സാഗർ സൂര്യ ബിഗ് ബോസിലെ പതിയിരിക്കുന്ന കൗശലക്കാരനോ ? അതോ മറ്റൊരു ഫുക്രുവോ ?

മഴവില്‍ മനോരമയിലെ തട്ടീം മുട്ടീം എന്ന ജനപ്രിയ പരമ്പരയിലൂടെയാണ് സാഗര്‍ സൂര്യ ശ്രദ്ധിക്കപ്പെടുന്നത്. സാഗറിന്റെ ആദ്യ ടെലിവിഷന്‍ സീരിയല്‍ കൂടിയാണിത്. പരമ്പരയില്‍ ആദി എന്ന കഥാപാത്രത്തെയായിരുന്നു അവതരിപ്പിച്ചത്. അലസനായ എഞ്ചിനീയറിംഗ് ബിരുദധാരിയായി ആദിയിലൂടെ ചുരുങ്ങിയ സമയം കൊണ്ടാണ് പ്രേക്ഷക മനസില്‍ സാഗര്‍ ഇടം പിടിച്ചത്.

സൈജു കുറുപ്പ് നായകനായി എത്തിയ ഉപചാരപൂര്‍വ്വം ഗുണ്ട ജയനിലൂടെയാണ് സാഗര്‍ സിനിമയിലെത്തുന്നത്. എന്നാല്‍ ചിത്രത്തിന്റെ ഷൂട്ടിങ്ങുകളെല്ലാം പൂര്‍ത്തിയായി റിലീസിന് ഒരുങ്ങി നില്‍ക്കുമ്പോഴായിരുന്നു വില്ലനായി കൊവിഡ് എത്തിയത്. പിന്നാലെ ചിത്രത്തിന്റെ റീലീസ് നീണ്ടു പോവുകയായിരുന്നു. ഒടുവില്‍ 2022ലായിരുന്നു ചിത്രം റിലീസ് ചെയ്തത്. 

ഉപചാരവൂര്‍വ്വം ഗുണ്ട ജയന് ശേഷമായിരുന്നു പൃഥ്വിരാജ് ചിത്രം കുരുതിയില്‍ അഭിനയിക്കുന്നത്. കുരുതി റിലീസായതോടെ സിനിമാ മേഖലയിലും സാഗര്‍ ശ്രദ്ധിക്കപ്പെട്ടു. മികച്ച നിരൂപക പ്രശംസ നേടിയ ചിത്രത്തില്‍ വിഷ്ണു എന്ന കേന്ദ്രകഥാപാത്രത്തെയായിരുന്നു അവതരിപ്പിച്ചത്. ഉപചാരപൂര്‍വ്വം ഗുണ്ട ജയനിലെ അഭിനയം കണ്ടിട്ടായിരുന്നു സാഗറിന് കുരുതിയിലേക്ക് അവസരം ലഭിച്ചത്. 

ഏഷ്യാനെറ്റില്‍ സംപ്രേഷണം ചെയ്യുന്ന ബിഗ് ബോസ് മലയാളത്തിന്റെ അഞ്ചാം സീസണിന്റെ പ്രഖ്യാപനത്തിന് പിന്നാലെ സാധ്യതാ പട്ടികയില്‍ നിരന്തരം ഉയര്‍ന്നു വന്ന പേരുകളിലൊന്നായിരുന്നു സാഗര്‍ സൂര്യ. നിലവില്‍ ഷോയിലെ കരുത്തുറ്റ മത്സരാര്‍ത്ഥിയാണ് താരം. സ്വന്തം അഭിപ്രായങ്ങള്‍ വ്യക്തതയോടെ തുറന്നു പറയുന്ന സാഗറിന് നിലവില്‍ ലക്ഷക്കണക്കിന് ആരാധകരുണ്ട്.