സ്റ്റാർ മാജിക് കാരണം ജീവിതം പച്ചപിടിച്ചവർ; ഇന്ന് സിനിമാ താരങ്ങള്‍ പോലും ഇവർക്ക് പിന്നില്‍

സ്റ്റാര്‍ മാജിക് എന്ന ഒരൊറ്റ പരിപാടിയിലൂടെ മിനിസ്‌ക്രീന്‍ പ്രേക്ഷകര്‍ക്കിടയില്‍ ശ്രദ്ധിക്കപ്പെട്ട നടിയാണ് ശ്രീവിദ്യ മുല്ലച്ചേരി. 2016ല്‍ പുറത്തിറങ്ങിയ ക്യാംപസ് ഡയറിയായിരുന്നു ശ്രീവിദ്യയുടെ ആദ്യ സിനിമ. പിന്നീട് 2018ല്‍ ഒരു കുട്ടനാടന്‍ ബ്ലോഗ്, ഒരു പഴയ ബോംബ് കഥ എന്നീ ചിത്രങ്ങളിലും അഭിനയിച്ചു. എന്നാല്‍ 2020ല്‍ സ്റ്റാര്‍ മാജിക്കില്‍ പങ്കെടുത്തതോടെയായിരുന്നു ശ്രീവിദ്യ സോഷ്യല്‍മീഡിയയില്‍ ശ്രദ്ധിക്കപ്പെട്ടു തുടങ്ങിയത്. നിലവില്‍ സിനിമകളും സ്റ്റാര്‍ മാജിക്കും യുട്യൂബ് ചാനലുമായി തിരക്കിലാണ് താരം.

മറിയേടമ്മേടെ ആട്ടിന്‍കുട്ടി എന്ന ഒരൊറ്റ പാട്ടിലൂടെ മിനിസ്‌ക്രീന്‍ പ്രേക്ഷകരുടെ ഹൃദയത്തില്‍ ഇടം നേടിയ കലാകാരനാണ് തങ്കച്ചന്‍ വിതുര. മഴവില്‍ മനോരമയില്‍ സംപ്രേഷണം ചെയ്ത കോമഡി ഫെസ്റ്റിവല്‍ പരിപാടിയിലൂടെയായിരുന്നു തങ്കച്ചന്‍ മിനിസ്‌ക്രീനിലെത്തുന്നത്. പിന്നീട് പരോള്‍, കുട്ടനാടന്‍ ബ്ലോഗ് എന്നീ ചിത്രങ്ങളിലൂടെ സിനിമയിലുമെത്തി. എന്നാല്‍ സ്റ്റാര്‍ മാജിക്കില്‍ പങ്കെടുത്തതോടെയാണ് തങ്കച്ചന്‍ പ്രേക്ഷകര്‍ക്കിടയില്‍ ശ്രദ്ധിക്കപ്പെട്ടത്. നിലവില്‍ സിനിമകളും സ്‌റ്റേജ് പരിപാടികളുമായി തിരക്കിലാണ് താരം.  

ടെലിവിഷന്‍ അവതാരകയായി കരിയര്‍ ആരംഭിച്ച ഡയാന ഹമീദ് ഇന്ന് മിനിസ്‌ക്രീനിലെ മിന്നും താരമാണ്. ടോം ഇമ്മട്ടി സംവിധാനം ചെയ്ത ദി ഗാംബ്ലര്‍ എന്ന ചിത്രത്തിലൂടെയായിരുന്നു ഡയാന സിനിമയിലെത്തുന്നത്. പിന്നീട് ചെറുതും വലുതുമായി നിരവധി സിസനിമകളില്‍ അഭിനയിച്ച താരം സിനിമക്കൊപ്പം തന്നെ ടെലിവിഷന്‍ രംഗത്തും സജീവമായിരുന്നു. സ്റ്റാര്‍ മാജിക്കില്‍ എത്തിയതോടെയായിരുന്നു ഡയാന പ്രേക്ഷകര്‍ക്കിടയില്‍ കൂടുതല്‍ ശ്രദ്ധിക്കപ്പെട്ടത്. നിലവില്‍ സിനിമകളുടെ തിരക്കിലാണ് ഡയാന.  

മിനിസ്‌ക്രീന്‍ പ്രേക്ഷകരുടെ പ്രിയപ്പെട്ട അവതാരകയാണ് ലക്ഷ്മി നക്ഷത്ര. 2007ല്‍ റെഡ് എഫ്.എമ്മില്‍ റേഡിയോ ജോക്കിയായി ജോലി ആരംഭിച്ച ലക്ഷ്മി സ്റ്റാര്‍ മാജിക് അവതാരകയായി എത്തിയതോടെയായിരുന്നു ശ്രദ്ധിക്കപ്പെട്ടത്. കേരളത്തിന് അകത്തും പുറത്തും ലക്ഷക്കണക്കിന് ആരാധകരുള്ള ലക്ഷ്മി സോഷ്യല്‍മീഡിയകളിലും സജീവമാണ്. നിലവില്‍ സ്റ്റാര്‍ മാജിക്കും, യുട്യൂബ് ചാനലുമായി തിരക്കിലാണ് താരം.  

സ്റ്റാര്‍ മാജിക്കിലൂടെ ലക്ഷക്കണക്കിന് ആരാധകരെ നേടിയെടുത്ത മറ്റൊരു താരമാണ് അനുമോള്‍. വര്‍ഷങ്ങളായി മിനിസ്‌ക്രീന്‍ രംഗത്ത് പ്രവര്‍ത്തിക്കുന്ന അനു അവതാരകയായിട്ടാണ് കരിയര്‍ ആരംഭിക്കുന്നത്. തുടര്‍ന്ന് 2014ല്‍ മഴവില്‍ മനോരമയില്‍ സംപ്രേഷണം ചെയ്ത അനിയത്തി എന്ന സീരിയലിലൂടെ അഭിനയരംഗത്തേക്ക് കടന്നു. തുടര്‍ന്ന് നിരവധി സീരിയലുകളുടെ ഭാഗമായെങ്കിലും സ്റ്റാര്‍ മാജിക്കില്‍ പങ്കെടുത്തതോടെയാണ് അനു ശ്രദ്ധിക്കപ്പെട്ടു തുടങ്ങിയത്.