2022ല്‍ എയറിലായ മലയാള സിനിമകള്‍; മത്സരിച്ച് മമ്മൂട്ടിയും മോഹന്‍ലാലും വരെ

മോഹന്‍ലാല്‍ - പൃഥ്വിരാജ് കൂട്ടുക്കെട്ടില്‍ ഒരുങ്ങിയ രണ്ടാമത്തെ ചിത്രമായിരുന്നു 2022ല്‍ പുറത്തിറങ്ങിയ ബ്രോ ഡാഡി. പ്രഖ്യാപനം മുതല്‍ പ്രേക്ഷകര്‍ കാത്തിരുന്ന ചിത്രത്തിന് പക്ഷേ സമ്മിശ്ര പ്രതികരണമായിരുന്നു പ്രേക്ഷകരുടെ ഭാഗത്ത് നിന്നും ലഭിച്ചത്. ചിത്രത്തിന്റെ റിലീസിന് പിന്നാലെ ബ്രോ ഡാഡിയിലെ പൃഥ്വിരാജിന്റെയും മോഹന്‍ലാലിന്റെയും അഭിനയത്തിന് നിരവധി ട്രോളുകളും വന്നിരുന്നു.

2022ല്‍ പ്രേക്ഷകരെ ഒന്നടങ്കം നിരാശപ്പെടുത്തിയ ചിത്രമാണ് മഞ്ജു വാര്യര്‍ - സന്തോഷ് ശിവന്‍ കൂട്ടുക്കെട്ടിലെത്തിയ ജാക്ക് ആന്റ് ജില്‍. സയന്‍സ് ഫിക്ഷന്‍ ത്രില്ലറായി ഒരുക്കിയ ചിത്രത്തിലെ സൗബിന്‍ ഷാഹിറിന്റെ കഥാപാത്രത്തിന് നേരെ നിരവധി ട്രോളുകളും വന്നിരുന്നു. ഉറുമി, അനന്തഭദ്രം പോലെയുള്ള സിനിമകള്‍ മലയാള സിനിമയ്ക്ക് സമ്മാനിച്ച സന്തോഷ് ശിവന്‍ എന്ന സംവിധായകന്റെ കരിയറിലെ മോശം ചിത്രം കൂടിയാണ്‌ ജാക്ക് ആന്റ് ജില്‍.

2022ല്‍ ട്രോള്‍ ഗ്രൂപ്പുകളില്‍ നിറഞ്ഞുനിന്ന ചിത്രമാണ് മോണ്‍സ്റ്റര്‍. വ്യത്യസ്തങ്ങളായ ചിത്രങ്ങളുമായി മമ്മൂട്ടി മുന്നേറിയപ്പോള്‍ 2022 മോഹന്‍ലാലിന്റെ കരിയറിലെ മോശം വര്‍ഷമാവുകയാണ് മോണ്‍സ്റ്റര്‍ പോലുള്ള ചിത്രങ്ങളിലൂടെ. ദ്വയാര്‍ത്ഥ സംഭാഷണങ്ങള്‍ നിറഞ്ഞ ചിത്രത്തിന് ട്രോളുകള്‍ക്കൊപ്പം തന്നെ വലിയരീതിയില്‍ വിമര്‍ശനങ്ങളും ഉണ്ടായിരുന്നു.

വന്‍ഹൈപ്പിലെത്തി 2022ല്‍ ശ്രദ്ധിക്കപ്പെടാത പോയ ചിത്രമായിരുന്നു മമ്മൂട്ടി നായകനായി എത്തിയ സിബിഐ 5. മലയാളത്തിലെ എക്കാലത്തെയും മികച്ച ഇന്‍വെസ്റ്റിഗേഷന്‍ ത്രില്ലറായ ഒരു സിബിഐ ഡയറിക്കുറിപ്പിന്റെ അഞ്ചാംഭാഗമായി എത്തിയ ചിത്രത്തിന് പക്ഷേ പ്രേക്ഷകരെ തൃപ്തിപ്പെടുത്താന്‍ സാധിക്കാതെ പോവുകയായിരുന്നു.

2022ല്‍ ട്രോളന്മാര്‍ ആഘോഷിച്ച ചിത്രമായിരുന്നു മോഹന്‍ലാല്‍ നായകനായി എത്തിയ ആറാട്ട്. പുതുമകളൊന്നുമില്ലാതെ ഒരുക്കിയ ചിത്രത്തിന് ശരാശരി മോഹന്‍ലാല്‍ ആരാധകരെപ്പോലും തൃപ്തിപ്പെടുത്താന്‍ സാധിച്ചിരുന്നില്ല. സിദ്ധിഖ്, നെടുമുടി വേണു, ഇന്ദ്രന്‍സ്, ജോണി ആന്റണി, സ്വാസിക, സായികുമാമര്‍ തുടങ്ങി മലയാളത്തിലെ വന്‍താരനിര അണിനിരന്ന ചിത്രം കൂടിയാണ് ആറാട്ട്.