ക്രൈം ത്രില്ലറുമായി വീണ്ടും മമ്മൂട്ടി; കണ്ണൂര്‍ സ്‌ക്വാഡ് 2023ലെ സൂപ്പര്‍ഹിറ്റ് ചിത്രമാകുമോ ?

മലയാളത്തിന്റെ മെഗാസ്റ്റാര്‍ മമ്മൂട്ടിയെ നായകനാക്കി റോബി വര്‍ഗീസ് സംവിധാനം ചെയ്ത സിനിമയാണ് കണ്ണൂര്‍ സ്‌ക്വാഡ്. ദി ഗ്രേറ്റ് ഫാദര്‍, പുതിയ നിയമം തുടങ്ങിയ സിനിമകളുടെ ഛായാഗ്രഹാകനായ റോബിന്റെ ആദ്യ സംവിധാന ചിത്രം കൂടിയാണ് കണ്ണൂര്‍ സ്‌ക്വാഡ്. ക്രൈം ത്രില്ലര്‍ പശ്ചാത്തലത്തില്‍ ഒരുക്കിയ ചിത്രം മമ്മൂട്ടിയുടെ മറ്റൊരു മികച്ച സിനിമയായിരിക്കുമെന്നാണ് പ്രേക്ഷകരുടെ വിലയിരുത്തല്‍.

മുഹമ്മദ് ഷാഫിയാണ് കണ്ണൂര്‍ സ്‌ക്വാഡിന്റെ കഥ എഴുതിയിരിക്കുന്നത്. നടന്‍ റോണി ഡേവിഡ് രാജും മുഹമ്മദ് ഷാഫിയും ചേര്‍ന്നാണ് തിരക്കഥ എഴുതിയത്. കാതല്‍ ദി കോര്‍, റോഷാക്ക് എന്നീ ചിത്രങ്ങള്‍ക്ക് ശേഷം മമ്മൂട്ടി കമ്പനി നിര്‍മ്മിക്കുന്ന ചിത്രം കൂടിയാണ് കണ്ണൂര്‍ സ്‌ക്വാഡ്. മുഹമ്മദ് റാഹില്‍ ആണ് ചിത്രത്തിന്റെ ഛായാഗ്രാഹകന്‍. പ്രവീണ്‍ പ്രഭാകര്‍ എഡിറ്റിങ്ങും സുഷിന്‍ ശ്യാം സംഗീത സംവിധാനവും നിര്‍വ്വഹിച്ചിരിക്കുന്നു. പൂനൈ, വയനാട്, എറണാകുളം എന്നിവിടങ്ങളിലായിരുന്നു ചിത്രത്തിന്റെ ഷൂട്ടിങ്ങുകള്‍. ദുല്‍ഖര്‍ സല്‍മാന്റെ വേഫെറര്‍ ഫിലിംസാണ് ചിത്രം കേരളത്തില്‍ വിതരണം ചെയ്യുന്നത്.  

മമ്മൂട്ടിയുടെ മുഖത്തിനൊപ്പം ജീപ്പ് ലൈറ്റിന്റെ ബാക്ക്ഗ്രൗണ്ടില്‍ നാല് പേര്‍ നടക്കുന്ന ഒരു ബ്ലാക്ക് ആന്റ് വൈറ്റിലായിരുന്നു ചിത്രത്തിന്റെ ഫ്സ്റ്റ് ലുക്ക് പോസ്റ്റര്‍. 2023 ഫെബ്രുവര് 26നായിരുന്നു മമ്മൂട്ടി തന്റെ ഫേസ്ബുക്ക് പേജിലൂടെ ഫസ്റ്റ്‌ലുക്ക് പോസ്റ്റര്‍ പങ്കുവെച്ചത്. സെക്കന്റ് ലുക്കിലായിരുന്നു ചിത്രത്തിലെ പ്രധാന താരങ്ങളെ കാണിച്ചത്. മമ്മൂട്ടിക്കൊപ്പം ശബരീഷ് വര്‍മ, അസീസ് നെടുമങ്ങാട്, റോണി ഡേവിഡ് എന്നിവരായിരുന്നു സെക്കന്‍ഡ് ലുക്കിലുണ്ടായിരുന്നത്. 

ഷൂട്ടിങ്ങ് പുരോഗമിച്ചുകൊണ്ടിരിക്കുന്ന ചിത്രം 2023ന്റെ പകുതിയില്‍ തിയേറ്ററുകളിലെത്തുമെന്നാണ് റിപ്പോര്‍ട്ടുകള്‍. പോസ്റ്റ് പ്രൊഡക്ഷന്‍ വര്‍ക്കുകള്‍ കൃത്യ സമയത്ത് പൂര്‍ത്തിയാവുകയാണെങ്കില്‍ ജൂണ്‍ അവസാനമോ ജൂലൈ ആദ്യമോ കണ്ണൂര്‍ സ്‌ക്വാഡ് പ്രേക്ഷകരിലേക്കെത്തും. എന്നാല്‍ റിലീസ് ഡേറ്റുമായി ബന്ധപ്പെട്ട് യാതൊരു അപ്‌ഡേറ്റും ചിത്രത്തിന്റെ അണിയറപ്രവര്‍ത്തകരുടെ ഭാഗത്ത് നിന്നും ഇതുവരെ വന്നിട്ടില്ല.