മറ്റൊരു റോബിന്‍ രാധാകൃഷ്ണനായി അഖില്‍ മാരാര്‍ മാറുമോ, സോഷ്യല്‍മീഡിയയില്‍ നിറഞ്ഞു നില്‍ക്കുന്ന അഖില്‍ ശരിക്കും ആരാണ്?

ന്യൂസ് ചാനലുകളിലെ പ്രൈം ടൈം ചര്‍ച്ചകളിലൂടെയാണ് അഖില്‍ ശ്രദ്ധിക്കപ്പെടുന്നത്. ലക്ഷദ്വീപ് അഡ്മിനിസ്‌ട്രേറ്ററായിരുന്ന പ്രഫുല്‍ പട്ടേലിന്റെ ഭരണ പരിഷ്‌കാരങ്ങളെ തുടര്‍ന്ന് ജനം ടിവിയില്‍ നടത്തിയ ചര്‍ച്ചയിലായിരുന്നു ആദ്യമായി അഖില്‍ ശ്രദ്ധിക്കപ്പെട്ടത്. ''പ്രഫുല്‍ ഖോഡ പട്ടേല്‍'' എന്നതിനു പകരം ''പ്രഫുല്‍ പോടാ പട്ടേല്‍'' എന്നാണ് അഖില്‍ പറഞ്ഞത് എന്ന തരത്തില്‍ അന്നത്തെ ചര്‍ച്ചയുടെ വീഡിയോ സോഷ്യല്‍മീഡിയയില്‍ വൈറലായിരുന്നു. തുടര്‍ന്നായിരുന്നു ചാനല്‍ ചര്‍ച്ചകളില്‍ അഖില്‍ സ്ഥിരം സാന്നിദ്ധ്യമായത്.

സ്‌ക്കൂള്‍-കോളേജ് വിദ്യാഭ്യാസത്തിനു ശേഷം മെഡിക്കല്‍ റെപ്പായി ഏറെക്കാലം ജോലി ചെയ്തിരുന്നു അഖില്‍. ഇതിനിടയില്‍ ജോലി മടുത്ത് ആല്‍ക്കെമിസ്റ്റ് എന്ന പേരില്‍ ഒരു ജ്യൂസ് കട തുടങ്ങുകയുണ്ടായി. ഇതിനിടയിലും പി.എസ്.സി പരീക്ഷകള്‍ക്കായി മുന്നൊരുക്കങ്ങള്‍ നടത്തുകയും പരീക്ഷകള്‍ എഴുതുകയും ചെയ്തിരുന്നു. ഏറെ നാളത്തെ കഷ്ടപാടുകള്‍ക്ക് ശേഷം പോലീസിലും വനം വകുപ്പിലും ജോലി ലഭിക്കുകയും ചെയ്തിരുന്നു. എന്നാല്‍ ഗവണ്‍മെന്റ് ജോലിയും പാതിവഴിയില്‍ ഉപേക്ഷിച്ച് കൃഷിയിലേക്കും എഴുത്തിലേക്കും അഖില്‍ ശ്രദ്ധ കേന്ദ്രീകരിച്ചു. തുടര്‍ന്നായിരുന്നു അസിസ്റ്റന്റ് സംവിധായാകനായി സിനിമയില്‍ ഒരു കൈ നോക്കിയത്. പിന്നാലെ പ്രശസത സംവിധായകന്‍ ഡോ.ബിജുവിന്റെ പേരറിയാത്തവന്‍ എന്ന ചിത്രത്തിലൂടെ അസിസ്റ്റന്റ് സംവിധായകനായി സിനിമാ കരിയറിന് തുടക്കം കുറിച്ചു.

2022ല്‍ പുറത്തിറങ്ങിയ ഒരു താത്വിക അവലോകനമാണ് അഖില്‍ മാരാര്‍ സംവിധാനം ചെയ്ത ആദ്യ ചിത്രം. ഹാസ്യത്തിന് പ്രധാന്യം നല്‍കി ഒരുക്കിയ ചിത്രത്തില്‍ ജോജു ജോര്‍ജ്, അജു വര്‍ഗീസ് എന്നിവരായിരുന്നു പ്രധാന താരങ്ങള്‍. എന്നാല്‍ തിയേറ്ററുകളില്‍ നിന്നും സമ്മിശ്ര പ്രതികരണമായിരുന്നു ചിത്രത്തിന് ലഭിച്ചത്.

സിനിമാ മേഖലയിലുള്ളവര്‍ രാഷ്ട്രീയം തുറന്നു പറയാന്‍ മടിക്കുന്ന കാലത്താണ് വ്യക്തമായ രാഷ്ട്രീയം സംസാരിച്ചുകൊണ്ട് അഖില്‍ പ്രേക്ഷകര്‍ക്കിടയില്‍ ശ്രദ്ധിക്കപ്പെടുന്നത്. ആദ്യകാലത്ത് കോണ്‍ഗ്രസ് പ്രവര്‍ത്തകനായിരുന്ന അഖില്‍ പിന്നീട് പാര്‍ട്ടിയിലെ പ്രശ്‌നങ്ങള്‍ കാരണം കോണ്‍ഗ്രസ് വിമതനായി. പിന്നാലെ 2015ല്‍ തദ്ദേശ തിരഞ്ഞെടുപ്പില്‍ മത്സരിക്കുകയും ചെയ്തിരുന്നു. തുടര്‍ന്നായിരുന്നു ബിജെപിയില്‍ ചേര്‍ന്നത്. യുവമോര്‍ച്ചയുടെ ജില്ലാ കമ്മിറ്റി അംഗമായി ഏറെക്കാലം പ്രവര്‍ത്തിരുന്നു. നിലവില്‍ ബിജെപിയില്‍ നിന്നും വിട്ടുനില്‍ക്കുകയാണ് അഖില്‍ എന്നാണ് റിപ്പോര്‍ട്ടുകള്‍

വ്യക്തമായ രാഷട്രീയമുള്ളതുകൊണ്ടും അഭിപ്രായങ്ങള്‍ വെട്ടിത്തുറന്ന് പറയുന്നതുകൊണ്ടും അഖില്‍ ബിഗ് ബോസിന് പറ്റിയ മത്സരാര്‍ത്ഥിയാണെന്നാണ് പ്രേക്ഷകരുടെ അഭിപ്രായം. ഉണ്ണി മുകുന്ദന്‍, ജോജു ജോര്‍ജ് തുടങ്ങി മലയാള സിനിമയിലെ പ്രമുഖരുമായി അടുത്ത ബന്ധമുള്ള അഖിലിന് സിനിമാലോകത്ത് നിന്നും സ്‌പ്പോര്‍ട്ടും ലഭിക്കുമെന്നാണ് വിലയിരുത്തലുകള്‍.