ചെലവ് ചുരുക്കിയതോ, അതോ നാണക്കേടോ; ബോളിവുഡിലെ രഹസ്യ വിവാഹങ്ങള്‍

2014ലായിരുന്നു ബോളിവുഡ് നടന്‍ ജോണ്‍ എബ്രഹാമിന്റെ വിവാഹം. ബിപാഷ ബസുവുമായുള്ള പ്രണയ തകര്‍ച്ചയ്ക്ക് ശേഷമായിരുന്നു ബാങ്ക് ഉദ്യാഗസ്ഥയായ പ്രിയ രുഞ്ചാലുമായുള്ള താരത്തിന്റെ വിവാഹം. വളരെ രഹസ്യമായി ലോസ് എഞ്ചലസില്‍ വച്ചായിരുന്നു ഇരുവരും വിവാഹിതരായത്. രണ്ട് വര്‍ഷത്തോളം ഡേറ്റിങ്ങിലായിരുന്ന ഇരുവരും ഇക്കാര്യം മാധ്യമങ്ങളില്‍ നിന്നും മറച്ചുവച്ചിരുന്നു.  

1991ലായിരുന്നു സെയ്ഫ് അലി ഖാനും അമൃത സിങ്ങും തമ്മിലുള്ള വിവാഹം. എന്നാല്‍ വിവാഹത്തിന് എതിര്‍പ്പുകള്‍ വന്നതോടെ ഇരുവരും രഹസ്യമായി വിവാഹം നടത്തിയെന്നാണ് വാര്‍ത്തകള്‍. അടുത്ത സഹൃത്തുക്കള്‍ മാത്രമായിരുന്നു വിവാഹത്തിന് സാക്ഷ്യം വഹിച്ചത്. എന്നാല്‍ നീണ്ട 13 വര്‍ഷത്തെ ദാമ്പത്യജീവിതം അവസാനിപ്പിച്ച് 2004ല്‍ അമൃതയും സെയ്ഫും വിവാഹമോചിതരായി. തുടര്‍ന്നായിരുന്നു കരീന കപൂറുമായുള്ള സെയ്ഫിന്റെ വിവാഹം.

രഹസ്യമായി വിവാഹം ചെയ്ത താരമാണ് ജൂഹി ചൗള. 1997ലായിരുന്നു വ്യവസായ പ്രമുഖനായ ജയ് മേത്തയുമായുള്ള ജൂഹിയുടെ വിവാഹം. വിവാഹം കരിയറിനെ ബാധിക്കുമോ എന്ന പേടി കൊണ്ടായിരുന്നു ജൂഹി വിവാഹക്കാര്യം മാധ്യമങ്ങളില്‍ നിന്നും മറച്ചു വച്ചത്. അതുകൊണ്ടുതന്നെ അടുത്ത സുഹൃത്തുക്കളും ബന്ധുക്കളും മാത്രമായിരുന്നു വിവാഹത്തിന് പങ്കെടുത്തത്. വര്‍ഷങ്ങള്‍ക്ക് ശേഷം ഒരു അഭിമുഖത്തിലായിരുന്നു താരം ഇക്കാര്യം വെളിപ്പെടുത്തിയത്.  

ബോളിവുഡ് നടി ശ്രീദേവിയുടേതും രഹസ്യ വിവാഹമായിരുന്നുവെന്നാണ് റിപ്പോര്‍ട്ടുകള്‍. ഏറെ നാളത്തെ പ്രണയത്തിനൊടുവില്‍ 1996ലായിരുന്നു നിര്‍മാതാവ് ബോണി കപൂറുമായുള്ള ശ്രീദേവിയുടെ വിവാഹം. എന്നാല്‍ ശ്രീദേവിയുമായി പ്രണയത്തിലാവുന്ന സമയത്ത് വിവാഹിതനായിരുന്നു ബോണി കപൂര്‍. താന്‍ ശ്രീദേവിയുമായി പ്രണയത്തിലാണെന്ന കാര്യം ഭാര്യ മോനാ ഷൂരിയോട് ബോണി കപൂര്‍ തുടക്കത്തില്‍ തന്നെ തുറന്നു പറയുകയും ചെയ്തിരുന്നു.    

ബോളിവുഡ് വിവാദ നായകന്‍ സഞ്ജയ് ദത്തിന്റെ വിവാഹവും രഹസ്യമായിരുന്നുവെന്നാണ് റിപ്പോര്‍ട്ടുകള്‍. അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തില്‍ വളരെ രഹസ്യമായിട്ടായിരുന്നു ബോളിവുഡിലെ ഐറ്റ ഡാന്‍സറായിരുന്ന മാന്യതെ താരം വിവാഹം ചെയ്തത്. എന്നാല്‍ വിവാഹത്തിനുമുമ്പ് തന്നെ ഏറെക്കാലം ഇരുവരും ഒന്നിച്ച് ജീവിച്ചിരുന്നു.