മാളികപ്പുറം സാമ്പിള്‍ മാത്രം, വമ്പന്‍ ചിത്രങ്ങളുമായി ഉണ്ണി മുകുന്ദന്‍

ഉണ്ണി മുകുന്ദനും അപര്‍ണ ബാലമുരളിയും പ്രധാന കഥാപാത്രങ്ങളായി എത്തുന്ന ചിത്രമാണ് മിണ്ടിയും പറഞ്ഞും. അരുണ്‍ ബോസ് സംവിധാനം ചെയ്ത ചിത്രത്തില്‍ സനല്‍ എന്ന കഥാപാത്രത്തെയാണ് ഉണ്ണി മുകുന്ദന്‍ അവതരിപ്പിക്കുന്നത്. ലീന എന്ന കഥാപാത്രത്തെയാണ് അപര്‍ണ അവതരിപ്പിക്കുന്നത്. ജാഫര്‍ ഇടുക്കി, മാല പാര്‍വതി, ജൂഡ് ആന്റണി, ഗീതി സംഗീത തുടങ്ങിയവരാണ് മറ്റു പ്രധാന താരങ്ങള്‍.  

വന്‍ ബജറ്റില്‍ ഒരുങ്ങുന്ന ഉണ്ണി മുകുന്ദന്‍ ചിത്രമാണ് ഗന്ധര്‍വ്വ ജൂനിയര്‍. അഞ്ച് ഭാഷകളിലായി എത്തുന്ന ചിത്രം സംവിധാനം ചെയ്തിരിക്കുന്നത് നവാഗതനായ വിഷ്ണു അരവിന്ദാണ്. ഒരു സൂപ്പര്‍ഹീറോ മോഡലിലാണ് ചിത്രം ഒരുങ്ങുന്നത്. ലിറ്റില്‍ ബിഗ് ഫിലിംസിന്റെ ബാനറില്‍ സുവിന്‍ കെ വര്‍ക്കിയും പ്രശോഭ് കൃഷ്ണയും ചേര്‍ന്നാണ് ചിത്രം നിര്‍മ്മിച്ചത്.  

പൃഥ്വിരാജ് ചിത്രം ചോക്ലേറ്റിന്റെ പുനരാവിഷ്‌ക്കാരമാണ് ചോക്ലേറ്റ് സ്‌റ്റോറി റീടോള്‍ഡ്. ഉണ്ണി മുകുന്ദനും ംനൂറിന്‍ ഷെരീഫുമാണ് ചിത്രത്തില്‍ പ്രധാന കഥാപാത്രങ്ങളായി എത്തുന്നത്. സേതു തിരക്കഥയെഴുതിയ ചിത്രം സംവിധാനം ചെയ്തിരിക്കുന്നത് ബിനു പീറ്റര്‍ ആണ്. പവിത്രം ക്രിയേഷന്‍സിന്റെ ബാനറില്‍ സന്തോഷ് പവിത്രം ആണ് ചിത്രം നിര്‍മ്മിച്ചത്.  

ഉണ്ണി മുകുന്ദന്‍, ഇന്ദ്രന്‍സ് എന്നിവരെ പ്രധാന കഥാപാത്രങ്ങളാക്കി നവാഗനായ വിയാന്‍ വിഷ്ണു സംവിധാനം ചെയ്ത ചിത്രമാണ് ഏക് ദിന്‍. കൊച്ചി, മുംബൈ എന്നിവിടങ്ങളിലായി 120 ദിവസം കൊണ്ടായിരുന്നു സിനിമയുടെ ചിത്രീകരണം പൂര്‍ത്തിയാക്കിയത്. ശ്രീകാന്ത് മുരളി, കോട്ടയം പ്രദീപ്, നന്ദന്‍ ഉണ്ണി എന്നിവര്‍ക്കൊപ്പം നിരവധി പുതുമുഖങ്ങളും ചിത്രത്തില്‍ അണിനിരക്കുന്നു.  

മല്ലു സിംഗ് എന്ന ചിത്രത്തിനുശേഷം ഉണ്ണി മുകുന്ദനെ നായകനാക്കി വൈശാഖ് സംവിധാനം ചെയ്ത ചിത്രമാണ് ബ്രൂസ് ലീ. ബിഗ് ബജറ്റിലൊരുക്കിയ ചിത്രം ഗോകുലം മൂവിസിന്റെ ബാനറിലല്‍ ഗോകുലം ഗോപാലനാണ് നിര്‍മ്മിച്ചത്.ആക്ഷന്‍ ചിത്രമായി ഒരുക്കിയ ചിത്രത്തിന്റെ തിരക്കഥ ഒരുക്കിയത് ഉദയ് കൃഷ്ണയാണ്.