14 വര്‍ഷത്തിനുശേഷമുള്ള ഓസ്‌കാര്‍; ദ എലിഫന്റ് വിസ്പറേഴ്‌സിലൂടെ ഇന്ത്യയ്ക്കിത് ചരിത്ര നിമിഷം

മികച്ച ഡോക്യുമെന്ററി ഹ്രസ്വ ചിത്രത്തിനുള്ള ഓസ്‌കാര്‍ അവാര്‍ഡാണ് ദ എലിഫന്റ് വിസ്പറേഴ്‌സ് സ്വന്തമാക്കിയത്. ഇതാദ്യമായാണ് ഒരരു സമ്പൂര്‍ണ ഇന്ത്യന്‍ ചിത്രത്തിന് ഓസ്‌കാര്‍ പുരസ്‌ക്കാരം ലഭിക്കുന്നത്. കാര്‍ത്തികി ഗോണ്‍സാല്‍വ്‌സ് ആണ് ഹ്രസ്വചിത്രത്തിന്റെ സംവിധായിക. ഗുനീത് മോംഗയാണ് നിര്‍മാതാവ്. പ്രിസില്ല ഗോണ്‍സാല്‍വസാണ് ഹ്രസ്വ ചിത്രത്തിന്റെ കഥയ്ക്ക് പിന്നില്‍. കാര്‍ത്തികി ഗോണ്‍സാല്‍വാസും ഗുനീത് മോംഗയും ചേര്‍ന്നാണ് ഓസ്‌കാര്‍ പുരസ്‌കാരം ഏറ്റുവാങ്ങിയത്.

രഘു എന്ന ആരോരുമില്ലാത്ത ആനക്കുട്ടിയെ എടുത്തു വളര്‍ത്തുന്ന ബൊമ്മ-ബെല്ലി എന്ന ആദിവാസി ദമ്പതികളുടെ കഥയാണ് ഹ്രസ്വ ചിത്രം അവതരിപ്പിക്കുന്നത്. ബൊമ്മന്റെയും ബെല്ലിയുടേയും ജീവിതത്തിലൂടെ സഞ്ചരിക്കുന്ന ദ എലിഫന്റ് വിസ്പറേഴ്‌സിലെ ദൃശ്യങ്ങളും അതിമനോഹരമാണ്. തമിഴ് നാട്ടിലെ മുതുമലൈ ദേശീയ ഉദ്യാനത്തിലായിരുന്നു ഹ്രസ്വ ചിത്രത്തിന്റെ ഷൂട്ടിങ്ങ്.

14 വര്‍ഷത്തിന് ശേഷമാണ് ദ എലിഫന്റ് വിസ്പറേഴ്‌സിലൂടെ വീണ്ടും ഓസ്‌കാര്‍ ഇന്ത്യയിലെത്തുന്നത്. ഭാനു അത്തയ്യ, റസൂല്‍ പൂക്കുട്ടി, എ.ആര്‍ റഹ്മാന്‍, സത്യജിത് റേ, ഗുല്‍സാര്‍ തുടങ്ങി അഞ്ച് ഇന്ത്യക്കാര്‍ക്കാണ് ഇതുവരെയായി ഓസ്‌കാര്‍ പുരസ്‌ക്കാരം ലഭിച്ചിട്ടുള്ളത്. സ്ലം ഡോഗ് മില്യണയറിലൂടെ മികച്ച ഒറിജിനല്‍ ഗാനത്തിനും മികച്ച ഒറിജിനല്‍ സ്‌കോറിനും എ.ആര്‍ റഹ്മാന് രണ്ട് അവാര്‍ഡുകള്‍ ലഭിച്ചിട്ടുണ്ട്.

2022 ഡിസംബറിലാണ് നെറ്റ്ഫ്‌ളിക്‌സിലൂടെ ദി എലിഫന്റ് വിസ്പറേഴ്‌സ് പ്രേക്ഷകരിലേക്ക് എത്തിയത്. ഓസ്‌കാര്‍ നേട്ടത്തിനു പിന്നാലെ ഹ്രസ്വ ചിത്രത്തിലെ പ്രധാന താരങ്ങളായ ബൊമ്മനെയും ബെല്ലിയെയും നെറ്റ്ഫ്‌ളിക്‌സ് അഭിനന്ദിച്ചിരുന്നു. കാട്ടില്‍ ഉപേക്ഷിക്കപ്പെടുന്ന ആനക്കുട്ടികള്‍ക്കായി ജീവിതം മാറ്റിവെച്ച ''ബൊമ്മന്‍, ബെല്ലിയുമാണ് യഥാര്‍ത്ഥ താരങ്ങളെന്നായിരുന്നു'' നെറ്റ്ഫ്‌ളിക്‌സ് ഇന്ത്യ ട്വീറ്റ് ചെയ്തത്‌.