വീഴത്തില്ലെടാ! പരാജയങ്ങളിൽ നിന്നും തിരിച്ചു വരാൻ ലാലേട്ടൻ; അണിയറയിൽ വമ്പൻ സിനിമകൾ

മോഹന്‍ലാല്‍-പ്രിയദര്‍ശന്‍ കൂട്ടുക്കെട്ടിലെത്തുന്ന നെറ്റ്ഫ്‌ളിക്‌സ് ആന്തോളജി ചിത്രമാണ് ഓളവും തീരവും. എം.ടി വാസുദേവന്‍ നായരുടെ തിരക്കഥയില്‍ പി.എന്‍ മേനോന്‍ ഒരുക്കിയ ഓളവും തീരവും എന്ന ചിത്രത്തിന്റെ പുനരാവിഷ്‌ക്കാരമാണ് ചിത്രം. ബാപ്പൂട്ടിയായി മോഹന്‍ലാല്‍ എത്തുമ്പോള്‍ നബീസയായി ദുര്‍ഗ കൃഷ്ണ ചിത്രത്തിലെത്തുന്നു. ഹരീഷ് പേരടിയാണ് കുഞ്ഞാലിയെന്ന വില്ലനായി എത്തുന്നത്.  

പ്രേക്ഷകര്‍ ഒന്നടങ്കം കാത്തിരിക്കുന്ന മോഹന്‍ലാല്‍ ചിത്രമാണ് മലൈക്കോട്ടൈ വാലിബന്‍. ലിജോ ജോസ് പെല്ലിശ്ശേരിയും മോഹന്‍ലാലും ആദ്യമായി ഒന്നിക്കുന്ന ചിത്രത്തില്‍ മലയാളത്തിന് പുറമെ ബോളിവുഡ് താരങ്ങളു അണിനിരക്കുന്നുണ്ട് എന്നാണ് റിപ്പോര്‍ട്ടുകള്‍. കൂടാതെ ചിത്രത്തിന്റെ ക്ലൈമാക്‌സില്‍ മോഹന്‍ലാലിനൊപ്പം കമല്‍ഹാസനും എത്തുന്നുണ്ട് എന്ന തരത്തില്‍ മുമ്പ് നിരവധി വാര്‍ത്തകള്‍ വന്നിരുന്നു. വന്‍ ബജറ്റില്‍ ഒരുങ്ങുന്ന ചിത്രം 2023ല്‍ തിയേറ്ററുകളിലെത്തുമെന്നാണ് പ്രതീക്ഷ.  

മലയാളികള്‍ ഏറെ നാളായി കാത്തിരിക്കുന്ന മോഹന്‍ലാല്‍ ചിത്രമാണ് എമ്പുരാന്‍. പൃഥ്വിരാജിന്റെ ആദ്യ സംവിധാന ചിത്രമായ ലൂസിഫറിന്റെ രണ്ടാംഭാഗമായി എത്തുന്ന ചിത്രം മറ്റൊരു ബോക്‌സോഫീസ് ഹിറ്റാവുമെന്നാണ് പ്രേക്ഷകര്‍ പറയുന്നത്. മഞ്ജു വാര്യര്‍, ടൊവീനോ തോമസ് എന്നിവര്‍ക്കൊപ്പം രണ്ടാംഭാഗത്തില്‍ വന്‍താര നിര അണിനിരക്കുമെന്നാണ് റിപ്പോര്‍ട്ടുകള്‍.  

മോഹന്‍ലാലിന്റെ ആദ്യ സംവിധാന ചിത്രമാണ് ബറോസ്. 2019ലായിരുന്നനു ചിത്രത്തിന്റെ പ്രഖ്യാപനം. പിന്നാലെ ചിത്രത്തിന്റെ അപ്‌ഡേറ്റുകള്‍ക്കായി കാത്തിരിക്കുകയായിരുന്നു പ്രേക്ഷകര്‍. 400 വര്‍ഷം പഴക്കമുള്ള ഭൂതത്തിന്റെ കഥ പറയുന്ന ചിത്രം ത്രീഡിയിലാണ് പ്രേക്ഷകരിലേക്കെത്തുന്നത്. മൈ ഡിയര്‍ കുട്ടിച്ചാത്തന്‍ സംവിധാനം ചെയ്ത ജിജോ പുന്നൂസിന്റെ കഥയെ ആസ്പദമാക്കിയാണ് ചിത്രം ഒരുക്കിയിരിക്കുന്നത്.  

ബോക്‌സോഫീസ് റെക്കോര്‍ഡുകള്‍ തകര്‍ത്ത ത്രില്ലര്‍ ചിത്രം ദൃശ്യത്തിന്റെ മൂന്നാംഭാഗത്തിനായി കാത്തിരിക്കുകയാണ് മലയാളികള്‍ ഒന്നടങ്കം. ചിത്രത്തിന്റെതായി പുറത്തിറങ്ങിയ ഫാന്‍മെയിഡ് പോസ്റ്ററുകള്‍ മുമ്പ് സോഷ്യല്‍മീഡിയയില്‍ വൈറലായിരുന്നു. ആദ്യ രണ്ട് ഭാഗങ്ങള്‍ ഹിറ്റായതുപോലെ ദൃശ്യം 3യും ബോക്‌സോഫീസ് റെക്കോര്‍ഡുകള്‍ തകര്‍ക്കുമെന്നാണ് പുറത്തു വരുന്ന റിപ്പോര്‍ട്ടുകള്‍.