ಖುಷಿ ಟು ಅಂತರಪಟ: ಬಿಗ್‌ಬಾಸ್‌ ಸ್ಫರ್ಧಿ ಕಾರ್ತಿಕ್ ಮಹೇಶ್ ನಟನೆಯ ಸೀರಿಯಲ್‌ಗಳ ಪಟ್ಟಿ ಇಲ್ಲಿದೆ.

ಮಾಡೆಲಿಂಗ್ ಮೂಲಕ ವೃತ್ತಿ ಜೀವನ ಆರಂಭಿಸಿದ ಕಾರ್ತಿಕ್‌ ಮಹೇಶ್ ಅವರಿಗೆ, ಬಾಲ್ಯದಿಂದಲೂ ನಟನೆ ಮಾಡುವ ಕನಸಿತ್ತಂತೆ. ನಟನಾಗುವ ಕನಸು ಹೊತ್ತಿದ್ದ ಇವರು ಆಗಾಗ ಬೆಂಗಳೂರಿಗೆ ಬಂದು ಸೀರಿಯಲ್‌ಗಳಿಗೆ ಆಡಿಶನ್‌ಗಳನ್ನು ಕೊಡುತ್ತಿದ್ದರು. ಕೊನೆಗೆ 'ಖುಷಿ' ಸೀರಿಯಲ್ ಮೂಲಕ ನಾಯಕನಾಗಿ ಕಿರುತೆರೆ ಲೋಕಕ್ಕೆ ಕಾಲಿಟ್ಟರು. ಈ ಧಾರಾವಾಹಿಯಲ್ಲಿ ಕಾರ್ತಿಕ್‌ಗೆ ದಿವ್ಯಾ ಉರುಡುಗ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು. 

2013ರಲ್ಲಿ ಪ್ರಸಾರವಾಗಿದ್ದ ಕನ್ನಡ ಕಿರುತೆರೆ ಸೂಪರ್ ಹಿಟ್ ಧಾರಾವಾಹಿ 'ಅಕ್ಕ'ದಲ್ಲಿ ಕಾರ್ತಿಕ್ ಅವರು 'ಆಕಾಶ್' ಎಂಬ ಪಾತ್ರ ಮಾಡಿದ್ದರು. ಈ ಸೀರಿಯಲ್‌ನಲ್ಲಿ ಅನುಪಮಾ ಗೌಡ ಡಬಲ್ ರೋಲ್‌ನಲ್ಲಿ ಕಾಣಿಸಿಕೊಂಡಿದ್ದರು. ಇದೊಂದು ಅವಳಿ-ಜವಳಿ ಹೆಣ್ಣುಮಕ್ಕಳ ಕಥೆಯಾಗಿತ್ತು. 

ನಂತರ 2019ರಲ್ಲಿ 'ಇಂತಿ ನಿಮ್ಮ ಆಶಾ' ಧಾರಾವಾಹಿಯಲ್ಲಿ ನಟಿಸಿದರು. ಆಶಾ ಎಂಬ ಗಟ್ಟಿಗಿತ್ತಿ ಹೆಣ್ಣಿನ ಕಥೆ ಹೊಂದಿದ್ದ ಈ ಧಾರಾವಾಹಿಯಲ್ಲಿ ಸಂಗೀತಾ ಅನಿಲ್ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿದ್ದರು. ಅಪ್ಪ-ಅಮ್ಮನ ಜೊತೆಗೆ ಮಕ್ಕಳ ಕಥೆ ಹೊಂದಿದ್ದ ಈ ಸೀರಿಯಲ್‌ನಲ್ಲಿ ಕಾರ್ತಿಕ್, ಸಮರ್ಥ್ ಎಂಬ ಪಾತ್ರದ ಮೂಲಕ ಗಮನ ಸೆಳೆದಿದ್ದರು.

2018ರಲ್ಲಿ ವಾರಾಂತ್ಯದಲ್ಲಿ ಪ್ರಸಾರವಾಗುತ್ತಿದ್ದ ಶನಿ ಧಾರಾವಾಹಿಯಲ್ಲಿ ನಾರಾಯಣನ ಪಾತ್ರದಲ್ಲಿ ನಟಿಸಿದರು. ಜೊತೆಗೆ ಮಹಾಕಾಳಿ ಸೀರಿಯಲ್‌ನಲ್ಲೂ ಪೋಷಕ ಪಾತ್ರದಲ್ಲಿ ಅಭಿನಯಿಸುವ ಮೂಲಕ ಗಮನ ಸೆಳೆದಿದ್ದರು.

ಆನಂತರ ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾದ 'ರಾಜಿ' ಧಾರಾವಾಹಿಯಲ್ಲಿ ನಾಯಕ 'ಕರ್ಣ'ನಾಗಿ ಅಭಿನಯಿಸಿದರು. ಕರ್ಣ ಮತ್ತು ರಾಜಿ ಬಾಲ್ಯದ ಸ್ನೇಹಿತರು. ಕರ್ಣನಿಗೆ ಇದು ಸ್ನೇಹವಾಗಿದ್ದರೂ ರಾಜಿಗೆ ಕರ್ಣನ ಮೇಲೆ ಅದಕ್ಕೂ ಮಿಗಿಲಾದ ಬಂಧವಿರುತ್ತೆ. ಇವರಿಬ್ಬರ ಸ್ನೇಹ ಪ್ರೀತಿಯಾಗಿ ಬದಲಾಗುತ್ತಾ? ಎಂಬು ಈ ಧಾರಾವಾಹಿಯ ಕಥೆಯಾಗಿತ್ತು.

ನಂತರ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಪುಟ್ಟಕ್ಕನ ಮಕ್ಕಳು ಧಾರಾವಾಹಿಯಲ್ಲಿ ವಕೀಲ ಚಂದ್ರು ಪಾತ್ರಕ್ಕೆ ಕಾರ್ತಿಕ್ ಬಣ್ಣ ಹಚ್ಚಿದ್ದರು. ಆದರೆ, ಸಮಯದ ಕಾರಣದಿಂದಾಗಿ ಈ ಸೀರಿಯಲ್‌ನಿಂದ ಅರ್ಥಕ್ಕೆ ಹೊರಬಂದಿದ್ದರು. 

ಬಿಗ್‌ಬಾಸ್‌ಗೂ ತೆರಳುವುದಕ್ಕೂ ಕೆಲ ತಿಂಗಳ ಹಿಂದೆ ಕಾರ್ತಿಕ್, ಕಲರ್ಸ್ ಕನ್ನಡದಲ್ಲಿ ಪ್ರಸಾರವಾಗುತ್ತಿರುವ 'ಅಂತರಪಟ' ಸೀರಿಯಲ್‌ನಲ್ಲಿ ನಾಯಕಿ ಆರಾಧನಾಳನ್ನು ಪ್ರೀತಿಸುತ್ತಿರುವ, ಆಕೆಯ ಕನಸನ್ನು ಈಡೇರಿಸಲು ತನ್ನ ಆಸ್ತಿಯನ್ನೇ ಒತ್ತೆ ಇಡುವ ಸ್ನೇಹಿತ ರವಿಯ ಪಾತ್ರವನ್ನು ಕಾರ್ತಿಕ್ ನಿಭಾಯಿಸಿದ್ದರು. 

ಕಾರ್ತಿಕ್ ಖುಷಿ ಧಾರವಾಹಿಯಲ್ಲಿ ನಟಿಸುವಾಗ ಸುನೀಲ್ ಪುರಾಣಿಕ್ ಇವರ ತಂದೆಯ ಪಾತ್ರದಲ್ಲಿ ನಟಿಸಿದ್ದರಂತೆ. ನಂತರ ಅವರ ಪುತ್ರ ಸಾಗರ್ ಪುರಾಣಿಕ್ ತಮ್ಮ ನಿರ್ದೇಶನದ 'ಡೊಳ್ಳು' ಸಿನಿಮಾದ ನಾಯಕನಾಗಿ ಇವರನ್ನು ಆಯ್ಕೆ ಮಾಡಿದ್ದರು. ಡೊಳ್ಳು ಚಿತ್ರಕ್ಕಾಗಿ ಕಾರ್ತಿಕ್ ಸ್ವತಃ ಡೊಳ್ಳು ಬಡಿಯೋದನ್ನು ಕಲಿತು ಅದ್ಭುತವಾಗಿ ಅಭಿನಯಿಸಿದ್ದರು. ಕಾರ್ತಿಕ್ ನಾಯಕನಾಗಿ ನಟಿಸದ ಮೊದಲ ಚಿತ್ರವೇ 2022ರಲ್ಲಿ ಜರುಗಿದ 68ನೇ ಸಾಲಿನ ಅತ್ಯುತ್ತಮ ಕನ್ನಡ ಪ್ರಾದೇಶಿಕ ಪ್ರಶಸ್ತಿ ಪಡೆಯಿತು.