പോലീസുകാർക്ക് ഇവിടെ കാര്യമുണ്ട്; മലയാള സിനിമയിലെ പോലീസുകാർ

കിരീടം എന്ന ആദ്യ ചിത്രത്തിലൂടെ തന്നെ മലയാള സിനിമയില്‍ ശ്രദ്ധിക്കപ്പെട്ട നടനാണ് കീരിക്കാടന്‍ ജോസ്. പഠിക്കുന്ന സമയത്ത് തന്നെ പട്ടാളക്കാരനാവാനായിരുന്നു ആഗ്രഹം. തുടര്‍ന്ന് പഠിച്ച് പട്ടാളത്തില്‍ ജോലി ചെയ്യുകയും ചെയ്തിരുന്നു. എന്നാല്‍ ജോലിക്കിടെ പരിക്ക് പറ്റിയതിനെ തുടര്‍ന്ന സര്‍വ്വീസില്‍ നിന്നും മാറിനില്‍ക്കുകയായിരുന്നു. പിന്നീടായിരുന്നു എസ്.ഐ സെലക്ഷന്‍ കിട്ടുന്നത്. ഇതിനടിയിലായിരുന്നു എന്‍ഫോഴ്‌സ്‌മെന്റില്‍ ജോലി ലഭിക്കുന്നത്. എന്‍ഫോഴ്‌സ്‌മെന്റ് ഉദ്യാഗസ്ഥാനായി ജോലി ചെയ്യുന്നതിനിടയിലായിരുന്നു കിരീടത്തിലൂടെ മലയാള സിനിമയിലെത്തുന്നത്. ചിത്രം സൂപ്പര്‍ഹിറ്റായതോടെ മോഹന്‍രാജിന് കീരിക്കാടന്‍ ജോസ് എന്ന പേരു വീണു. എന്നാല്‍ കേന്ദ്ര സര്‍വ്വീസില്‍ ജോലി ചെയ്യുമ്പോള്‍ സിനിമയില്‍ അഭിനയിക്കണമെങ്കില്‍ സര്‍ക്കാറിന്റെ അനുവാദം വാങ്ങണമായിരുന്നു. അതൊന്നും ചെയ്യാതെ സിനിമയില്‍ അഭിനയിച്ചതിന് ജോസിന് സസ്‌പെന്‍ഷന്‍ കിട്ടുകയും ചെയ്തിരുന്നു. പിന്നീട് ഏറെ നാളത്തെ നിയമപോരാട്ടങ്ങള്‍ക്കൊടുവില്‍ 2010ലാണ് തിരികെ ജോലിക്ക് കയറുന്നത്. എന്നാല്‍ 2015ല്‍ ജോസ് ജോലി രാജിവെക്കുകയായിരുന്നു.

വില്ലന്‍ വേഷങ്ങളിലൂടെ ശ്രദ്ധിക്കപ്പെട്ട അബു സലീം ഒരു പോലീസ് ഓഫീസര്‍ കൂടിയായിരുന്നു. സബ് ഇന്‍സ്‌പെക്ടറായ അബു 2012ലാണ് ജോലിയില്‍ നിന്നും വിരമിച്ചത്. 1978ല്‍ പുറത്തിറങ്ങിയ രാജന്‍ പറഞ്ഞ കഥയിലൂടെ വെള്ളിത്തിരയിലെത്തിയ അബു ഇതുവരെയായി ഇരുനൂറോളം സിനിമകളില്‍ അഭിനയിച്ചിട്ടുണ്ട്. മലയാളത്തിന് പുറമെ ഹിന്ദി, തെലുങ്ക്, തമിഴ് ഭാഷകളിലും അബു സലീം അഭിനയിച്ചിട്ടുണ്ട്.  

മലയാള സിനിമയിലെ നായകനായി തിളങ്ങുന്നതിനു മുമ്പ് നിരവധി സര്‍ക്കാര്‍ സ്ഥാപനങ്ങളില്‍ ജോലി ചെയ്ത നടനാണ് സത്യന്‍. സ്‌ക്കൂള്‍ അദ്ധ്യാപകനായി ജോലി തുടങ്ങിയ സത്യന്‍ ഏതാണ്ട് ഒരു വര്‍ഷക്കാലം സെന്റ് ജോസഫ് സ്‌ക്കൂളില്‍ അദ്ധ്യാപകനായി ജോലി ചെയ്തിരുന്നു. തുടര്‍ന്ന് 1941ല്‍ സത്യന്‍ പട്ടാളത്തില്‍ ചേരുന്നു. ഏറെക്കാലത്തെ പട്ടാള സേവനത്തിനുശേഷമായിരുന്നു പോലീസ് സേനയുടെ ഭാഗമാകുന്നത്. ഇതിനിടയിലായിരുന്നു സിനിമയിലേക്കുള്ള എന്‍ട്രി. സിനിമയില്‍ ശ്രദ്ധിക്കപ്പെട്ടതോടെ സത്യന്‍ പോലീസ് ജോലി ഉപേക്ഷിച്ച് മലയാള സിനിമയില്‍ സജീവമാകുകയായിരുന്നു.  

നായനായി എത്തിയ ആദ്യ ചിത്രത്തിലൂടെ തന്നെ കഥാപാത്രത്തിന്റെ പേരില്‍ അറിയപ്പെട്ട നടനാണ് ഭീമന്‍ രഘു. എസ്.ഐ ആയി ജോലി ചെയ്യുന്നതിനിടെ നടന്‍ മധുവുമായുള്ള പരിചയമാണ് രഘുവിനെ സിനിമയിലെത്തിക്കുന്നത്. പിന്നാലെ നായകനായും പ്രതിനായകനായും നിരവധി സിനിമകളില്‍ അഭിനയിച്ചു. പ്രതിനായക വേഷങ്ങളിലൂടെ ഭീമന്‍ രഘു മലയാള സിനിമയില്‍ ശ്രദ്ധിക്കപ്പെടുന്നത്. നിലവില്‍ വില്ലന്‍ വേഷങ്ങളില്‍ നിന്നും മാറി ഹാസ്യ കഥാപാത്രങ്ങളാണ് കൂടുതലായും ചെയ്യുന്നത്.  

കേരള പോലീസില്‍ ഡി.വൈ.എസ്.പിയായി ജോലി ചെയ്ത നടനാണ് കെ.പി.എ.സി അസീസ്. 1973ല്‍ പുറത്തിറങ്ങിയ നീലക്കണ്ണുകള്‍ എന്ന ചിത്രത്തിലൂടെയായിരുന്നു അസീസ് സിനിമയിലെത്തുന്നത്. പിന്നാലെ വില്ലന്‍ വേഷങ്ങളിലൂടെ മലയാള സിനിമയില്‍ അസീസ് സജീവമാകുകയായിരുന്നു.