വിട്ടുകൊടുക്കാതെ പ്രഭാസ്, പിന്നാലെ പിടിച്ച് അല്ലു ; തെലുങ്കില്‍ ഏറ്റവും കൂടുതല്‍ പ്രതിഫലം വാങ്ങുന്ന നടന്മാര്‍

റിപ്പോര്‍ട്ടുകള്‍ പ്രകാരം തെലുങ്കില്‍ ഏറ്റവും കുടൂതല്‍ പ്രതിഫലം വാങ്ങുന്ന നടനാണ് പ്രഭാസ്. മുമ്പ് 100 കോടി പ്രതിഫലമായി വാങ്ങിയിരുന്ന പ്രഭാസ് ആദിപുരുഷ് എന്ന ചിത്രത്തിനായി 150 കോടി പ്രതിഫലം വാങ്ങിയെന്നാണ് വാര്‍ത്തകള്‍. ബാഹുബലിയുടെ വിജയത്തിന് പിന്നാലെയായിരുന്നു പ്രഭാസ് തന്റെ പ്രതിഫലം കുത്തനെ ഉയര്‍ത്തിയത്.  

തെലുങ്കിന് പുറത്തും ലക്ഷക്കണക്കിന് ആരാധകരുള്ള നടനാണ് പവന്‍ കല്യാണ്‍. അടുത്തിടെ തന്റെ പ്രതിഫലത്തെക്കുറിച്ച് താരം തന്നെ തുറന്നു പറഞ്ഞിരുന്നു. ഒരു സിനിമയില്‍ അഭിനയിക്കുന്നതിന് നിലവില്‍ ദിവസേന രണ്ട് കോടിയാണ്  പവന്‍ കല്യാണ്‍ വാങ്ങുന്നത്. ഒരു രാഷ്ട്രീയ റാലിക്കിടെയായിരുന്നു പ്രതിഫലത്തെക്കുറിച്ച് താരം തുറന്നു പറഞ്ഞത്.  

റിപ്പോര്‍ട്ടുകള്‍ പ്രകാരം 55 കോടിയാണ് മഹേഷ് ബാബു നിലവില്‍ ഒരു ചിത്രത്തിനായി വാങ്ങുന്ന പ്രതിഫലം. മുമ്പ് പ്രതിഫലവുമായി ബന്ധപ്പെട്ട് മഹേഷ് ബാബു നടത്തിയ പ്രസ്താവന വലിയ വിവാദങ്ങളുണ്ടാക്കിയിരുന്നു. ബോളിവുഡിന് തന്നെ താങ്ങാനാവില്ലെന്നും അതുകൊണ്ട് ഹിന്ദി സിനിമകള്‍ ചെയ്ത് സമയം കളയുന്നില്ലെന്നുമായിരുന്നു മഹേഷ് ബാബു നടത്തിയ പരസ്യ പ്രസ്താവന.  

തെലുങ്കില്‍ ഏറ്റവും കൂടുതല്‍ പ്രതിഫലം വാങ്ങുന്ന മറ്റൊരു നടനാണ് ജൂനിയര്‍ എന്‍ടിആര്‍. റിപ്പോര്‍ട്ടുകള്‍ പ്രകാരം 45 കോടിയിലധികമാണ് ഒരു ചിത്രത്തിനായി താരം വാങ്ങുന്നത്. ആര്‍ആര്‍ആറിന്റെ വിജയത്തിന് പിന്നാലെ അദ്ധേഹം പ്രതിഫലം വര്‍ധിപ്പിച്ചതായും വാര്‍ത്തകളുണ്ട്.  

പുറത്ത് വരുന്ന റിപ്പോര്‍ട്ടുകള്‍ പ്രകാരം 45 കോടിയാണ് ഒരു ചിത്രത്തിനായി രാം ചരണ്‍ വാങ്ങുന്ന പ്രതിഫലം. മുമ്പ് ഓറഞ്ച് എന്ന ചിത്രത്തിന്റെ പരാജയത്തിനു പിന്നാലെ താരം പ്രതിഫലത്തിന്റെ പകുതി തിരിച്ചു നല്‍കിയിരുന്നു. പ്രതിഫലമായി വാങ്ങിയ തുകയില്‍ നിന്നും 3.5 കോടിയായിരുന്നു തിരിച്ചു നല്‍കിയത്.  

മലയാളികളുടെ പ്രിയപ്പെട്ട തെലുങ്ക് നടനും പ്രതിഫലത്തിന്റെ കാര്യത്തില്‍ മുമ്പിലാണ്. പുഷ്പയുടെ ആദ്യഭാഗത്തിനായി 60 കോടിയായിരുന്നു താരം പ്രതിഫലമായി വാങ്ങിയത്. എന്നാല്‍ ചിത്രം ഹിറ്റായതോടെ രണ്ടാം ഭാഗത്തിനായി ഏതാണ്ട് 90 കോടിയാണ് അല്ലു വാങ്ങിയ പ്രതിഫലം എന്നാണ് റിപ്പോര്‍ട്ടുകള്‍.