പൊള്ളുന്ന വിഷയം, കത്തുന്ന വിവാദം; കേരളാ സ്റ്റോറിയ്ക്ക് ആളെ പിടിക്കാനാകുമോ?

കേരളത്തില്‍ നിന്നും കാണാതായ സ്ത്രീകളെ മതപരിവര്‍ത്തനം നടത്തി രാജ്യത്തിനകത്തും പുറത്തും ഭീകരപ്രവര്‍ത്തനത്തിന് ഉപയോഗിക്കുന്നതാണ് ചിത്രത്തിന്റെ കഥ.ഒരു കോളേജ് ക്യാമ്പസിലെ 3 പെണ്‍കുട്ടികളെ മുസ്ലീമായ സുഹൃത്ത് മതം മാറാന്‍ പ്രേരിപ്പിക്കുന്നതും ഒടുവില്‍ തീവ്രവാദ സംഘടനയായ ഐസിസില്‍ ചേരുന്നതുമാണ് ചിത്രത്തിന്റെ കഥാപശ്ചാത്തലം. കേരളത്തില്‍ നിന്ന് ഇത്തരത്തില്‍ 32,000 സ്ത്രീകളെ കാണാതായെന്നും ചിത്രത്തിന്റെ അണിയറപ്രവര്‍ത്തകര്‍ ആരോപണം ഉന്നയിച്ചിരുന്നു. തുടര്‍ന്നായിരുന്നു ചിത്രത്തിനെതിരെ സമൂഹ മാധ്യമങ്ങളില്‍ വ്യാപകമായി പ്രതിഷേധങ്ങളുയര്‍ന്നത്.

സിനിമയ്ക്ക് എതിരെ നിരന്തരം വിമര്‍ശനങ്ങള്‍ ഉയര്‍ന്നതോടെ യൂട്യുബില്‍ റിലീസ് ചെയ്ത ചിത്രത്തിന്റെ ട്രെയിലറില്‍ നിര്‍മാതാക്കള്‍ തിരുത്ത് വരുത്തിയിരുന്നു. കേരളത്തിലെ 32,000 പെണ്‍കുട്ടികളുടെ ഹൃദയം തകര്‍ക്കുന്ന കഥ എന്നതിന് പകരം കേരളത്തിന്റെ വിവിധ ഭാഗത്തുള്ള മൂന്ന് പെണ്‍കുട്ടികളുടെ കഥ എന്നായിരുന്നു തിരുത്തിയത്. മൂന്നു യുവതികളുടെ ജീവിതം ഇല്ലാതായ കഥ എന്നാണ് ട്രെയിലറിന് നല്‍കിയ പുതിയ ഡിസ്‌ക്രിപ്ഷന്‍.

സുദീപ്‌തോ സെന്‍ ആണ് ചിത്രം സംവിധാനം ചെയ്തിരിക്കുന്നത്. ആദാ ശര്‍മ നായികയായി എത്തുമ്പോള്‍ യോഗിത ബിഹ്ലാനി, സോണിയ ബലാനി, സിദ്ധി ഇതാദി എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. മെയ് 5നാണ് ദ കേരള സ്‌റ്റോറി തിയേറ്ററുകളിലെത്തുന്നത്. വിപുല്‍ ഷായാണ് ചിത്രത്തിന്റെ നിര്‍മാതാവ്.

ദ കേരള സ്‌റ്റോറിക്കെതിരെ വ്യാപകമായി പ്രതിഷേധങ്ങളുയര്‍ന്ന സാഹചര്യത്തിലായിരുന്നു ചിത്രത്തിന് 10 മാറ്റങ്ങള്‍ സെന്‍സര്‍ ബോര്‍ഡ് നിര്‍ദ്ദേശിച്ചത്. ഹിന്ദുക്കളെ അവരുടെ ആചാരങ്ങള്‍ ചെയ്യാന്‍ കമ്മ്യൂണിസ്റ്റ് പാര്‍ട്ടി സമ്മതിക്കുന്നില്ല, തിവ്രവാദികള്‍ക്കുള്ള ധനസഹായം പാക്കിസ്ഥാന്‍ വഴി അമേരിക്കയും നല്‍കുന്നു, ഇന്ത്യന്‍ കമ്മ്യൂണിസ്റ്റുകള്‍ അവസരവാദിയാണ് എന്നതിലെ ഇന്ത്യ നീക്കം ചെയ്യണം. അവസാന ഭാഗത്തെ മുഖ്യമന്ത്രിയുടെ അഭിമുഖം ഒഴിവാക്കണം എന്നിവയായിരുന്നു സെന്‍സര്‍ ബോര്‍ഡ് നിര്‍ദ്ദേശിച്ച മാറ്റങ്ങള്‍.   

കേരളത്തിനെതിരെ വിദ്വേഷ പ്രചാരണം ലക്ഷ്യമിട്ടാണ് ചിത്രം ഒരുക്കിയതെന്നും, വിദ്വേഷ പ്രചരണത്തിലൂടെ കേരളത്തിലെ തിരഞ്ഞെടുപ്പാണ് സംഘപരിവാര്‍ ലക്ഷ്യമിടുന്നതെന്നും മുഖ്യമന്ത്രി ആരോപിച്ചിരുന്നു. ട്രെയിലര്‍ റിലീസിന് പിന്നാലെ സിപിഎം,, മുസ്ലീം ലീഗ്, കോണ്‍ഗ്രസ് ഉള്‍പ്പെടെയുള്ള കക്ഷികള്‍ സിനിമയ്ക്ക് പ്രദര്‍ശനാനുമതി നല്‍കരുതെന്ന് ആവശ്യപ്പെട്ടിരുന്നു. കൂടാതെ സിനിമയില്‍ പറയുന്നതുപോലെ സിറിയയിലേക്ക് കടത്തിയ 32,000 യുവതികളുടെ വിവരങ്ങള്‍ നല്‍കുന്നവര്‍ക്ക് യൂത്ത് ലീഗ് ഒരു കോടി രൂപ സമ്മാനം നല്‍കുമെന്നും പ്രഖ്യാപിച്ചിരുന്നു.