നിവിന്‍ പോളിയും കുഞ്ചാക്കോ ബോബനും നേര്‍ക്ക് നേര്‍; മാര്‍ച്ചിലെത്തുന്ന സിനിമകള്‍

കുഞ്ചാക്കോ ബോബനെ നായകനാക്കി അജയ് വാസുദേവ് സംവിധാനം ചെയ്ത ചിത്രമാണ് പകലും പാതിരാവും. രജിഷ വിജയനാണ് ചിത്രത്തില്‍ നായികയായി എത്തുന്നത്. ഗുരു സോമസുന്ദരമാണ് മറ്റൊരു പ്രധാന കഥാപാത്രമായി എത്തുന്നത്. ശ്രീഗോകുലം മൂവിസിന്റെ ബാനറില്‍ ഗോകുലം ഗോപാലന്‍ നിര്‍മ്മിച്ച ചിത്രം മാര്‍ച്ച് 3നാണ് തിയേറ്ററുകളിലെത്തുന്നത്.   

മാമുക്കോയ പ്രധാന കഥാപാത്രമായി എത്തുന്ന ചിത്രമാണ് ഉരു. മാധ്യമ പ്രവര്‍ത്തകനായ ഇ.എം അഷ്‌റഫാണ് ചിത്രത്തിന്റെ സംവിധായകന്‍. ബേപ്പൂരിലെ ഉരു നിര്‍മാണ തൊഴിലുമായി ബന്ധപ്പെട്ട കഥ പറയുന്ന ചിത്രം മാര്‍ച്ച് 3നാണ് തിയേറ്ററുകളിലെത്തുന്നത്. ശ്രീധരന്‍ എന്ന മൂത്താശ്ശാരിയായിട്ടാണ് ചിത്രത്തില്‍ മാമുക്കോയ എത്തുന്നത്.  

രജിഷ വിജയനെ നായകനാക്കി പ്രഗേഷ് സുകുമാരന്‍ സംവിധാനം ചെയ്ത ലവ്ഫുള്ളി യുവേഴ്‌സ് വേദ മാര്‍ച്ച് 3നാണ് തിയേറ്ററുകളിലെത്തുന്നത്. വെങ്കിടേഷ്, ശ്രീനാഥ് ഭാസി, അനിഖ സുരേന്ദ്രന്‍ എന്നിവരാണ് മറ്റു പ്രധാന താരങ്ങള്‍. ക്യാമ്പസ് കഥ പറയുന്ന ചിത്രത്തില്‍ കമ്മ്യൂണിസ്റ്റ് വിദ്യാര്‍ത്ഥി നേതാവായിട്ടാണ് വെങ്കിടേഷ് എത്തുന്നത്.  

പ്രഖ്യാപനം മുതല്‍  നിവിന്‍ പോളി ആരാധകര്‍ ഒരുപോലെ കാത്തിരിക്കുന്ന ചിത്രമാണ് തുറമുഖം. രാജീവ് രവി സംവിധാനം ചെയ്ത ചിത്രം ഏറ്റവുമൊടുവിലായി മാര്‍ച്ച് 10 തിയേറ്ററുകളിലെത്തുകയാണ്. 2021ലായിരുന്നു ചിത്രം റിലീസ് ചെയ്യാന്‍ തീരുമാനിച്ചത്. എന്നാല്‍ കൊവിഡും മറ്റു ചില സാങ്കേതിക കാരണങ്ങള്‍ കൊണ്ടും ചിത്രത്തിന്റെ റിലീസ് പലവട്ടം മാറ്റുകയായിരുന്നു. മട്ടാഞ്ചേരി മൊയ്തു എന്ന കഥാപാത്രത്തെയാണ് ചിത്രത്തില്‍ നിവിന്‍ പോളി അവതരിപ്പിക്കുന്നത്.

നവാഗതനായ മാക്‌സ് വെല്‍ ജോസ് സംവിധാനം ചെയ്ത ചിത്രമാണ് ഖാലി പേഴ്‌സ്. അര്‍ജുന്‍ അശോകന്‍, ധ്യാന്‍ ശ്രീനിവാസന്‍ എന്നിവരാണ് ചിത്രത്തിലെ പ്രധാന താരങ്ങള്‍. സംവിധായകന്‍ തന്നെയാണ് ചിത്രത്തിന്റെ തിരക്കഥയും ഒരുക്കിയത്. അജു വര്‍ഗീസ്, തന്‍വി റാം, രമേഷ് പിഷാരടി, ധര്‍മജന്‍ ബോള്‍ഗാട്ടി എന്നിവരാണ് ചിത്രത്തിലെ മറ്റു താരങ്ങള്‍. മാര്‍ച്ച് 10നാണ് ഖാലി പേഴ്‌സ് തിയേറ്ററുകളിലെത്തുന്നത്‌.

ലുക്മാന്‍ അവറാന്‍, ഗോകുലന്‍ എന്നിവരെ പ്രധാന കഥാപാത്രങ്ങളാക്കി ഷാനി ഖാദര്‍ സംവിധാനം ചെയ്ത ചിത്രമാണ് ആളങ്കം. ഗീതി സംഗീത, മാമുക്കോയ, ശരണ്യ ആര്‍, രമ്യ സുരേഷ് എന്നിവരാണ് ചിത്രത്തിലെ മറ്റു പ്രധാന താരങ്ങള്‍. ത്രില്ലര്‍ വിഭാഗത്തില്‍ പെടുന്ന ചിത്രം മാര്‍ച്ച് 10നാണ് തിയേറ്ററുകളിലെത്തുന്നത്.  

ആസിഫ് അലി, മംമ്ത മോഹന്‍ദാസ് എന്നിവരെ പ്രധാന കഥാപാത്രങ്ങളാക്കി സേതു സംവിധാനം ചെയ്ത ചിത്രമാണ് മഹേഷും മാരുതിയും. നീണ്ട ഇടവേളയ്ക്ക് ശേഷമാണ് മംമ്തയും ആസിഫും ഒന്നിച്ചെത്തുന്നത്. ത്രികോണ പ്രണയകഥ പറയുന്ന ചിത്രം മാര്‍ച്ച് 10നാണ് തിയേറ്ററുകളിലെത്തുന്നത്.