ഇവിടെ ഏത് പാട്ടും ഡബിള്‍ ഓക്കെ ; സിതാര കൃഷ്ണകുമാറിന്റെ സൂപ്പര്‍ഹിറ്റുകള്‍

മലയാളത്തിലെ ആദ്യത്തെ നിശ്ശബ്ദ ചലച്ചിത്രമായ വിഗതകുമാരന്റെ സംവിധായകന്‍ ജെ.സി ദാനിയേലിന്റെ ജീവിതകഥയെ ആസ്പദമാക്കി കമൽ സംവിധാനം ചെയ്ത ചിത്രമായിരുന്നു സെല്ലുലോയ്ഡ്‌. മികച്ച ചിത്രത്തിനേതുൾപ്പെടെ 2012-ലെ ഏഴ് കേരളസംസ്ഥാന ചലച്ചിത്രപുരസ്കാരങ്ങൾ ചിത്രത്തിനു ലഭിച്ചിരുന്നു.  ചിത്രത്തിലെ 'ഏനുണ്ടോടി' എന്നു തുടങ്ങുന്ന ഗാനത്തിലൂടെയാണ് ആ വര്‍ഷത്തെ മികച്ച ഗായികയ്ക്കുള്ള സംസ്ഥാന ചലച്ചിത്ര അവാര്‍ഡ് സിതാരയ്ക്ക് ലഭിച്ചത്.‌

നിവിന്‍ പോളി, രഞ്ജി പണിക്കര്‍ എന്നിവരെ പ്രധാന കഥാപാത്രങ്ങളാക്കി വിനീത് ശ്രീനിവാസന്‍ സംവിധാനം ചെയ്ത ചിത്രമായിരുന്നു ജേക്കബിന്റെ സ്വര്‍ഗ്ഗരാജ്യം. ചിത്രത്തിലെ 'തിരുവാവണിരാവ്' എന്നു തുടങ്ങുന്ന ഗാനം ഉണ്ണി മേനോനും സിതാരയും ചേര്‍ന്നാണ് ആലപിച്ചിരിക്കുന്നത്. മനു മഞ്ജിത്ത് എഴുതിയ വരികൾക്ക് ഷാൻ റഹ്മാൻ ആണ് സംഗീത സംവിധാനം നിർവ്വഹിച്ചിരിക്കുന്നത്.   

സിതാര കൃഷ്ണകുമാറിന്റെ മറ്റൊരു സൂപ്പര്‍ഹിറ്റ് ഗാനമാണ് മധുരരാജയിലെ 'മോഹമുന്തിരി വാറ്റിയ രാവ്'. ബി കെ ഹരിനാരായണന്റെ വരികള്‍ക്ക് ഗോപി സുന്ദര്‍ ഈണമിട്ട ഈ ഗാനം റിലീസ് ചെയ്ത് ദിവസങ്ങള്‍ക്കുള്ളില്‍ തന്നെ സോഷ്യല്‍മീഡിയയില്‍ വൈറലായിരുന്നു.  

2019ല്‍ പുറത്തിറങ്ങിയ കുമ്പളങ്ങി നൈറ്റ്‌സ് എന്ന ചിത്രത്തിലെ 'ചെരാതുകള്‍' എന്നു തുടങ്ങുന്ന ഗാനം സിതാരയുടെ മറ്റൊരു സൂപ്പര്‍ഹിറ്റാണ്. മലയാള സിനിമയ്ക്ക് ഒരുപിടി മികച്ച ഗാനങ്ങള്‍ സമ്മാനിച്ച 2019ലെ ഹിറ്റ് ചാര്‍ട്ടുകളില്‍ ഈ ഗാനവും ഇടംപിടിച്ചിരുന്നു.  

ദേശീയപുരസ്‌ക്കാര ജേതാവായ മുഹമ്മദ് മുസ്തഫയുടെ ആദ്യ സംവിധാന ചിത്രമായിരുന്നു 2020ല്‍ പുറത്തിറങ്ങിയ കപ്പേള. നാട്ടിന്‍പുറത്തെ ഒരു പ്രണയകഥയില്‍ തുടങ്ങി പിന്നീട് അപ്രതീക്ഷിതമായ ട്വിസ്റ്റുകളിലൂടെ കഥ പറഞ്ഞ ചിത്രത്തിലെ ഗാനങ്ങളുടെ ഏറെ ശ്രദ്ധിക്കപ്പെട്ടിരുന്നു. സുഷിന്‍ ശ്യാമിന്റെ സംഗീതത്തില്‍ സിത്താര പാടിയ കടുകുമണിക്കൊരു കണ്ണുണ്ട് എന്നു തുടങ്ങുന്ന ചിത്രത്തിലെ ഗാനം ഈ വര്‍ഷത്തെ സൂപ്പര്‍ഹിറ്റ് ഗാനങ്ങളിലൊന്നാണ്‌.