ആദ്യ മലയാളം വെബ് സീരിസുമായി ഹോട്‌സ്റ്റാര്‍; 'കേരള ക്രൈം ഫയല്‍സിന്റെ' താരനിരയില്‍ അജു വര്‍ഗീസും ലാലും

ഡിസ്‌നി ഹോട്‌സ്റ്റാറിന്റെ മലയാളത്തിലെ ആദ്യ വെബ് സീരിസാണ് കേരള ക്രൈം ഫയല്‍സ്-ഷിജു, പാറയില്‍ വീട്, നീണ്ടകര. മലയാളം, തെലുങ്ക്, ഹിന്ദി, കന്നഡ, ബംഗാളി, തമിഴ്, മറാത്തി തുടങ്ങി ഏഴ് ഭാഷകളില്‍ വെബ് സീരിസ് പ്രേക്ഷകര്‍ക്ക് ലഭ്യമാകും എന്നാണ് പുറത്ത് വരുന്ന റിപ്പോര്‍ട്ടുകള്‍.

ഡിസ്‌നി ഹോട്‌സ്റ്റാറിന്റെ ആദ്യ മലയാളം വെബ് സീരിസില്‍ അജു വര്‍ഗീസും, നടനും സംവിധായകനുമായ ലാലുമാണ് പ്രധാന താരങ്ങളെ അവതരിപ്പിക്കുന്നത്. 2023 ജൂണ്‍ മാസം പകുതിയോടെ വെബ് സീരിസ് പ്രേക്ഷകരിലേക്ക് എത്തും. 

കേരളത്തിന്റെ പശ്ചാത്തലത്തില്‍ വ്യത്യസ്തമായ കുറ്റാന്വേഷണ കഥകളാണ് സീരിസ് അവതരിപ്പിക്കുക എന്നാണ് റിപ്പോര്‍ട്ടുകള്‍. കേരളത്തിന്റെ പശ്ചാത്തലത്തിലാണെങ്കിലും കേരള ക്രൈം ഫയല്‍സ് ഇന്ത്യയിലെ പ്രശസ്മായ വെബ് സീരിസുകളെ പോലെ തന്നെയായിരിക്കും പ്രേക്ഷകരിലേക്ക് എത്തുന്നത്. 

ആഷിഖ് അയ്മറിന്റെ തിരക്കഥയില്‍ അഹമ്മദ് കബീറാണ് കേരള ക്രൈം ഫയല്‍സ് സംവിധാനം ചെയ്തിരിക്കുന്നത്. ജൂണ്‍, മധുരം തുടങ്ങിയ ഹിറ്റ് ചിത്രങ്ങളുടെ സംവിധായകനാണ് അഹമ്മദ് കബീര്‍. ഹിഷാം അബ്ദുള്‍ വഹാബ് സംഗീത സംവിധാനവും മഹേഷ് ഭുവനേന്ദര്‍ എഡിറ്റിങ്ങും നിര്‍വ്വഹിച്ചിരിക്കുന്നു. ജിതിന്‍ സ്റ്റാനിസ്ലസ് ആണ് വെബ് സീരിസിന്റെ മനോഹരമായ ദൃശ്യങ്ങള്‍ പകര്‍ത്തിയിരിക്കുന്നത്. പ്രതാപ് രവീന്ദ്രനാണ് സീരിസിന്റെ പ്രൊഡക്ഷന്‍ ഡിസൈന്‍.