മഞ്ജു വാര്യര്‍ ശരിക്കും ലേഡീ സൂപ്പര്‍ സ്റ്റാര്‍ ആണോ ? ഈ സിനിമകള്‍ പറയും സത്യം

നീണ്ട ഇടവേളയ്ക്ക് ശേഷം ബിജു മേനോനും മഞ്ജു വാര്യരും പ്രധാന കഥാപാത്രങ്ങളായി എത്തിയ ചിത്രമായിരുന്നു ലളിതം സുന്ദരം. മഞ്ജു വാര്യരുടെ സഹോദരന്‍ മധു വാര്യരാണ് ചിത്രത്തിന്റെ സംവിധായകന്‍. നടന്‍ കൂടിയായ മധുവിന്റെ ആദ്യ സംവിധാന ചിത്രമെന്ന പ്രത്യേക കൂടി ചിത്രത്തിനുണ്ട്. എന്നാല്‍ പ്രഖ്യാപനം മുതല്‍ വാര്‍ത്തകളില്‍ ഇടം പിടിച്ച ചിത്രത്തിന് പക്ഷേ സമ്മിശ്ര പ്രതികരണമായിരുന്നു പ്രേക്ഷകരുടെ ഭാഗത്ത് നിന്നും ലഭിച്ചത്.  

ജയസൂര്യയും മഞ്ജു വാര്യരും പ്രധാന കഥാപാത്രങ്ങളായി എത്തിയ ചിത്രമായിരുന്നു മേരി ആവാസ് സുനോ. പ്രജേഷ് സെന്‍ സംവിധാനം ചെയ്ത ചിത്രം ഒരു റേഡിയോ ജോക്കിയുടെ കഥയായിരുന്നു പറഞ്ഞത്. മലയാളത്തിന്റെ പ്രിയതാരങ്ങളായ മഞ്ജുവും ജയസൂര്യയും ഒരുമിച്ചെത്തിയ ചിത്രമായിട്ടും തിയേറ്ററുകളില്‍ ആളെക്കൂട്ടാന്‍ ചിത്രത്തിന് സാധിച്ചിരുന്നില്ല. 2022 മെയ് 13ന് തിയേറ്ററുകളിലെത്തിയ ചിത്രം ജൂണ്‍ 24ന് ഒടിടി പ്ലാറ്റ്‌ഫോമുകളിലും റിലീസ് ചെയ്തിരുന്നു.  

2022ല്‍ ട്രോള്‍ പേജുകളില്‍ നിറഞ്ഞു നിന്ന ചിത്രമായിരുന്നു ജാക്ക് ആന്റ് ജില്‍. മലയാളത്തിലെ പ്രശസ്ത സംവിധായകന്‍ സന്തോഷ് ശിവന്റെ സംവിധാനത്തില്‍ പുറത്തിറങ്ങിയ ചിത്രം തിയേറ്ററുകളില്‍ നിന്നും വന്‍ പരാജയമായിരുന്നു ഏറ്റുവാങ്ങിയത്. മഞ്ജു വാര്യര്‍, കാളിദാസ് ജയറാം, അജു വര്‍ഗീസ്, സുരാജ് വെഞ്ഞാറമൂട് എന്നിവരായിരുന്നു ചിത്രത്തിലെ പ്രധാന താരങ്ങള്‍. ചിത്രത്തിലെ മഞ്ജു വാര്യരുടെയും സൗബിന്‍ ഷാഹിറിന്റെ അഭിനയത്തിനായിരുന്നു ഏറ്റവും കൂടുതല്‍ ട്രോളുകള്‍ വന്നത്.  

വന്‍ ഹൈപ്പിലെത്തി തിയേറ്ററുകളില്‍ കാര്യമായ ചലനമുണ്ടാക്കാതെ പോയ മറ്റൊരു മഞ്ജു വാര്യര്‍ ചിത്രമായിരുന്നു 2023ല്‍ പുറത്തിറങ്ങിയ ആയിഷ. ഇന്തോ-അറബിക് പശ്ചാത്തലത്തിലൊരുക്കിയ ചിത്രം സംവിധാനം ചെയ്തിരിക്കുന്നത് ആമിര്‍ പള്ളിക്കല്‍ ആണ്. പ്രഭുദേവ കൊറിയോഗ്രാഫി ചെയ്ത ചിത്രത്തിലെ കണ്ണില് കണ്ണില് എന്ന ഗാനം റിലീസിന് മുമ്പ് തന്നെ യുട്യൂബില്‍ ശ്രദ്ധിക്കപ്പെട്ടിരുന്നു.  

ഒടിടി റിലീസിന് പിന്നാലെ ട്രോളന്മാര്‍ ഏറ്റെടുത്ത മറ്റൊരു മഞ്ജു വാര്യര്‍ ചിത്രമായിരുന്നു വെള്ളരിപട്ടണം. സൗബിന്‍ ഷാഹിറും മഞ്ജുവും തമ്മിലുള്ള സീനുകള്‍ക്കായിരുന്നു ഏറ്റവും കൂടുതല്‍ ട്രോളുകള്‍ വന്നത്. പൊളിറ്റിക്കല്‍ സറ്റയറായി അവതരിപ്പിച്ച ചിത്രത്തിന് ശരാശരി മഞ്ജു വാര്യര്‍ പ്രേക്ഷകരെ പോലും തൃപ്തിപ്പെടുത്താന്‍ സാധിച്ചില്ല എന്നതാണ് സത്യം.