പ്രതിഫലം 4 കോടി, അഭിനയത്തിന് പുറമെ ഹോട്ടല്‍ ബിസിനസും, സുസ്മിത എന്ന കോടീശ്വരി!

പുറത്ത് വരുന്ന റിപ്പോര്‍ട്ടുകള്‍ പ്രകാരം 74 കോടിയാണ് സുസ്മിതയുടെ ആകെ ആസ്തി. 9 കോടിക്കടുത്താണ് താരത്തിന്റെ വാര്‍ഷിക വരുമാനം. മാസം ഏതാണ്ട് 60 ലക്ഷത്തിന്റടുത്ത് സുസ്മിത സമ്പാദിക്കുന്നുണ്ട്. അഭിനയം, മോഡലിംഗ് എന്നിവയിലൂടെയാണ് സുസ്മിത ഇത്രയും വലിയ ആസ്തി ഉണ്ടാക്കിയെടുത്തത്. 2019ല്‍ 8 കോടിയായിരുന്നു താരത്തിന്റെ ആകെ ആസ്തി.

ഒരു സിനിമയില്‍ അഭിനയിക്കുന്നതിന് 3 മുതല്‍ 4 കോടി വരെയാണ് സുസ്മിത പ്രതിഫലമായി വാങ്ങുന്നത്. അഭിനയത്തിന് പുറമെ പരസ്യചിത്രങ്ങളും ടെലിവിഷന്‍ പരിപാടികളിലും പങ്കെടുക്കുന്ന സുസ്മിത ഒരു ബ്രാന്‍ഡിന്റെ പരസ്യത്തിന് 1.5 കോടിയാണ് പ്രതിഫലം വാങ്ങുന്നത്. ഇന്ത്യയിലെ പ്രശസ്തമായ പല ബ്രാന്‍ഡുകളുടെയും പരസ്യചിത്രത്തില്‍ സുസ്മിത അഭിനയിച്ചിട്ടുണ്ട്. 

നിലവിലെ കണക്കുകള്‍ പ്രകാരം ബോളിവുഡിലെ കോടീശ്വരിയായ നടിമാരിലൊരാളാണ് സുസ്മിത സെന്‍. മുംബൈയിലെ താരത്തിന്റെ വീടിന്റെ വില കോടികളാണ്. ലക്ഷങ്ങളുടെ പെയിന്റിങ്ങും ഇന്റീരിയര്‍ ഡിസൈനിങ്ങ് കൊണ്ടും അലങ്കരിച്ച വീടിന്റെ ചിത്രങ്ങള്‍ സുസ്മിത പലപ്പോഴും ഇന്‍സ്റ്റാഗ്രാമില്‍ ഷെയര്‍ ചെയ്തിട്ടുണ്ട്. വീടിന്റെ നിലം മുഴുവന്‍ മരം ഉപയോഗിച്ചാണ് താരം നിര്‍മ്മിച്ചത്. അത്തരത്തില്‍ നിരവധി സവിശേഷതകളുള്ളതാണ് സുസ്മിതയുടെ മുംബൈ വെര്‍സോവയിലുള്ള വീട്.  

ബിഎംഡബ്ല്യൂ, ഔഡി തുടങ്ങി നിരവധി ലോക പ്രശസ്തമായ നിരവധി കാറുകളുടെ ഉടമ കൂടിയാണ് സുസ്മിത സെന്‍. 89.90 ലക്ഷത്തിന്റെ ഔഡി ക്യൂ, ഒരു കോടിക്കടുത്ത് വിലയുള്ള ബിഎംഡബ്ല്യൂ എക്‌സ് 6, 1.42 കോടിയുടെ ബിഎംഡബ്ല്യൂ, 35 ലക്ഷത്തിന്റെ ലെക്‌സസ് എല്‍ എക്‌സ് 470 എന്നിവയാണ് സുസ്മിതയുടെ പക്കലുള്ള കാറുകള്‍.

2018 മുതല്‍ 2021വരെ റോഹ്മാൻ ഷാൾ എന്ന വ്യക്തിക്കൊപ്പമായിരുന്നു സുസ്മിത. കൂടാതെ രണ്ട് പെണ്‍കുട്ടികളെ താരം ദത്തെടുത്ത് വളര്‍ത്തുകയും ചെയ്യുന്നുണ്ട്. അടുത്തിടെയായിരുന്നു മുന്‍ ഐപിഎല്‍ ചെയര്‍മാനും ബിസിനസുകാരനുമായ ലളിത് മോഡിക്കൊപ്പമുള്ള ചിത്രങ്ങള്‍ സുസ്മിത ഇന്‍സ്റ്റാഗ്രാമില്‍ ഷെയര്‍ ചെയ്തത്. പിന്നാലെ ഇരുവരും പ്രണയത്തിലാണെന്ന തരത്തില്‍ നിരവധി വാര്‍ത്തകളും വന്നിരുന്നു.  

2005ല്‍ തന്ത്ര എന്ന പേരില്‍ ഒരു ഇവന്റ് മാനേജ്‌മെന്റ് കമ്പനി സുസ്മിത ആരംഭിച്ചിരുന്നു. ഇതിനെല്ലാം പുറമെ ബംഗാളി മാഷി എന്ന പേരില്‍ ഒരു റെസ്റ്റോറന്റും ആരംഭിച്ചിരുന്നു. എന്നാല്‍ റെസ്‌റ്റോറിന്റെ കൂടുതല്‍ വിവരങ്ങള്‍ പുറത്തു വന്നിട്ടില്ല.