റിമി ടോമി മാത്രമല്ല, ദേ ഇവരും സിനിമയില്‍ അഭിനയിച്ച ഗായകരാണ്

മികച്ച ഗായികയും ടെലിവിഷന്‍ അവതാരകയുമായ റിമി ടോമി നിരവധി സിനിമകളിലും അഭിനയിച്ചിട്ടുണ്ട്. എന്നാല്‍ അഭിനയത്തിന്റെ കാര്യത്തില്‍ പലപ്പോഴും ട്രോളുകളും കടുത്ത വിമര്‍ശനങ്ങളും റിമിക്ക് നേരിടേണ്ടി വന്നിട്ടുണ്ട്. 2006ല്‍ പുറത്തിറങ്ങിയ ബല്‍റാം താരദാസിലൂടെയായിരുന്നു റിമി വെള്ളിത്തിരയിലും മുഖം കാണിച്ചത്. ചിത്രത്തിലെ ഒരു ഗാനരംഗത്തില്‍ മാത്രമായിരുന്നു റിമി അഭിനയിച്ചത്. പിന്നീട് കാര്യസ്ഥന്‍, 916 എന്നീ ചിത്രങ്ങളിലും അഭിനയിച്ചു. 2013ല്‍ പുറത്തിറങ്ങിയ 5 സുന്ദരികളിലൂടെയാണ് പ്രധാന കഥാപാത്രമായി റിമി അഭിനയിക്കാന്‍ തുടങ്ങിയത്. ഈ ചിത്രത്തിനു ശേഷം അഭിനയിച്ച തിങ്കള്‍ മുതല്‍ വെള്ളി വരെ എന്ന ചിത്രത്തിനായിരുന്നു റിമിക്ക് വിമര്‍ശനങ്ങള്‍ നേരിടേണ്ടി വന്നത്.  

ഗായകനായി തന്നെ നിരവധി സിനിമകളില്‍ അഭിനയിച്ച ഗായകനാണ് കൈതപ്രം ദാമോദരന്‍ നമ്പൂതിരി. മോഹന്‍ലാല്‍ നായകനായി എത്തിയ ഹിസ് ഹൈനസ് അബ്ദുള്ളയാണ് അഭിനയിച്ച ചിത്രങ്ങളില്‍ പ്രധാനപ്പെട്ടത്. അമ്മയാണെ സത്യം, ആര്യന്‍, ജാഗ്രത, വൈശാലി, സ്വാതി തിരുനാള്‍, ദേശാടനം, തീര്‍ത്ഥാടനം, നിവേദ്യം എന്നിവയാണ് അഭിനയിച്ച മറ്റു ചിത്രങ്ങള്‍.  

മലയാളത്തിന്റെ ഗാനഗന്ധര്‍വ്വന്‍ കെ.ജെ യേശുദാസും നിരവധി സിനിമകളില്‍ അഭിനയിച്ചിട്ടുണ്ട്. മിക്ക സിനിമകളിലും അതിഥി വേഷത്തിലാണ് യേശുദാസ് എത്തിയത്. പൃഥ്വിരാജും നവ്യ നായരും പ്രധാന താരങ്ങളായി എത്തിയ ഹിറ്റ് ചിത്രം നന്ദനത്തിലെ  യേശുദാസിന്റെ അതിഥി വേഷം ഏറെ ശ്രദ്ധിക്കപ്പെട്ടിരുന്നു.  

ഗായകനായും നടനായും തിളങ്ങിയ താരമാണ് വിജയ് യേശുദാസ്. എന്നാല്‍ നാളിതുവരെയായിട്ടും മലയാളത്തില്‍ ശ്രദ്ധിക്കപ്പെടുന്ന കഥാപാത്രങ്ങളൊന്നും വിജയ് ചെയ്തിട്ടില്ല. തമിഴ് ചിത്രം മാരിയാണ് വിജയിയുടെ ശ്രദ്ധിക്കപ്പെട്ട ഒരേയൊരു ചിത്രം. അവന്‍, കോളാമ്പി എന്നിവയാണ് വിജയ് അഭിനയിച്ച പ്രധാന മലയാള ചിത്രങ്ങള്‍.  

സംഗീത സംവിധായകനായും ഗായകനായും മലയാളി മനസില്‍ ഇടം നേടിയ താരമാണ് എം ജയചന്ദ്രന്‍. യേശുദാസിനെപ്പോലെ ജയചന്ദ്രനും നിരവധി ചിത്രങ്ങളില്‍ അതിഥി വേഷങ്ങളില്‍ അഭിനയിച്ചിട്ടുണ്ട്.