എബ്രാം ഖുറേഷിയും ബിലാല്‍ ജോണ്‍ കുരിശിങ്കലും നേര്‍ക്കുനേര്‍; വരാനിരിക്കുന്ന രണ്ടാം വരവുകള്‍

മോഹന്‍ലാല്‍ - പൃഥ്വിരാജ് കൂട്ടുകെട്ടില്‍ പുറത്തിറങ്ങിയ സൂപ്പര്‍ഹിറ്റ് ചിത്രം ലൂസിഫറിന്റെ രണ്ടാംഭാഗമാണ് എമ്പുരാന്‍. ചിത്രത്തിന്റെ തിരക്കഥ പുരോഗമിക്കുകയാണെന്ന് അടുത്തിടെ മുരളി ഗോപിക്കൊപ്പമുള്ള ചിത്രം പങ്കുവെച്ചുകൊണ്ട് പൃഥ്വിരാജ് അറിയിച്ചിരുന്നു.  

എസ്എന്‍ സ്വാമി തിരക്കഥയെഴുതി കെ മധു സംവിധാനം  ചെയ്യുന്ന ചിത്രമാണ് സിബിഐ 5.മമ്മൂട്ടി, രഞ്ജി പണിക്കര്‍ എന്നിവരാണ് ചിത്രത്തിലെ പ്രധാന അഭിനേതാക്കള്‍. ഇന്ത്യന്‍ സിനിമയുടെ ചരിത്രത്തില്‍ ഒരു നടനും ഇതുവരെ ഒരേ സിനിമയുടെ അഞ്ച് ഭാഗങ്ങളില്‍ അഭിനയിച്ചിട്ടില്ല. സി ബിഐയുടെ അഞ്ചാം ഭാഗം ഇറങ്ങുന്നതോടെ ആ ചരിത്രനേട്ടത്തിന് മമ്മൂട്ടി ഉടമയാകും. അടിപിടിയോ നെടുന്‍ നീള സംഭാഷണങ്ങളോ ഇല്ലാതെയാണ് സിബിഐ ചിത്രങ്ങളെല്ലാം വിജയിച്ചത്. എല്ലാ ചിത്രത്തിന്റെയും  ക്ലൈമാക്‌സില്‍  ഒരു രഹസ്യം ഒളിപ്പിച്ചുവെച്ചാണ് ചിത്രങ്ങളെല്ലാം പ്രദര്‍ശനത്തിനെത്തിയത്.  അതുകൊണ്ടുതന്നെ ചിത്രത്തിന്റെ നാലു ഭാഗങ്ങള്‍ ഇറങ്ങിയിട്ടും പരമ്പരചിത്രത്തിന്റെ ആവര്‍ത്തന വിരസത പ്രേക്ഷകരെ ബാധിച്ചിട്ടില്ല.

2021ല്‍ പ്രേക്ഷകര്‍ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ബിലാല്‍. അമല്‍ നീരദിന്റെ സംവിധാനത്തില്‍ 2007ല്‍ പുറത്തിറങ്ങിയ ആക്ഷന്‍ ത്രില്ലര്‍ ചിത്രം ബിഗ് ബിക്ക് സമ്മിശ്ര പ്രതികരണമായിരുന്നു തിയേറ്ററുകളില്‍ നിന്നും ലഭിച്ചത്. എന്നാല്‍ പിന്നീട് വര്‍ഷങ്ങള്‍ക്കിപ്പുറം ടോറന്റിലും മറ്റു ഹിറ്റായ ചിത്രം ഇന്നും പ്രേക്ഷകരുടെ ഇഷ്ടചിത്രങ്ങളിലൊന്നാണ്. ബിലാലിലൂടെ മമ്മൂട്ടിയുടെ സ്‌റ്റെലിഷ് കഥാപാത്രമായ ബിലാല്‍ ജോണ്‍ കുരിശിങ്കല്‍ വീണ്ടുമെത്തുമ്പോള്‍ വലിയ പ്രതീക്ഷയിലാണ് ആരാധകര്‍.

മമ്മൂട്ടിയുടെ കരിയറിലെ സൂപ്പര്‍ ഹിറ്റ് ചിത്രമായ കോട്ടയം കുഞ്ഞച്ചന്റെ രണ്ടാംഭാഗമാണ് കോട്ടയം കുഞ്ഞച്ചന്‍ 2. മിഥുന്‍ മാനുവല്‍ തോമസ് ആണ് ചിത്രത്തിന്റെ സംവിധായകന്‍. മമ്മൂട്ടിയാണ് ചിത്രത്തില്‍ പ്രധാന കഥാപാത്രത്തെ അവതരിപ്പിക്കുന്നത്. രണ്ടാംഭാഗത്തിനെതിരെ ആദ്യ സിനിയുടെ അണിയറപ്രവര്‍ത്തകര്‍ രംഗത്തു വന്നിരുന്നു. കോട്ടയം കുഞ്ഞച്ചന്‍ എന്ന പേരില്‍ രണ്ടാംഭാഗം ഇറക്കാന്‍ പറ്റില്ല എന്നായിരുന്നു ചിത്രത്തിന്റെ സംവിധായകന്‍ ടി എസ് സുരേഷ് ബാബുവും നിര്‍മാതാവ് അരോമ മണിയും പറഞ്ഞത്. ഇതോടെ കോട്ടയം കുഞ്ഞച്ചന്‍ എന്ന പേരില്ലാതെ മമ്മൂട്ടിയെ നായകനാക്കി ചിത്രവുമായി മുന്നോട്ടു പോവുമെന്ന് നിര്‍മാതാവ് വിജയ് ബാബു പറഞ്ഞു. 1990 ലാണ് സുരേഷ് ബാബുവിന്റെ സംവിധാനത്തില്‍ കോട്ടയം കുഞ്ഞച്ചന്‍ പുറത്തിറങ്ങുന്നത്. ബോക്‌സോഫീസില്‍ മികച്ച വിജയമാണ് ചിത്രം നേടിയത്.  

ബോക്‌സോഫീസില്‍ മികച്ച വിജയം നേടിയ ആട് 2വിന്റെ മൂന്നാംഭാഗമാണ് ആട് 3. മിഥുന്‍ മാനുവല്‍ തോമസ് സംവിധാനം ചെയ്യുന്ന ചിത്രത്തിന്റെ പ്രഖ്യാപനം ആട് 2വിന്റെ നൂറാം ദിനാഘോഷ ചടങ്ങുകള്‍ക്കിടയിലാണ് നടന്നത്.ചിത്രം ത്രീഡിയിലായാരിക്കുമെന്നാണ് റിപ്പോര്‍ട്ടുകള്‍. ജയസൂര്യ, വിനായകന്‍, ചെമ്പന്‍ വിനോദ് ജോസ്, സണ്ണി വെയ്ന്‍, വിജയ് ബാബു തുടങ്ങിയ നീണ്ട താരനിരയാണ് മൂന്നാഭാഗത്തിലും ഉണ്ടാവുക.  

മമ്മൂട്ടി-വൈശാഖ് കൂട്ടുകെട്ടില്‍ പുറത്തിറങ്ങിയ മധുര രാജയുടെ മൂന്നാംഭാഗമാണ് മിനിസ്റ്റര്‍ രാജ. മധുര രാജയുടെ അവസാന ടൈറ്റില്‍ കാര്‍ഡില്‍ കൂടിയാണ് ചിത്രത്തിന്റെ പേര് പുറത്തുവിട്ടത്. വൈശാഖ് ഉദയ്കൃഷ്ണ മമ്മൂട്ടി ടീമാണ് ഈ ചിത്രവും ഒരുക്കുന്നത്.

ദിലീപ്- ജോഷി കൂട്ടുകെട്ടില്‍ പുറത്തിറങ്ങിയ റണ്‍വേയുടെ രണ്ടാംഭാഗമാണ് വാളയാര്‍ പരമശിവം. ഉദയകൃഷ്ണയാണ് ചിത്രത്തിന്റെ തിരക്കഥ എഴുതുന്നത്. ദിലീപ് തന്നെയാണ് ചിത്രം നിര്‍മ്മിക്കുന്നത്.  

2003ല്‍ ജോണി ആന്റണിയുടെ സംവിധാനത്തില്‍ പുറത്തിറങ്ങിയ സിഐഡി മൂസയുടെ രണ്ടാംഭാഗമാണ് സിഐഡി മൂസ 2. ദിലീപ്, കൊച്ചിന്‍ ഹനീഫ, ഭാവന, ഒടുവില്‍ ഉണ്ണികൃഷ്ണന്‍, ഹരിശ്രീ അശോകന്‍, ഭാവന, സലിം കുമാര്‍, ബിന്ദു പണിക്കര്‍ തുടങ്ങി വന്‍താര നിര അണിനിരന്ന ഒന്നാംഭാഗം ഇന്നും പ്രേക്ഷകരുടെ ഇഷ്ടചിത്രങ്ങളിലൊന്നാണ്.  

ജോണ്‍ വര്‍ഗീസിന്റെ സംവിധാനത്തില്‍ 2015ല്‍ പുറത്തിറങ്ങിയ അടി കപ്യാരെ കൂട്ടമണി എന്ന ചിത്രത്തിന്റെ രണ്ടാംഭാഗമാണ് എന്ന ചിത്രത്തിന്റെ രണ്ടാംഭാഗമാണ്.