തെലുങ്കന്മാരുടെ ദേവി ഷിജു, മലയാളത്തില്‍ ഷിജു എ ആര്‍; ബിഗ് ബോസിലൂടെ ഷിജുവിന് ഭാഗ്യം തെളിയുമോ ?

1995ല്‍ പുറത്തിറങ്ങിയ മഴവില്‍ക്കൂടാരം ആണ് ഷിജുവിന്റെ ആദ്യ സിനിമ. പിന്നീടങ്ങോട്ട് മലയാള സിനിമയില്‍ സജീവമായ ഷിജു 2004ല്‍ സിനിമയില്‍ നിന്നും ബ്രേക്ക് എടുക്കുകയും ടെലിവിഷന്‍ സീരിയലുകളില്‍ സജീവമാകുകയും ചെയ്തിരുന്നു. എന്നാല്‍ 2013ല്‍ എഴ് സുന്ദ രാത്രികള്‍ എന്ന ചിത്രത്തിലൂടെ വീണ്ടും മലയാള സിനിമകളില്‍ അഭിനയിച്ചു തുടങ്ങി.

സിനിമയില്‍ ശ്രദ്ധിക്കപ്പെടുന്ന വേഷങ്ങള്‍ ചെയ്യുന്നതിനിടയിലായിരുന്നു 2004ല്‍ ഷിജു സീരിയലുകളില്‍ അഭിനയിച്ചു തുടങ്ങിയത്. ഏഷ്യാനെറ്റില്‍ സംപ്രേഷണം ചെയ്ത ''സ്വന്തം'' എന്ന സീരിയലിലൂടെ ചുരുങ്ങിയ കാലയളവിനുള്ളില്‍ തന്നെ ടെലിവിഷന്‍ പ്രേക്ഷകരുടെ പ്രിയനടനായി മാറാന്‍ ഷിജുവിന് കഴിഞ്ഞിരുന്നു. പിന്നീട് എന്റെ മാനസപുത്രി, സൂര്യപുത്രി, കറുത്തമുത്ത്, ഓട്ടാഗ്രാഫ് തുടങ്ങി മലയാളത്തിലെ ജനപ്രിയ പരമ്പരകളിലെല്ലാം ഷിജു പ്രധാന കഥാപാത്രമായി എത്തി. 

സിനിമയും സീരിയലുകളുമായി മലയാളത്തില്‍ തിളങ്ങി നിന്നപ്പോഴും മറ്റു ഭാഷകളിലും ഷിജു ഭാഗ്യ പരീക്ഷണം നടത്തിയിരുന്നു. തമിഴ്, തെലുങ്ക്, ഇംഗ്ലീഷ്, ഒഡിയ ഭാഷകളിലായി ഇതിനോടകം ഏതാണ്ട് നാല്‍പ്പതിനടുത്ത് സിനിമകളില്‍ അഭിനയിച്ചിട്ടുണ്ട്. തെലുങ്കില്‍ ദേവി ഷിജു എന്ന പേരിലാണ് ഷിജു അറിയപ്പെടുന്നത്.

എറണാകുളം സെന്റ് ആല്‍ബര്‍ട്ടിസ് സ്‌ക്കുള്‍, തിരൂര്‍ എസ്.എസ്.എം പോളിടെക്‌നിക് കോളേജ് എന്നിവിടങ്ങളിലായിരുന്നു പഠനം. റഷീദ്, ആയിഷ എന്നിവരാണ് മാതാപിതാക്കള്‍. ക്ലാസിക്കല്‍ ഡാന്‍സറും കുവൈറ്റ് എയര്‍വേഴ്‌സിലെ എയര്‍ഹോസ്റ്റസുമായ പ്രീതി പ്രേം ആണ് ഷിജുവിന്റെ ഭാര്യ. ഇരുവര്‍ക്കും ഒരു മകളുണ്ട്. നിലവില്‍ കൊച്ചിയിലാണ് ഷിജുവിന്റെ കുടുംബം താമസിക്കുന്നത്.

ടെലിവിഷനിലെ പ്രിയതാരമായതുകൊണ്ടു തന്നെ ബിഗ് ബോസിലൂടെ വീണ്ടും പ്രേക്ഷകരെ കൈയിലെടുക്കാന്‍ ഷിജുവിന് സാധിക്കുമെന്നാണ് പ്രേക്ഷകര്‍ പറയുന്നത്. നിലവില്‍ അഖില്‍ മാരാര്‍ക്കൊപ്പമാണ് ബിഗ് ബോസില്‍ കൂടുതല്‍ സമയവും ഷിജു ചെലവഴിക്കുന്നത്. അതില്‍ നിന്നും മാറി കൂടുതല്‍ കരുത്തോടെ മത്സരബുദ്ധിയോടെ ഷിജു ബിഗ് ബോസില്‍ കളിക്കണമെന്നാണ് ആരാധകര്‍ പറയുന്നത്‌.