കാശ് കൂട്ടിചോദിച്ചു, കാരണമില്ലാതെ പുറത്താക്കി; അവസാന നിമിഷം ബിഗ് ബജറ്റ് സിനിമയില്‍ നിന്നും മാറ്റിനിർത്തപ്പെട്ട ബോളിവുഡ് നടിമാർ

അടുത്തിടെയായിരുന്നു ബിഗ് ബാനര്‍ സിനിമകളില്‍ നിന്നും തന്നെ അവസാന നിമിഷം മാറ്റിയ കഥ നടി ഭൂമിക ചൗള തുറന്നു പറഞ്ഞത്. 2007ലെ മികച്ച സിനിമകളിലൊന്നായ ജബ് വീ മെറ്റില്‍ ആദ്യം ജോഡികളായി തീരുമാനിച്ചത് ഭൂമികയേയും ബോബി ഡിയോളിനെയുമായിരുന്നു. എന്നാല്‍ ചിത്രത്തിന്റെ ഷൂട്ടിങ്ങിനു മുമ്പ് ഭൂമികയെ മാറ്റി കരീന കപൂറിനെ സിനിമയിലേക്ക് തിരഞ്ഞെടുക്കുകയായിരുന്നു. 2003ല്‍ പുറത്തിറങ്ങിയ മുന്ന ഭായ് എം.ബി.ബി.എസ്, മണിരത്‌നത്തിന്റെ കണ്ണത്തില്‍ മുത്തമിട്ടാല്‍ എന്നീ ചിത്രങ്ങളില്‍ നിന്നും ഭൂമികയെ അവസാന നിമിഷം മാറ്റി നിര്‍ത്തുകയായിരുന്നു.  

അനുരാഗ് കശ്യപ് ചിത്രം സായയില്‍ നിന്നും കരീന കപൂറിനെ അവസാന നിമിഷം മാറ്റി നിര്‍ത്തുകയായിരുന്നു. ചിത്രത്തിന്റെ ആദ്യ ദിവസത്തെ ഷൂട്ട് പൂര്‍ത്തിയാക്കിയതിനു ശേഷമായിരുന്നു കരീനയെ മാറ്റി താര ശര്‍മയെ സായയിലെ നായികയായി തിരഞ്ഞെടുത്തത്. സായയില്‍ നിന്നും അവസാന നിമിഷം മാറ്റി നിര്‍ത്തിയപ്പോള്‍ തന്റെ കരിയര്‍ തന്നെ അവസാനിച്ചു പോയതുപോലെ തോന്നിയെന്ന് കരീന തുറന്നു പറയുകയും ചെയ്തിരുന്നു.  

കരീന കപൂറിനെ പോലെ ബിഗ് ബജറ്റ് ചിത്രങ്ങളിലേക്ക് സെലക്റ്റ് ചെയ്യുകയും അവസാന നിമിഷം ഒഴിവാക്കുകയും ചെയ്ത മറ്റൊരു ബോളിവുഡ് നടിയാണ് പ്രിയങ്ക ചോപ്ര. എന്നാല്‍ അതിലൊന്നും തളരാതെ മികച്ച സിനിമകളിലൂടെ ബോളിവുഡിലെ മുന്‍നിര നായികമാരിലൊരാളായി മാറുകയായിരുന്നു പ്രിയങ്ക ചോപ്ര. ബോളിവുഡിലുപരി ഹോളിവുഡിലും തന്റെ കഴിവ് തെളിയിച്ചിരിക്കുകയാണ് പ്രിയങ്കയിപ്പോള്‍.  

ബോളിവുഡില്‍ ഏറ്റവും കൂടൂതല്‍ പ്രതിഫലം വാങ്ങുന്ന നടിമാരിലൊരാളാണ് കരീന കപൂര്‍. മുമ്പ് കരിയറിന്റെ തുടക്കക്കാലത്ത് പ്രിയങ്ക ചോപ്രയെയും, കത്രീന കൈഫിനെയും പോലെ കരീനയെയും ബിഗ് ബജറ്റ് സനിമകളിലേക്ക് തിരഞ്ഞെടുത്തതിനു ശേഷം ഒഴിവാക്കിയിരുന്നു. എന്നാല്‍ കാരണങ്ങളില്ലാതെയായിരുന്നില്ല കരീനയെ പ്രമുഖ സംവിധായകര്‍ മാറ്റി നിര്‍ത്തിയത്. ബിഗ് ബജറ്റ് സിനിമകളില്‍ നടന്മാര്‍ക്ക് നല്‍കുന്നതുപോലെ തന്നെ തുല്യ വേതനം കരീനയും ആവശ്യപ്പെട്ടതിനു പിന്നാലെയായിരുന്നു താരത്തെ അവസാന നിമിഷം ബിഗ് ബജറ്റ് സിനിമകളില്‍ നിന്നും മാറ്റി നിര്‍ത്തിയത്.  

ബിഗ് ബജറ്റ് സിനിമകളില്‍ നിന്നും തന്നെ മാറ്റി നിര്‍ത്തിയ കാര്യം നടി തപ്‌സി പന്നു തന്നെയായിരുന്നു പ്രേക്ഷകരെ അറിയിച്ചത്. ചില ചിത്രങ്ങളില്‍ നായകനായി എത്തുന്ന നടന്മാര്‍ക്കൊപ്പം താന്‍ ഒരുമിച്ച് അഭിനയിക്കുന്നത് അവരുടെ ഭാര്യമാര്‍ക്ക് ഇഷ്ടപ്പെടാതെ വന്നാണ് അവസാന നിമിഷം സിനിമകളില്‍ നിന്നും മാറ്റി നിര്‍ത്തിയത് എന്നായിരുന്നു തപ്‌സി തുറന്നു പറഞ്ഞത്.