കൈകോർത്ത് പുതിയ ജീവിതത്തിലേക്ക്; 2021 ലെ താരവിവാഹങ്ങൾ

ജോസഫ് എന്ന സിനിമയിലൂടെ ശ്രദ്ധിക്കപ്പെട്ട നടി അത്മീയ രാജന്റെ വിവാഹം 2021 ജനുവരി 25നായിരുന്നു. മറൈന്‍ എഞ്ചിനീയറായ സനൂപാണ് താരത്തിന്റെ ഭര്‍ത്താവ്. കണ്ണൂരില്‍ വെച്ചായിരുന്നു ഇരുവരുടെയും വിവാഹം.  

മഹേഷിന്റെ പ്രതികാരം എന്ന ചിത്രത്തിലൂടെ ശ്രദ്ധിക്കപ്പെട്ട നടന്‍ വിജിലേഷിന്റെ വിവാഹം 2021 മാര്‍ച്ച് 30നായിരുന്നു. കോഴിക്കോട് സ്വദേശിനിയായ സ്വാതി ഹരിദാസാണ് ഭാര്യ. കോവിഡ് മാനദണ്ഡങ്ങള്‍ പാലിച്ചുകൊണ്ട് ലളിതമായിരുന്നു വിവാഹം.  

2021 ഏപ്രില്‍ 5നായിരുന്നു ചലച്ചിത്ര നടി ദുര്‍ഗ കൃഷ്ണയുടെ വിവാഹം. നിര്‍മാതാവും ബിസിനസുകാരനുമായ അര്‍ജ്ജുന്‍ രവീന്ദ്രനാണ് താരത്തിന്റെ ഭര്‍ത്താവ്. ഗുരുവായൂര്‍ ക്ഷേത്രത്തില്‍ വച്ചു നടന്ന ചടങ്ങില്‍ അടുത്ത ബന്ധുക്കളും സുഹൃത്തുക്കളും മാത്രമായിരുന്നു പങ്കെടുത്തത്.   

2021 ഏപ്രില്‍ 5നായിരുന്നു ചലച്ചിത്ര താരം ഉത്തര ഉണ്ണിയുടെ വിവാഹം. ഐടി പ്രൊഫഷണലായ നിതേഷാണ് ഭര്‍ത്താവ്. 2020 ഏപ്രിലിൽ നടത്താനിരുന്ന വിവാഹം കൊവിഡ് കാരണം മാറ്റി വയ്ക്കുകയായിരുന്നു. 

പ്രേക്ഷകരുടെ പ്രിയതാരം ആന്റണി വര്‍ഗീസിന്റെ വിവാഹം 2021 ആഗസ്ത് 7നായിരുന്നു. വിദേശത്ത് നഴ്‌സായി ജോലി ചെയ്യുന്ന അങ്കമാലി സ്വദേശി അനീഷ് പൗലോസാണ് ഭാര്യ. ഏറെ നാളത്തെ പ്രണയത്തിനൊടുവിലായിരുന്നു ഇരുവരുടെയും വിവാഹം.

2021 നവംബര്‍ 1നായിരുന്നു സിനിമ- സീരിയല്‍ താരം റബേക്ക സന്തോഷും സിനിമാ സംവിധായകന്‍ ശ്രീജിത്ത് വിജയനും തമ്മിലുള്ള വിവാഹം. സിനിമ-സീരിയല്‍ രംഗത്തെ പല പ്രമുഖരും ചടങ്ങില്‍ പങ്കെടുത്തിരുന്നു. 5 വര്‍ഷത്തെ പ്രണയത്തിനുശേഷമായിരുന്നു ഇരുവരുടെയും വിവാഹം.