മരിച്ചിട്ടും മായാത്ത ഓര്‍മകള്‍; സിനിമയില്‍ തിളങ്ങി നിന്ന സമയത്ത് മരിച്ച താരങ്ങള്‍

ഷൂട്ടിങ്ങ് ലൊക്കേഷനില്‍ നിന്ന് വീട്ടിലേക്ക് പോവും വഴി ഒരു കാറപകടത്തിലായിരുന്നു നടി മോനിഷ മരിച്ചത്. ചേര്‍ത്തലയില്‍ നിന്ന് ആലപ്പുഴയിലേക്ക് പോവുകയായിരുന്ന ഓര്‍ഡിനറി ബസ് മോനിഷയും അമ്മ ശ്രീദേവി ഉണ്ണിയും സഞ്ചരിച്ച കാറിനെ ഇടിക്കുകയായിരുന്നു. അപകടത്തില്‍ തലയ്ക്ക് പരിക്കേറ്റ മോനിഷ സംഭവസ്ഥലത്തു വച്ച് തന്നെ മരിക്കുകയായിരുന്നു.  

അര്‍ബുദ രോഗത്തെ തുടര്‍ന്ന് 2016ലായിരുന്നു നടന്‍ ജിഷ്ണു രാഘവന്റെ മരണം. 2014ലായിരുന്നു ജിഷ്ണു കാന്‍സര്‍ ബാധിതനായത്. 1987ല്‍ പുറത്തിറങ്ങിയ കിളിപ്പാട്ട് എന്ന ചിത്രത്തിലൂടെ സിനിമയിലെത്തിയ താരം നമ്മള്‍ എന്ന ചിത്രത്തിലൂടെയായിരുന്നു ശ്രദ്ധിക്കപ്പെട്ടത്. ട്രാഫിക്കിന്റെ ഹിന്ദി പതിപ്പിലായിരുന്നു ജിഷ്ണു അവസാനമായി അഭിനയിച്ചത്.  

1996ലായിരുന്നു ചെന്നൈയിലെ ഒരു അപ്പാര്‍ട്ട്‌മെന്റില്‍ സില്‍ക് സ്മിതയെ ആത്മഹത്യ ചെയ്ത നിലയില്‍ കണ്ടെത്തിയത്. യുവസംവിധായകനുമായുള്ള പ്രണയതകര്‍ച്ചയാണ് ആത്മഹത്യക്ക് കാരണമെന്നാണ് റിപ്പോര്‍ട്ടുകള്‍. അവസാനകാലത്ത് കടുത്ത മാനസിക സമ്മര്‍ദ്ദത്തിലൂടെ കടന്നുപോയ താരം മദ്യപാനത്തിന് അടിമയായിരുന്നുവെന്നും റിപ്പോര്‍ട്ടില്‍ പറയുന്നുണ്ട്.  

2016 മാര്‍ച്ച് ആറിനായിരുന്നു മലയാളത്തിന്റെ പ്രിയതാരം കലാഭവന്‍ മണിയുടെ അപ്രതീക്ഷിത മരണം. ചാലക്കുടിയിലെ വീടിനു സമീപത്തുള്ള പാഡി എന്ന വിളിപ്പേരുള്ള വീട്ടില്‍ താരം കുഴഞ്ഞു വീഴുകയായിരുന്നു. ഉടന്‍ തന്നെ ആശുപത്രയില്‍ എത്തിച്ചെങ്കിലും മണിയെ രക്ഷിക്കാനായില്ല.  

സിനിമയില്‍ തിളങ്ങി നിന്ന സമയത്തായിരുന്നു നടി കല്‍പനയുടെ മരണം. ബാലാതാരമായി സിനിമയിലെത്തിയ താരം വളരെ പെട്ടെന്നായിരുന്നു മലയാളികളുടെ മനസ്സില്‍ ഇടം നേടിയത്. 1983ല്‍ പുറത്തിറങ്ങിയ 'മഞ്ഞ്' ആണ് കല്‍പനയുടെ ആദ്യ ചിത്രം.