പപ്പേട്ടന്റെ താരങ്ങള്‍; മലയാളത്തിന് പത്മരാജന്‍ നല്‍കിയ അഭിനേതാക്കള്‍

പത്മരാജന്‍ സംവിധാനം ചെയ്ത അപരന്‍ എന്ന ചിത്രത്തിലൂടെയായിരുന്നു ജയറാമിന്റെ വെള്ളിത്തിരയിലേക്കുള്ള അരങ്ങേറ്റം. ജയറാം ഡബിള്‍ റോളിലെത്തിയ ചിത്രത്തില്‍ ശോഭനയായിരുന്നു നായിക. അപരന് ശേഷം മലയാളത്തിലെ തിരക്കുള്ള നടനായി ജയറാം മാറിയത് പെട്ടെന്നായിരുന്നു.  

പത്മരാജന്റെ സംവിധാനത്തില്‍ 1986ല്‍ പുറത്തിറങ്ങിയ ദേശാടനക്കിളി കരയാറില്ല എന്ന ചിത്രത്തിലൂടെയായിരുന്നു ശാരിയുടെ സിനിമാജീവിതം അരംഭിച്ചത്. അതേ വര്‍ഷം തന്നെ നമുക്ക് പാര്‍ക്കാന്‍ മുന്തിരിത്തോപ്പുകള്‍ എന്ന ചിത്രത്തിലും അഭിനയിച്ചു. 1980-90 കാലഘട്ടങ്ങളില്‍ മലയാളത്തിലെ തിരക്കുള്ള നടിയായിരുന്നു ശാരി.

പത്മരാജന്റെ കൂടെവിടെ എന്ന ചിത്രത്തിലൂടെ മലയാള സിനിമയിലെത്തിയ റഹ്മാന്‍ 1980കളില്‍ മലയാള സിനിമയിലെ മുന്‍നിര നായകന്മാരിലൊരാളായിരുന്നു. ചിത്രത്തിലെ രവി പുത്തൂരാന്‍ എന്ന കഥാപാത്രത്തിലൂടെ 1983ലെ മികച്ച സഹനടനുള്ള കേരള സംസ്ഥാന അവാര്‍ഡും റഹ്മാന്‍ നേടിയിരുന്നു. തുടര്‍ന്ന് മലയാളത്തിനു പുറമെ തമിഴിലും റഹ്മാന്‍ തിരക്കുള്ള നടനായി മാറുകയായിരുന്നു.  

പത്മരാജന്‍ ചിത്രം പെരുവഴിയമ്പലം എന്ന ചിത്രത്തിലൂടെയായിരുന്നു അശോകന്റെ സിനിമാ അരങ്ങേറ്റം. 1979ല്‍ പുറത്തിറങ്ങിയ ചിത്രം പത്മരാജന്റെ ആദ്യ സംവിധാന ചിത്രം കൂടിയായിരുന്നു. ചിത്രത്തിന് രണ്ട് കേരള സംസ്ഥാന ചലച്ചിത്ര പുരസ്‌ക്കാരവും ദേശീയ ചലച്ചിത്ര പുരസ്‌ക്കാരവും ലഭിച്ചിരുന്നു.  

1983ല്‍ പുറത്തിങ്ങിയ പത്മരാജന്‍ ചിത്രം കൂടെവിടെയാണ് സുഹാസിനിയുടെ ആദ്യ മലയാള ചിത്രം. മമ്മൂട്ടി, റഹ്മാന്‍ എന്നിവരായിരുന്നു ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിച്ചത്. റഹ്മാന്റെ ആദ്യ ചിത്രം കൂടിയായിരുന്നു കൂടെവിടെ.