ദിലീപിന്റെ നായിക, മോന്‍സണ്‍ മാവുങ്കലിന്‌റെ സുഹൃത്ത്; ബിഗ് ബോസിലെ ശ്രുതിയുടെ ജീവിതകഥ

2000ത്തില്‍ ഏഷ്യാനെറ്റില്‍ സംപ്രേഷണം ചെയ്ത നിഴലുകള്‍ എന്ന ടെലിവിഷന്‍ സീരിയലിലൂടെയായിരുന്നു ശ്രുതി അഭിനയരംഗത്ത് എത്തുന്നത്. രഞ്ജിത്ത് ശങ്കര്‍ സംവിധാനം ചെയ്ത സീരിയലില്‍ ബാലതാരമായിട്ടായിരുന്നു അഭിനയിച്ചത്. നിഴലുകള്‍ക്ക് ശേഷം ഡിറ്റക്ടീവ് ആനന്ദ്, നക്ഷത്രങ്ങള്‍ തുടങ്ങിയ പരമ്പരകളിലൂടെ സീരിയല്‍ രംഗത്ത് സജീവമായി.

ബാലതാരമായി ടെലിവിഷന്‍ സീരിയലുകളില്‍ സജീവമായ സമയത്ത് തന്നെ സിനിമളിലും ശ്രുതി അഭിനയിച്ചു തുടങ്ങിയിരുന്നു. സ്വയംവര പാത, വര്‍ണകാഴ്ചകള്‍, സ്വര്‍ണമെഡല്‍, മാണിക്യന്‍ തുടങ്ങി അഞ്ചോളം സിനിമകളില്‍ ബാലതാരമായി അഭിനയിച്ചിരുന്നു. പിന്നീട് 2007ലാണ് റോമിയോ എന്ന ചിത്രത്തിലൂടെ നായികയായി അരങ്ങേറ്റം കുറിച്ചത്. ദിലീപ് നായകനായി എത്തിയ ചിത്രത്തില്‍ ഭാമ എന്ന കഥാപാത്രത്തെയായിരുന്നു ശ്രുതി അവതരിപ്പിച്ചത്. റോമിയേക്ക് ശേഷം കോളേജ് കുമാരന്‍, പ്ലസ് ടു, ഹോളിഡേയ്‌സ്, പത്തേമാരി, കെട്ടിയോളാണ് എന്റെ മാലാഖ തുടങ്ങി ചെറുതും വലുതുമായി നിരവധി ചിത്രങ്ങളുടെ ഭാഗമായി.

പുരാവസ്തു തട്ടിപ്പ് കേസിലെ പ്രതിയായ മോന്‍സണ്‍ മാവുങ്കലുമായുള്ള ബന്ധത്തെ തുടര്‍ന്ന് ശ്രുതിയെ 2021ല്‍ എന്‍ഫോയ്‌സ്‌മെന്റ് ഡയറക്ടറേറ്റ് ചോദ്യം ചെയ്തിരുന്നു. എന്നാല്‍ മോന്‍സനുമായുള്ള ബന്ധം കലാകാരിയെന്ന നിലയില്‍ മാത്രമാണെന്നും, യാതൊരു തരത്തിലുള്ള സാമ്പത്തിക ഇടപാടും മോന്‍സണുമായി ഇല്ലെന്നും ചോദ്യം ചെയ്യലിനു ശേഷം മാധ്യങ്ങളോട് ശ്രുതി തുറന്നു പറഞ്ഞിരുന്നു. കൊറോണ കാലത്ത് മോന്‍സന്റെവീട്ടില്‍ ശ്രുതി നടത്തിയ നൃത്ത പരിപാടിയുടെ വീഡിയോ  വലിയ വിവാദങ്ങള്‍ ഉണ്ടാക്കിയിരുന്നു. പിന്നാലെയായിരുന്നു ശ്രുതിയ ഇ.ഡി ചോദ്യം ചെയ്യാന്‍ വിളിപ്പിച്ചത്.

കളേഴ്‌സ് തമിഴില്‍ സംപ്രേഷണം ചെയ്യുന്ന നമ്മ മധുരൈ സിസ്‌റ്റേഴ്‌സ് എന്ന ടെലിവിഷന്‍ സീരിയലില്‍ അഭിനയിക്കുന്നതിനിടയിലായിരുന്നു ബിഗ് ബോസ് മലയാളം സീസണ്‍ 5ലെ മത്സരാര്‍ത്ഥിയായി ശ്രുതി എത്തുന്നത്. സീസണ്‍ നാലാഴ്ച പിന്നിടുമ്പോള്‍ സമ്മിശ്ര പ്രതികരണമാണ് ശ്രുതിയുടെ പ്രകടനത്തെക്കുറിച്ച് പ്രേക്ഷകര്‍ക്കുള്ളത്. ഷോയില്‍ കാണിക്കുന്നതല്ല ശ്രുതിയുടെ യഥാര്‍ത്ഥ സ്വാഭാവമെന്നും, ശ്രുതി ഷോയില്‍ അഭിനയിച്ചുകൊണ്ടിരിക്കുകയാണെന്നുമാണ് പ്രധാന ആരോപണങ്ങള്‍.

സ്‌ക്കൂള്‍, കോളേജ് കാലഘട്ടത്തില്‍ തന്നെ കലാരംഗത്ത് സജീവമായിരുന്നു താരം. അഭിനയത്തിനു പുറമെ മികച്ച നര്‍ത്തകി കൂടിയാണ് ശ്രുതി. ഇതിനെല്ലാം പുറമെ ടെലിവിഷന്‍ ഷോകളിലും സജീവമാണ് സൂര്യ ടിവിയില്‍ സംപ്രഷണം ചെയ്ത എന്റെ പ്രിയ ഗാനങ്ങള്‍, ഫ്‌ളവേഴ്‌സില്‍ സംപ്രേഷണം ചെയ്ത കോമഡി ഉത്സവം എന്നീ പരിപാടികളുടെ അവതാരക കൂടിയായിരുന്നു. കൂടാതെ സൂപ്പര്‍ ജോഡി, സ്റ്റാര്‍ ചലഞ്ച്, തകര്‍പ്പന്‍ കോമഡി തുടങ്ങിയ റിയാലിറ്റി ഷോകളില്‍ മത്സരാര്‍ത്ഥിയായും ശ്രുതി തിളങ്ങിയിട്ടുണ്ട്.