കാവി മുണ്ട് മടക്കി കുത്തി ബിഗ് ബോസിലേക്ക്, ഒമര്‍ ലുലു ആര്‍ക്കൊപ്പം ?

2016ല്‍ പുറത്തിറങ്ങിയ ഹാപ്പി വെഡ്ഡിംഗ്‌ ആണ് ഒമറിന്റെ ആദ്യ സംവിധാന ചിത്രം. സൗബിന്‍ ഷാഹിര്‍, സിജു വിത്സന്‍ എന്നിവര്‍ പ്രധാന കഥാപാത്രങ്ങളായി എത്തിയ ചിത്രം 2016ലെ ബോക്‌സോഫീസ് ഹിറ്റുകളിലൊന്നു കൂടിയായിരുന്നു. 1.7 കോടി ബഡ്ജറ്റില്‍ ഒരുക്കിയ ചിത്രം തിയേറ്ററുകളില്‍ നിന്നും ഏതാണ്ട് 14.5 കോടി രൂപയാണ് നേടിയത്. ആദ്യ ചിത്രത്തിലൂടെ തന്നെ മലയാള സിനിമാരംഗത്ത് തന്റെതായ സ്ഥാനം ഉണ്ടാക്കിയെടുക്കാന്‍ ഒമറിന് കഴിഞ്ഞിരുന്നു. ഏതാണ്ട് 100 ദിവസത്തോളം ചിത്രം തിയേറ്ററുകളില്‍ പ്രദര്‍ശിപ്പിച്ചിരുന്നു. ചങ്ക്‌സ്, ഒരു അഡാര്‍ ലവ്, ദമാക്ക എന്നിവയാണ് ഒമറിന്റെ മറ്റു സംവിധാന ചിത്രങ്ങള്‍.  

2022 ഡിസംബര്‍ 30നായിരുന്നു ഇര്‍ഷാദ് അലിയെ നായകനാക്കി ഒമര്‍ സംവിധാനം ചെയ്ത നല്ല സമയം തിയേറ്ററുകളിലെത്തിയത്. എന്നാല്‍ നാല് ദിവസങ്ങള്‍ക്കു ശേഷം ചിത്രം തിയേറ്ററുകളില്‍ നിന്നും പിന്‍വലിക്കുകയായിരുന്നു. ചിത്രത്തിന്റെ ട്രെയിലറില്‍ ലഹരി വസ്തുക്കളുടെ ഉപയോഗം ഉള്‍പ്പെടുത്തിയതിനെ തുടര്‍ന്നായിരുന്നു എക്‌സൈസ് ഒമര്‍ ലുലുവിനെതിരെയും, നിര്‍മാതാവിനെതിരെയും കേസെടുത്തത്. എക്‌സൈസ് കോഴിക്കോട് റേഞ്ചാണ് അബ്കാരി, എന്‍.ഡി.പി.എസ് നിയമങ്ങള്‍ പ്രകാരം കേസെടുത്തത്. പിന്നാലെയായിരുന്നു ചിത്രം പിന്‍വലിച്ചത്. ഇതിനു പുറമെ നല്ല സമയത്തിന്റെ റിലീസ് ദിനത്തില്‍ ചിത്രത്തിലെ നായിക മയക്കു മരുന്ന് ഉപയോഗത്തെ അനുകൂലിക്കുന്ന തരത്തില്‍ പരാമര്‍ശങ്ങള്‍ നടത്തുകയും പിന്നീടത് വലിയ വിവാദങ്ങള്‍ക്ക് വഴിവെക്കുകയും ചെയ്തിരുന്നു.

സീസണ്‍ 5ന്റെ പ്രഖ്യാപനത്തിന് പിന്നാലെ സോഷ്യല്‍മീഡിയ പ്ലാറ്റ്‌ഫോമുകളില്‍ ഏറ്റവും കൂടുതല്‍ ഉയര്‍ന്നു വന്ന പേരായിരുന്നു ഒമര്‍ ലുലുവിന്റേത്. സീസണിന്റെ ആദ്യ എപ്പിസോഡില്‍ തന്നെ ഒമര്‍ ലുലു എത്തുമെന്നായിരുന്നു പ്രേക്ഷകര്‍ വിചാരിച്ചത്. എന്നാല്‍ സീസണ്‍ തുടങ്ങി മൂന്നാഴ്ച പിന്നിട്ടപ്പോഴായിരുന്നു വൈല്‍ഡ് കാര്‍ഡ് എന്‍ട്രിയായി ഒമര്‍ എത്തിയത്. 

മലയാളത്തിന്റെ ആക്ഷന്‍ കിംഗ് ബാബു ആന്റണിയെ നായകനാക്കി ഒരുക്കുന്ന പവര്‍ സ്റ്റാര്‍ ആണ് അണിയറയില്‍ ഒരുങ്ങുന്ന ഒമര്‍ ലുലു ചിത്രം. ആക്ഷന്‍ ത്രില്ലറായി ഒരുക്കിയ ചിത്രത്തില്‍ ഖാലിദ് ഭായ് എന്ന കഥാപാത്രത്തെയാണ് ബാബു ആന്റണി അവതരിപ്പിക്കുന്നത്. പ്രേക്ഷകര്‍ ആകാംക്ഷയോടെ കാത്തിരിക്കുന്ന ചിത്രം ക്രിസ്തുമസ് റിലീസായി എത്തുമെന്നാണ് റിപ്പോര്‍ട്ടുകള്‍.