മലയാളത്തിൻ്റെ തീരാനഷ്ടം; 2022ൽ വിട പറഞ്ഞ താരങ്ങൾ

2022 ജൂലൈ 15നായിരുന്നു ചെന്നൈയിലെ ഫ്‌ളാറ്റില്‍ പ്രതാപ് പോത്തനെ മരിച്ച നിലയില്‍ കണ്ടെത്തിയത്. ഹൃദയാഘാതമായിരുന്നു മരണകാരണം. ആരവം എന്ന ചിത്രത്തിലൂടെയായിരുന്നു വെള്ളിത്തിരയിലേക്കുള്ള അരങ്ങേറ്റം. പിന്നീട് ചെറുതും വലുതുമായി നൂറിലേറെ ചിത്രങ്ങളില്‍ അഭിനയിച്ചു. സംവിധായകന്‍ ഭരതനുമായുള്ള ബന്ധമാണ് പ്രതാപിനെ സിനിമയിലെത്തിച്ചത്.  

2022 ഫെബ്രുവരി 23നായിരുന്നു കെപിഎസി ലളിതയുടെ മരണം. 1969ല്‍ പുറത്തിറങ്ങിയ കൂട്ടുകുടുംബം എന്ന ചിത്രത്തിലൂടെയായിരുന്നു സിനിമയിലേക്കുള്ള അരങ്ങേറ്റം. മലയാളത്തിലും തമിഴിലുമായി ഏതാണ്ട് 500ല്‍ അധികം സിനിമകളില്‍ അഭിനയിച്ചിട്ടുണ്ട്. നാടകത്തിലൂടെ സിനിമയിലെത്തിയ ലളിത ടെലിവിഷന്‍രംഗത്തും സജീവമായിരുന്നു.  

ഹൃദയാഘാതത്തെ തുടര്‍ന്ന് 2022 ഫെബ്രുവരി 17നായിരുന്നു കോട്ടയം പ്രദീപിന്റെ മരണം. ഐ വി ശശി ചിത്രം ഈ നാട് ഇന്നലെ വരെ എന്ന ചിത്രത്തിലൂടെയായിരുന്നു സിനിമാ അരങ്ങേറ്റം. തുടര്‍ന്ന് നിരവധി ചിത്രങ്ങളുടെ ഭാഗമായി. തട്ടത്തില്‍ മറയത്ത്, ആട്, ഒരു വടക്കന്‍ സെല്‍ഫി, കട്ടപ്പനയിലെ ഹൃത്വിക് റോഷന്‍, തമിഴ് ചിത്രം വിണ്ണെത്താണ്ടി വരുവായാ എന്നിവയാണ് പ്രദീപിന്റെ ശ്രദ്ധിക്കപ്പെട്ട ചിത്രങ്ങള്‍.  

ശ്വാസകോശ സംബന്ധമായ അസുഖത്തെ തുടര്‍ന്ന് 2022 ഡിസംബര്‍ 3നായിരുന്നു കൊച്ചപ്രേമന്റെ മരണം. നാടകരംഗത്തു നിന്നും സിനിമയിലെത്തിയ കൊച്ചു പ്രേമന്‍ ഹാസ്യ കഥാപാത്രങ്ങളിലൂടെയാണ് ശ്രദ്ധിക്കപ്പെട്ടത്. 1979ല്‍ പുറത്തിറങ്ങിയ ഏഴു നിറങ്ങളാണ് അഭിനയിച്ച ആദ്യ സിനിമ.