റെനീഷ റഹ്മാന്‍ ബിഗ് ബോസ് സീസണ്‍ 5ലെ ദില്‍ഷയോ? റെനീഷയുടെ കൂടുതല്‍ വിശേഷങ്ങളിതാ

പ്ലസ് ടു കഴിഞ്ഞു നില്‍ക്കുന്ന സമയത്തായിരുന്നു ടെലിവിഷന്‍ സീരിയലിലേക്കുള്ള റെനീഷയുടെ എന്‍ട്രി. ഒഡീഷനിലൂടെയായിരുന്നു സീതാകല്യാണത്തിലേക്ക് സെലക്ട് ആവുന്നത്. എന്നാല്‍ വിദ്യാഭ്യാസത്തിന് പ്രാധാന്യം നല്‍കിയ റെനീഷ ആദ്യ ഒരു വര്‍ഷം കരാര്‍ അടിസ്ഥാനത്തിലായിരുന്നു സീരിയയില്‍ അഭിനയിച്ചത്. എന്നാല്‍ സീരിയല്‍ ശ്രദ്ധിക്കപ്പെട്ടതോടെ റെനീഷ സീതാകല്യാണത്തില്‍ തുടരുകയായിരുന്നു. സൂര്യ ടിവിയില്‍ സംപ്രേഷണം ചെയ്ത മനസ്സിനക്കരെയാണ് അഭിനയിച്ച മറ്റൊരു പ്രധാന സീരിയല്‍.

ജനപ്രിയ പരമ്പരയായ സീതാ കല്യാണത്തിലൂടെയാണ് റെനീഷ ടെലിവിഷന്‍ പ്രേക്ഷകര്‍ക്കിടയില്‍ ശ്രദ്ധിക്കപ്പെടുന്നത്. ഏഷ്യാനെറ്റില്‍ സംപ്രേഷണം ചെയ്ത പരമ്പരയില്‍ സ്വാതി എന്ന കഥാപാത്രത്തെയായിരുന്നു റെനീഷ അവതരിപ്പിച്ചത്. സഹോദരിമാരുടെ ജീവിത കഥ പറഞ്ഞ സീരിയല്‍ ചുരുങ്ങിയ ദിവസങ്ങള്‍ക്കുള്ളില്‍ തന്നെ പ്രേക്ഷകര്‍ ഏറ്റെടുക്കുകയായിരുന്നു. 2018ല്‍ സംപ്രേഷണം ആരംഭിച്ച സീരിയല്‍ ഏതാണ്ട് എഴുന്നൂറിലധികം എപ്പിസോഡുകള്‍ പിന്നിടുകയും ചെയ്തിരുന്നു.

ബിഗ് ബോസ് മലയാളം സീസണ്‍ 5ല്‍ മത്സരാര്‍ത്ഥിയായി എത്തിയ ആദ്യ ദിനം മുതല്‍ മികച്ച മത്സരമാണ് റെനീഷ കാഴ്ച വെക്കുന്നത്. ഗെയിമിലും ചര്‍ച്ചകളിലുമെല്ലാം വാശിയോടെയാണ് റെനീഷ മത്സരിക്കുന്നത്. അതുകൊണ്ടു തന്നെ നിലവില്‍ ഷോയിലെ മികച്ച മത്സരാര്‍ത്ഥികളിലൊരാളു കൂടിയാണ് റെനീഷ.

ആദ്യ ആഴ്ചയില്‍ ബിഗ് ബോസില്‍ മികച്ച പ്രകടനം കാഴ്ചവെക്കുമ്പോഴും നിരവധി വിമര്‍ശനങ്ങളും റെനീഷയ്ക്ക് നേരെ ഉയരുന്നുണ്ട്. സീസണ്‍ 4ലെ മത്സരാര്‍ത്ഥിയായ ദില്‍ഷ പ്രസന്നനാവാന്‍ റെനീഷ ശ്രമിക്കുന്നുണ്ടെന്നാണ് ഏറ്റവും കൂടുതല്‍ ഉയര്‍ന്നുവന്ന വിമര്‍ശനം. ദില്‍ഷയുടേതു പോലെയുള്ള ഡ്രസാണ് ഷോയില്‍ റെനീഷ നിരന്തരം ഉപയോഗിക്കുന്നത് എന്നാണ് വിമര്‍ശകര്‍ ചൂണ്ടിക്കാണിക്കുന്നത്. എന്നാല്‍ ഇതിനെതിരെ റെനീഷയുടെ ഫാന്‍ ഗ്രൂപ്പുകള്‍ രംഗത്ത് വരികയും ചെയ്തിട്ടുണ്ട്.