ലാലേട്ടന്‍റെ വഴിയേ മമ്മൂക്കയും...; ഈ മമ്മൂട്ടി ചിത്രങ്ങള്‍ റീ റിലീസ് ചെയ്താല്‍ ജനം ഇരമ്പിയെത്തും

മമ്മൂട്ടിയുടെ എക്കാലത്തെയും മികച്ച അച്ചായന്‍ കഥാപാത്രങ്ങളിലൊന്നായിരുന്നു കോട്ടയം കുഞ്ഞച്ചനിലെ കുഞ്ഞച്ചായന്‍. അന്നുവരെയുണ്ടായിരുന്നു സകല കളക്ഷന്‍ റെക്കോഡുകളും തിരുത്തിക്കുറിച്ച ചിത്രം ടി.എസ് സുരേഷ് ബാബുവായിരുന്നു സംവിധാനം ചെയ്തത്. പഞ്ചു ഡയലോഗുകളും അടിയും പ്രേമവുമെല്ലാം നിറഞ്ഞ ചിത്രം ഇന്നും മലയാളികളുടെ പ്രിയപ്പെട്ട സിനിമകളിലൊന്നാണ്. ചിത്രത്തിന്റെ രണ്ടാഭാഗം അടുത്തിടെ പ്രഖ്യാപിച്ചിരുന്നു. ആട് ടുവിന്റെ സംവിധായകന്‍ മിഥുന്‍ മാനുവല്‍ തോമസായിരുന്നു ചിത്രത്തിന്റെ രണ്ടാംഭാഗം പ്രഖ്യാപിച്ചത്.  

ഇന്നും മമ്മൂട്ടിയുടെ കരിയറിലെ മികച്ച സിനിമകളിലൊന്നാണ് 1989ല്‍ പുറത്തിറങ്ങിയ വാറുണ്ണി. വിഎഫ്എക്‌സും ഗ്രാഫിക്‌സുമൊന്നുമില്ലാതിരുന്ന കാലത്ത് യാതൊരു തരത്തിലുമുള്ള പരിശീലനവുമില്ലാതെയായിരുന്നു മമ്മൂട്ടി പുലിയുമായുള്ള സംഘട്ടനം ചെയ്തത്. വര്‍ഷങ്ങള്‍ക്കു ശേഷം സംവിധായകന്‍ ഐ.വി ശശിയായിരുന്നു ഇക്കാര്യം തുറന്നു പറഞ്ഞത്. വേട്ടക്കാരന്‍ വാറുണ്ണിയായി മമ്മൂട്ടി ഒരിക്കല്‍ക്കൂടി തിയേറ്ററുകളിലെത്തണമെന്നാണ് ആരാധകര്‍ പറയുന്നത്.  

മമ്മൂട്ടിയുടെ കരിയറിലെ കരുത്തുറ്റ പോലീസ് കഥാപാത്രങ്ങളിലൊന്നാണ് ആവനാഴിയിലെ ബല്‍റാം. കിടിലന്‍ ആക്ഷന്‍ രംഗങ്ങളും തീപ്പൊരി ഡയലോഗുകളും നിറഞ്ഞ സിനിമ 1986ലെ ഏറ്റവും വലിയ ഹിറ്റുകളിലൊന്നു കൂടിയാണ്. ഐ.വി ശശി-ടി ദാമോദരന്‍ കൂട്ടുക്കെട്ടില്‍ പുറത്തിറങ്ങിയ ചിത്രം മലയാളത്തിലെ എക്കാലത്തെയും മികച്ച പോലീസ്-പൊളിറ്റിക്കല്‍ ത്രില്ലറുകളിലൊന്നു കൂടിയാണ്.  

വേഷ പകര്‍ച്ചയിലൂടെ പ്രേക്ഷകരെ ഒന്നടങ്കം ഞെട്ടിച്ച മമ്മൂട്ടി ചിത്രമായിരുന്നു വിധേയന്‍. ഭാസ്‌ക്കര പട്ടേലര്‍ എന്ന നെഗറ്റീവ് കഥാപാത്രമായി മമ്മൂട്ടി നിറഞ്ഞാടിയ ചിത്രം വര്‍ഷങ്ങള്‍ക്കിപ്പുറവും മലയാളികളുടെ പ്രിയ ചിത്രങ്ങളിലൊന്നാണ്. അടൂര്‍ ഗോപാലകൃഷ്ണന്‍ തിരക്കഥയെഴുതി സംവിധാനം ചെയ്ത ചിത്രത്തിലൂടെ 1994ലെ മികച്ച നടനുള്ള ദേശീയ പുരസ്‌ക്കാരവും മമ്മൂട്ടിക്ക് ലഭിച്ചിരുന്നു.  

മലയാള സിനിമയുടെ ചരിത്രത്തില്‍ ഇടംപിടിച്ച മമ്മൂട്ടി ചിത്രമാണ് 1991ല്‍ പുറത്തിറങ്ങിയ അമരം. മുക്കുവരുടെയും അരയമന്മാരുടെയും ജീവിതകഥ പറഞ്ഞ ചിത്രം മമ്മൂട്ടി എന്ന നടന്റെ കരിയറിലെ ഏറ്റവും മികച്ച ചിത്രങ്ങളിലൊന്നു കൂടിയാണ്. സംസ്ഥാന-ദേശീയ പുരസ്‌ക്കാരങ്ങള്‍ ലഭിച്ച ചിത്രം വാണിജ്യാടിസ്ഥാനത്തിലും മികച്ച വിജയമായിരുന്നു നേടിയത്.