ബോള്‍ഡ് ലുക്കിൽ ഇന്‍സ്റ്റയില്‍ തരംഗമായ മോഡല്‍, ബിഗ് ബോസിലെ ലച്ചു; ഐശ്വര്യ രാജേഷിന്റെ വിശേഷങ്ങള്‍

കേരളത്തില്‍ ജനിച്ച ലച്ചു പഠിച്ചതും വളര്‍ന്നതുമെല്ലാം ദക്ഷിണാഫ്രിക്കയിലെ ജോഹ്നാസ്ബര്‍ഗിലാണ്. ഐശ്വര്യ സുരേഷ് എന്നാണ് ലച്ചുവിന്റെ യഥാര്‍ത്ഥ പേര്. സിനിമയില്‍ ശ്രദ്ധിക്കപ്പെട്ടതോടെ ലച്ചു എന്ന പേരിലാണ് പിന്നീട് അറിയപ്പെട്ടത്. മഴവില്‍ മനോരമയില്‍ സംപ്രേഷണം ചെയ്ത സൂപ്പര്‍ ഡാന്‍സര്‍ ജൂനിയര്‍  എന്ന ഡാന്‍സ് റിയാലിറ്റി ഷോയിലെ മത്സരാര്‍ത്ഥിയായിരുന്നു ലച്ചു.

2021ല്‍ പുറത്തിറങ്ങിയ തിങ്കളാഴ്ച നിശ്ചയത്തിലൂടെയാണ് ലച്ചു പ്രേക്ഷകര്‍ക്കിടയില്‍ ശ്രദ്ധിക്കപ്പെടുന്നത്. ചിത്രത്തിലെ ക്ലൈമാക്‌സ് രംഗത്തിലൂടെ പ്രേക്ഷകരുടെ പ്രിയതാരമായി മാറാന്‍ ലച്ചുവിന് സാധിച്ചിരുന്നു. ഡയറക്ട്  ഒടിടി റിലീസായി എത്തിയ ചിത്രം 2021ലെ മികച്ച ചിത്രങ്ങളിലൊന്നു കൂടിയാണ്. 2018ല്‍ പുറത്തിറങ്ങിയ കളി ആണ് അഭിനയിച്ച ആദ്യ ചിത്രം. തുടര്‍ന്ന് 2019ല്‍ പ്രദീപ് കാളിയപുരയത്ത് സംവിധാനം ചെയ്ത സെയ്ഫ് എന്ന ചിത്രത്തില്‍ അഭിനയിച്ചു.

ഗ്ലാമറസ് ഫോട്ടോഷൂട്ടിലൂടെയാണ് ലച്ചു ഇന്‍സ്റ്റാഗ്രാമില്‍ ശ്രദ്ധിക്കപ്പെടുന്നത്. ദിസ് ഈസ് ലച്ചുഗ്രാം എന്നാണ് ലച്ചുവിന്റെ ഇന്‍സ്റ്റ ഐഡി. നിലവില്‍ ഒരു ലക്ഷത്തിലധികം ഫോളോവേഴ്‌സുണ്ട് ലച്ചുവിന്. മോഡലിംഗ്, അഭിനയം ഇവര്‍ക്ക് പുറമെ മികച്ച നര്‍ത്തകി കൂടിയാണ് ലച്ചു. 

ബിഗ് ബോസ് ഷോയിലെ എന്റെ കഥ എന്ന പരിപാടിക്കിടെയായിരുന്നു 13ാം വയസില്‍ ക്രൂരമായി പീഡിപ്പിക്കപ്പെട്ട കഥ ലച്ചു തുറന്നു പറഞ്ഞത്. ദക്ഷിണാഫ്രിക്കയിലാണ് ലച്ചു വളര്‍ന്നത്. ഇതിനിടയിലായിരുന്നു പ്രിയപ്പെട്ട സഹോദരന്റെ മരണം. പിന്നാലെ സഹോദരന്റെ ഓര്‍മകളുള്ള വീട്ടില്‍ ജീവിക്കാന്‍ സാധിക്കാതെ വന്നതോടെ വീണ്ടും ലച്ചു ദക്ഷിണാഫ്രിക്കയിലേക്ക് തിരിച്ചു പോവുകയായിരുന്നു. പിന്നീടായിരുന്നു ലച്ചു പീഢനത്തിനിരയാവുന്നത്. ''ഒരാള്‍ ആയിരുന്നില്ല. ഒന്നിലധികം പേരായിരുന്നു തന്നെ പീഡിപ്പിച്ചത്. പിന്നീട് 18 വയസാപ്പോള്‍ താന്‍ നാട്ടിലേക്ക് വന്നുവെന്നും, ഇതിനിടയില്‍ ഉണ്ടായ പ്രണയവും തന്നെ മാനസികമായും ശാരീരകമായും വേദനിപ്പിച്ചെന്നും'' ലച്ചു ഷോയില്‍ പറഞ്ഞിരുന്നു. 

നിലവില്‍ പ്രേക്ഷകരുടെ പ്രിയപ്പെട്ട ബിഗ് ബോസ് മത്സരാര്‍ത്ഥിയാണ് ലച്ചു. ഷോയുടെ തുടക്കം മുതല്‍ മികച്ച പിന്തുണയാണ് ലച്ചുവിന് പ്രേക്ഷകരുടെ ഭാഗത്ത് നിന്നും ലഭിച്ചുകൊണ്ടിരിക്കുന്നത്. ആദ്യ ആഴ്ചകളില്‍ സൈലന്റായി കളിച്ച ലച്ചു നിലവില്‍ വാശിയോടെ മത്സരിക്കുന്നുണ്ടെന്നാണ് പ്രേക്ഷക അഭിപ്രായം.