കാര്യം നിസാരം, പക്ഷെ അനു അത്ര നിസാരക്കാരിയല്ല; അനു ജോസഫിന്റെ ജീവിതവിശേഷങ്ങൾ

ടെലിവിഷന്‍ സീരിയലുകളിലൂടെയാണ് അനു ജോസഫ് പ്രേക്ഷകര്‍ക്കിടയില്‍ ശ്രദ്ധിക്കപ്പെടുന്നത്. 2004മുതല്‍ മലയാള ടെലിവിഷന്‍രംഗത്ത് സജീവമാണ് അനു. തുടക്കത്തില്‍ ചെറിയ കഥാപാത്രങ്ങളിലൂടെ അഭിനയം തുടങ്ങിയ അനു വളരെ പെട്ടെന്നായിരുന്നു മെയിന്‍ റോളുകള്‍ ചെയ്യാന്‍ തുടങ്ങിയത്. സൂര്യ, ഏഷ്യാനെറ്റ്, ഡിഡി മലയാളം, ജയ്ഹിന്ദ്, അമൃത, മഴവില്‍ മനോരമ തുടങ്ങി മലയാളത്തിലെ ഒട്ടുമിക്ക പ്രമുഖ ചാനലുകളിലെ സീരിയലുകളിലെല്ലാം അനു അഭിനയിച്ചിട്ടുണ്ട്.

കലാഭവനില്‍ ചേര്‍ന്നതോടെയാണ് അനുവിന്റെ കരിയര്‍ തന്നെ മാറിമറിയുന്നത്. അവിടെ നിന്നും 2004ല്‍ സൂര്യ ടിവിയില്‍ സംപ്രേഷണം ചെയ്ത ചിത്രലേഖ എന്ന സീരിയലിലൂടെ ടെലിവിഷന്‍ രംഗത്ത് എത്തി. പിന്നീട് അനുവിന് തിരിഞ്ഞുനോക്കേണ്ടി വന്നിരുന്നില്ല. മിന്നുകെട്ട്, നൊമ്പരപ്പൂവ്, സ്വാമി അയ്യപ്പന്‍, വേളാങ്കണ്ണി മാതാവ്, അമ്മ തുടങ്ങിയ സീരിയലുകളിലൂടെ അനു പ്രേക്ഷകരുടെ മനസില്‍ ഇടം പിടിച്ചു.  

കൈരളി ടിവിയില്‍ സംപ്രേഷണം ചെയ്ത കാര്യം നിസാരം എന്ന പരമ്പരയിലൂടെയാണ് അനു കൂടുതല്‍ ശ്രദ്ധിക്കപ്പെട്ടത്. പരമ്പരയിലെ അഡ്വ. സത്യഭാമയ്ക്ക് ഇന്നും ആരാധകര്‍ ഏറെയാണ്. 2012ല്‍ സംപ്രേഷണം ആരംഭിച്ച കാര്യം നിസാരം 2017ലാണ് അവസാനിച്ചത്. ഉണ്ണി ചെറിയാന്‍ സംവിധാനം ചെയ്ത പരമ്പരയില്‍ അനീഷ് രവിയായിരുന്നു മറ്റൊരു പ്രധാന കഥാപാത്രത്തെ അവതരിപ്പിച്ചത്.

ടെലിവിഷന്‍ സീരിയലുകളില്‍ സജീവമാകുന്നതിനു മുമ്പ് തന്നെ അനു സിനിമകളില്‍ അഭിനയിച്ചു തുടങ്ങിയിരുന്നു. 2003ല്‍ പുറത്തിറങ്ങിയ പാഠം ഒന്ന്; വിലാപം ആണ് അനുവിന്റെ ആദ്യ സിനിമ. സ്ംസ്ഥാന-ദേശീയ ചലച്ചിത്ര അവാര്‍ഡുള്‍ ലഭിച്ച ചിത്രത്തില്‍ വാഹിദ എന്ന കഥാപാത്രത്തെയായിരുന്നു അനു അവതരിപ്പിച്ചത്. പിന്നാലെ ആയിരത്തില്‍ ഒരുവന്‍, ലിസമ്മയുടെ വീട്, വെള്ളിമൂങ്ങ, പത്തേമാരി, ദി ഗ്രേറ്റ് ഫാദര്‍ തുടങ്ങി ചെറുതും വലുതുമായി നിരവധി ചിത്രങ്ങളില്‍ അഭിനയിച്ചു. എങ്കിലും ഇപ്പോഴും സീരിയല്‍ നടി എന്ന നിലയില്‍ തന്നെയാണ് അനു അറിയപ്പെടുന്നത്.

ബിഗ് ബോസ് മലയാളം സീസണ്‍ 5ലെ സാധ്യത പട്ടികയില്‍ അനു ജോസഫ് തുടക്കം മുതലുണ്ടായിരുന്നു. എന്നാല്‍ പിന്നീട് ഷോ തുടങ്ങിയതോടെ അനു മത്സരാര്‍ത്ഥിയായി എത്തില്ല എന്ന തരത്തില്‍ സോഷ്യല്‍മീഡിയയില്‍ ചര്‍ച്ചകളുണ്ടായിരുന്നു. എന്നാല്‍ എല്ലാവരെയും ഞെട്ടിച്ചുകൊണ്ടാണ് അനു ഇപ്പോള്‍ വൈല്‍ഡ് കാര്‍ഡ് എന്‍ട്രിയായി ബിഗ് ബോസിലെത്തിയിരിക്കുന്നത്.