കാവ്യ മാധവന്‍ മുതല്‍ ദീപ്തി സതി വരെ ; ലാല്‍ ജോസ് കൊണ്ടുവന്ന നായികമാര്‍

പ്രേക്ഷകരുടെ പ്രിയതാരം കാവ്യ മാധവന്‍ ലാല്‍ ജോസിന്റെ ചന്ദ്രനുദിക്കുന്ന ദിക്കില്‍ എന്ന ചിത്രത്തിലൂടെയാണ് നായികയാവുന്നത്. പിന്നീട് മധുരനൊമ്പരക്കാറ്റ്, ഡാര്‍ലിങ് ഡാര്‍ലിങ് എന്നീ ചിത്രങ്ങളിലൂടെ കാവ്യ മലയാളത്തില്‍ നായികയായി തിളങ്ങി. ക്ലാസ്‌മേറ്റ്‌സ്, മീശ മാധവന്‍ എന്നീ ലാല്‍ജോസ് ചിത്രങ്ങളിലെ താരത്തിന്റെ കഥാപാത്രങ്ങളും ഏറെ ശ്രദ്ധിക്കപ്പെട്ടിരുന്നു.  

മലയാളികളുടെ പ്രിയതാരം സംവൃത സുനിലിന്റെ ആദ്യ ചിത്രം ലാല്‍ ജോസ് സംവിധാനം ചെയ്ത രസികന്‍ ആണ്. രഞ്ജിത്ത് സംവിധാനം ചെയ്ത നന്ദനത്തില്‍ ബാലാമണി എന്ന കഥാപാത്രത്തെ അവതരിപ്പിക്കാന്‍ അവസരം ലഭിച്ചിരുന്നെങ്കിലും സംവൃത ആ അവസരം നിരസിക്കുകയായിരുന്നു.  

മലയാളികളുടെ പ്രിയതാരം മീര നന്ദന്റെ ആദ്യ ചിത്രം ലാല്‍ ജോസ് സംവിധാനം ചെയ്ത മുല്ല ആണ്. ഏഷ്യാനെറ്റ് ചാനലിൽ സം‌പ്രേഷണം ചെയ്ത ഐഡിയ സ്റ്റാർ സിംഗർ എന്ന റിയാലിറ്റി ഷോയിലൂടെയാണ് മീര ശ്രദ്ധിക്കപ്പെടുന്നത്. തുടര്‍ന്ന് മുല്ലയ്ക്ക് ശേഷം കറന്‍സി, പുതിയ മുഖം, കാറ്റു മഴയും, മല്ലു സിങ് തുടങ്ങി നിരവധി ചിത്രങ്ങളില്‍ അഭിനയിച്ചു.  

മലയാളികളുടെ പ്രിയതാരം അര്‍ച്ചന കവിയുടെ ആദ്യ ചിത്രം ലാല്‍ ജോസ് സംവിധാനം ചെയ്ത 'നീലത്താമര'യാണ്. തുടര്‍ന്ന് മമ്മി ആന്റ് മീ, ബെസ്റ്റ് ഓഫ് ലക്ക്, മഴവില്ലിന്നറ്റം വരെ തുടങ്ങി നിരവധി ചിത്രങ്ങളില്‍ അഭിനയിച്ചു.

2010ല്‍ പുറത്തിറങ്ങിയ ലാല്‍ ചിത്രം എല്‍സമ്മ എന്ന ആണ്‍കുട്ടിയിലൂടെയാണ് ആന്‍ അഗസ്റ്റിന്‍ സിനിമയിലെത്തുന്നത്. തുടര്‍ന്ന് അര്‍ജ്ജുനന്‍ സാക്ഷി, ത്രീ കിംഗ്‌സ്, ഓര്‍ഡിനറി തുടങ്ങി നിരവധി ചിത്രങ്ങളില്‍ അഭിനയിച്ചു. ലാല്‍ ജോസ് സംവിധാനം ചെയ്ത നീന എന്ന ചിത്രത്തിലും ആന്‍ പ്രധാന കഥാപാത്രത്തെ അവതരിപ്പിച്ചിരുന്നു.  

2012ല്‍ പുറത്തിറങ്ങിയ ലാല്‍ജോസ് ചിത്രം ഡയമണ്ട് നെക്ലേസ് ആണ് അനുശ്രീയുടെ ആദ്യ ചിത്രം. ഫഹദ് ഫാസില്‍ നായകനായി എത്തിയ ചിത്രത്തിലെ അനുശ്രീയുടെ കലാമണ്ഡലം രാജശ്രീ എന്ന കഥാപാത്രം ഏറെ ശ്രദ്ധിക്കപ്പെട്ടിരുന്നു.  

2013ല്‍ പുറത്തിറങ്ങിയ ലാല്‍ ജോസ് ചിത്രം ഇമ്മാനുവേല്‍ ആണ് റീനുവിന്റെ ആദ്യ ചിത്രം. ചിത്രത്തില്‍ മമ്മൂട്ടിയായിരുന്നു നായകന്‍. തുടര്‍ന്ന് 5 സുന്ദരികള്‍, പ്രെയ്‌സ് ദി ലോര്‍ഡ്, ഇയ്യോബിന്റെ പുസ്തകം എന്നീ ചിത്രങ്ങളിലും പ്രധാന കഥാപാത്രത്തെ അവതരിപ്പിച്ചു.  

ഏഷ്യനെറ്റിലെ മമ്മൂട്ടി ദ ബെസ്റ്റ് ആക്ടര്‍ എന്ന റിയാലിറ്റി ഷോയിലൂടെ ശ്രദ്ധിക്കപ്പെട്ട പാര്‍വതി നമ്പ്യാരുടെ ആദ്യ ചിത്രം ലാല്‍ ജോസ് സംവിധാനം ചെയ്ത ഏഴ് സുന്ദര രാത്രികള്‍ ആണ്. ചിത്രത്തില്‍ ആന്‍ എന്ന കഥാപാത്രത്തെയാണ് പാര്‍വതി അവതരിപ്പിച്ചത്.  

ലാല്‍ ജോസ് സംവിധാനം ചെയ്ത നീന എന്ന ചിത്രത്തിലൂടെയാണ് ദീപ്തി സതി സിനിമയിലെത്തുന്നത്. വിജയ് ബാബു, ആൻ അഗസ്റ്റിൻ എന്നിവരായിരുന്നു ചിത്രത്തിലെ മറ്റു പ്രധാന താരങ്ങൾ. തുടർന്ന് മമ്മൂട്ടി നായകനായ പുള്ളിക്കാരൻ സ്റ്റാറാ, സോളോ, ലവ കുശ, ലക്കീ തുടങ്ങി നിരവധി ചിത്രങ്ങളില്‍ അഭിനയിച്ചു.