ന്നാണ് സിനിമയിലേക്കുള്ള കടന്നുവരവ്.  

പ്രേക്ഷരുടെ പ്രിയതാരം ശിവദ ആദ്യകാലത്ത് ആദ്യകാലത്ത് കൈരളി ടിവിയിലെ വീഡിയോ ജോക്കിയായിരുന്നു. തുടര്‍ന്നാണ് ലിവിംഗ് ടുഗെദര്‍ എന്ന ചിത്രത്തിലൂടെ മലയാള സിനിമയിലെത്തിയത്.  

ആദ്യ ചിത്രമായ അനുരാഗ കരിക്കിന്‍ വെള്ളത്തിലൂടെ പ്രേക്ഷക മനസ്സില്‍ ഇടം നേടിയ രജിഷ വിജയന്‍ സിനിമയിലെത്തുംമുന്‍പ് മലയാളത്തിലെ അറിയപ്പെടുന്ന അവതാരകയായിരുന്നു. സൂര്യ ടിവി, സൂര്യ മ്യൂസിക് തുടങ്ങിയ ചാനലുകളിലെ പ്രോഗ്രാമുകളിലൂടെ ശ്രദ്ധിക്കപ്പെട്ട രജിഷ മഴവില്‍ മനോരമയിലെയും അവതാരകയായിരുന്നു.  

മലയാളത്തിന്റെ പ്രിയതാരം നസ്രിയ നസീം സിനിമയിലെത്തും മുന്‍പ് കൈരളി, ഏഷ്യാനെറ്റ് എന്നീ ടെലിവിഷന്‍ ചാനലുകളില്‍ അവതാരകയായി ജോലി ചെയ്തിരുന്നു. ഇതിനിടയിലാണ് ബ്ലെസി സംവിധാനം ചെയ്ത പളുങ്കിലൂടെ മലയാള സിനിമയിലെത്തുന്നത്.  

ഗോഡ് ഫോര്‍ സെയില്‍, വെടിവഴിപാട് എന്നീ ചിത്രങ്ങളിലൂടെ പ്രേക്ഷകമനസ്സില്‍ ഇടം നേടിയ അനുമോള്‍ സിനിമയിലെത്തും മുന്‍പ് മലയാളത്തിലെ പ്രമുഖ ചാനലുകളില്‍ പ്രോഗ്രാം പ്രൊഡ്യൂസറായിരുന്നു. തുടര്‍ന്നാണ് കണ്ണുക്കുള്ളെ എന്ന തമിഴ് ചിത്രത്തിലൂടെ സിനിമയിലേക്കുള്ള കടന്നുവരവ്.