ഭാഗ്യം വരാൻ പേരു മാറ്റിയ മലയാള സിനിമകൾ

മമ്മൂട്ടിയെ പ്രധാന കഥാപാത്രമാക്കി ജോഷി സംവിധാനം ചെയ്ത ചിത്രമായിരുന്നു കുട്ടേട്ടന്‍. ലോഹിതദാസ് തിരക്കഥയെഴുതി ചിത്രത്തിന് ആദ്യം നല്‍കിയ ടൈറ്റില്‍ വിഷ്ണുവിന്റെ നമ്പരുകള്‍ എന്നായിരുന്നു. 1990ല്‍ പുറത്തിറങ്ങിയ ചിത്രത്തിന് സമ്മിശ്ര പ്രതികരണമായിരുന്നു പ്രേക്ഷകരുടെ ഭാഗത്ത് നിന്ന് ലഭിച്ചത്‌.  

ശ്രീനിവാസന്റെ കരിയറിലെ മികച്ച ചിത്രങ്ങളിലൊന്നാണ് സത്യന്‍ അന്തിക്കാട് സംവിധാനം ചെയ്ത പൊന്‍മുട്ടിയിടുന്ന താറാവ്. ഉര്‍വശി, ജയറാം, ഇന്നസെന്റ് എന്നിവരും മത്സരിച്ചഭിനയിച്ച ചിത്രത്തിന് ആദ്യം നല്‍കിയ ടൈറ്റില്‍ പൊന്മുട്ടയിടുന്ന തട്ടാന്‍ എന്നായിരുന്നു. എന്നാല്‍ ഷൂട്ടിങ്ങ് തുടങ്ങി കുറച്ചു കഴിഞ്ഞ് ചിത്രത്തിന്റെ ടൈറ്റില്‍ മാറ്റുകയായിരുന്നു.  

മലയാളത്തിലെ സൂപ്പര്‍ഹിറ്റ് ചിത്രങ്ങളിലൊന്നാണ് സിദ്ധിഖ്-ലാല്‍ കൂട്ടുക്കെട്ടില്‍ പുറത്തിറങ്ങിയ ഇന്‍ ഹരിഹര്‍ നഗര്‍. 1990ല്‍ പുറത്തിറങ്ങിയ ചിത്രത്തില്‍ ഗീത വിജയന്‍, മുകേഷ്, സിദ്ധിഖ്, ജഗദീഷ്, അശോകന്‍ എന്നിവരായിരുന്നു പ്രധാന കഥാപാത്രങ്ങളെ അവതരിപ്പിച്ചത്. ചിത്രത്തിന് ആദ്യം നല്‍കിയ പേര് മാരത്തോണ്‍ എന്നായിരുന്നു. പിന്നീട് ഇന്‍ ഹരിഹര്‍ നഗര്‍ എന്നാക്കി മാറ്റുകയായിരുന്നു.  

മമ്മൂട്ടിയെ നായകനാക്കി ഷാജി കൈലാസ് സംവിധാനം ചെയ്ത ദി കിംഗ് ഇന്നും പ്രേക്ഷകരുടെ ഇഷ്ടചിത്രങ്ങളിലൊന്നാണ്. ഗാനങ്ങളില്ലാതെ പ്രദര്‍ശനത്തിനെത്തിയ ചിത്രത്തിന് ആദ്യം നല്‍കിയ പേര് ക്ഷത്രിയന്‍ എന്നായിരുന്നു. പിന്നീട് ദി കിംഗ് എന്ന പേര് കൊടുക്കുകയായിരുന്നു.  

ദിലീപിനെ നായകനാക്കി സുധീഷ് ശങ്കര്‍ സംവിധാനം ചെയ്ത ചിത്രമായിരുന്നു വില്ലാളി വീരന്‍. മൈഥിലി, നമിത പ്രമോദ് എന്നിവര്‍ നായികമാരായി എത്തിയ ചിത്രത്തിന് ബുദ്ധേട്ടന്‍ എന്നായിരുന്നു ആദ്യം നല്‍കിയ പേര്.