ആനയേക്കാൾ വലിയ പാപ്പാൻ;, ഷാരൂഖിന്റെ മാനേജര്‍ പൂജ ദദ്‌ലാനിയുടെ വാര്‍ഷിക വരുമാനം 8 കോടി!

ബാന്ദ്രയില്‍ കോടികള്‍ വിലയുള്ള വീട് വാങ്ങിതോടെയാണ് പൂജയുടെ ശമ്പളം സോഷ്യല്‍മീഡിയയില്‍ ചര്‍ച്ചയായത്. മുംബൈയിലെ പോഷ് ഏരിയയില്‍ മോബളിവുഡ് താരങ്ങള്‍ വാങ്ങുന്നതുപോലെ വീട് വാങ്ങണമെങ്കില്‍ മാസം പൂജയ്ക്ക് ലക്ഷങ്ങള്‍ ശമ്പളമായി ലഭിക്കുന്നുണ്ടെന്നാണ് സോഷ്യല്‍മീഡിയയുടെ കണ്ടെത്തല്‍. ഷാരൂഖിന്റെ ഭാര്യ ഗൗരി ഖാനൊപ്പം പുതിയ വീട്ടില്‍ ഇരിക്കുന്ന ചിത്രങ്ങള്‍ പൂജ തന്നെയായിരുന്നു സോഷ്യല്‍മീഡിയയിലൂടെ പങ്കുവെച്ചത്.  

ഷാരൂഖ് ഖാന്റെ മാനേജറായി 2012 മുതലാണ് പൂജ ജോലി ചെയ്തു തുടങ്ങുന്നത്. കിംഗ് ഖാന്റെ കുടുംബവുമായി അടുത്ത ബന്ധമാണ് പൂജയ്ക്കുള്ളത്. വിദേശ യാത്രകള്‍ പോവുമ്പോഴും സിനിമാ ഷൂട്ടിങ്ങുകള്‍ക്ക് പോവുമ്പോഴും തുടങ്ങി ഷാരൂഖിന്റെ ഒഫീഷ്യല്‍ പരിപാടികള്‍ക്കെല്ലാം ഒരു നിഴലായി  പൂജ ഉണ്ടാവാറുണ്ട്. ഷാരൂഖിന്റെ റെഡ് ചില്ലീസ് എന്റര്‍ടെയ്ന്‍മെന്റിലായിരുന്നു പൂജ ആദ്യം ജോലി ചെയ്തിരുന്നത്. പിന്നീട് പ്രൊഡക്ഷന്‍ ടീമിലേക്ക് മാറുകയായിരുന്നു. തുടര്‍ന്നായിരുന്നു ഷാരൂഖിന്റെ വിശ്വസ്തയായ മാനേജറായി പൂജ മാറുന്നത്. ഇന്ന് കിംഗ് ഖാന്റെ ബിസിനസുകളെല്ലാം നോക്കിനടത്തുന്നത് പൂജയാണ്.

ഷാരൂഖ് ഖാന്റെ മകന്‍ ആര്യന്‍ ഖാന്റെ മയക്കു മരുന്ന് കേസില്‍ പൂജ ദദ്‌ലാനി നടത്തിയ ഇടപെടലുകള്‍ മാധ്യമശ്രദ്ധ പിടിച്ചു പറ്റിയിരുന്നു. 2021ലായിരുന്നു മുംബൈ കടല്‍ത്തീരത്തുണ്ടായിരുന്ന ക്രൂയിസ് കപ്പലില്‍ എന്‍സിബി റെയ്ഡ് നടത്തിയതും കൊക്കെയിന്‍ അടക്കമുള്ള മയക്കു മരുന്നുകള്‍ പിടികൂടിയതും. പിന്നാലെയായിരുന്നു കപ്പലിലുണ്ടായിരുന്ന ആര്യന്‍ ഖാനെയും സുഹൃത്തുക്കളെയും മയക്കു മരുന്ന് കേസില്‍ എന്‍സിബി അറസ്റ്റ് ചെയ്തത്. അന്ന് ഷാരൂഖിനും കുടുംബത്തിനും ഒപ്പം നില്‍ക്കുകയും ആര്യന്‍ ഖാനെ പുറത്തെത്തിക്കാന്‍ സജീവമായി ഇടപെടുകയും ചെയ്തിരുന്നു പൂജ.

പുറത്ത് വരുന്ന റിപ്പോര്‍ട്ടുകള്‍ പ്രകാരം വര്‍ഷം 7-8 കോടിക്കടുത്താണ് പൂജയുടെ വരുമാനം. ഏതാണ്ട് 50 കോടിക്കടുത്താണ് പൂജയുടെ ആകെ ആസ്തി. എന്നാല്‍ പുറത്ത് വരുന്ന റിപ്പോര്‍ട്ടുകളെക്കാള്‍ കൂടുതലാണ് പൂജയുടെ വാര്‍ഷിക വരുമാനമെന്നാണ് സോഷ്യല്‍മീഡിയ പറയുന്നത്.

ഷാരൂഖ് ഖാന്റെ ബോഡി ഗാര്‍ഡായ രവി സിങ്ങിന്റെ വാര്‍ഷിക വരുമാനം 2-3 കോടിയാണെന്നാണ് റിപ്പോര്‍ട്ടുകള്‍. ഷാരൂഖിന് പുറമെ താരത്തിന്റെ മക്കളുടെ സുരക്ഷയും നോക്കുന്നത് രവിയാണ്. ബോളിവുഡില്‍ ഏറ്റവും കൂടുതല്‍ പ്രതിഫലം വാങ്ങുന്ന ബോഡി ഗാര്‍ഡില്‍ ഒരാളാണ് രവി സിങ്.