ഇന്നച്ചവൻ എവിടേക്കും പോകുന്നില്ല! മലയാളി മറക്കുമോ ഈ കഥാപാത്രങ്ങളെ?

മലയാളത്തിലെ സൂപ്പര്‍ഹിറ്റ് ചിത്രങ്ങളിലൊന്നാണ് സിദ്ധിഖ്-ലാല്‍ കൂട്ടുക്കെട്ടില്‍ പുറത്തിറങ്ങിയ റാംജി റാവ് സ്പീക്കിംഗ്. മുകേഷും സായികുമാറും ഇന്നസെന്റും മത്സരിച്ചഭിനയിച്ച ചിത്രം മൂവരുടെയും കരിയറിലെ മികച്ച ചിത്രം കൂടിയാണ്. മാന്നാര്‍ മത്തായിയായി ഇന്നസെന്റ് നിറഞ്ഞാടിയ ചിത്രം ഇന്നും മലയാളികളുടെ പ്രിയപ്പെട്ട സിനിമകളിലൊന്നു കൂടിയാണ്. ചിത്രം സൂപ്പര്‍ഹിറ്റായതോടെ റാംജി റാവ് സ്പീക്കിംഗ് തമിഴ്, ഹിന്ദി, തെലുങ്ക് ഭാഷകളിലേക്ക് റീമേക്ക് ചെയ്തിരുന്നു.  

മലയാളികളുടെ പ്രിയപ്പെട്ട ശ്രീനിവാസന്‍ ചിത്രങ്ങളിലൊന്നാണ് 1989ല്‍ പുറത്തിറങ്ങിയ വടക്കുനോക്കിയന്ത്രം. ശ്രീനിവാസന്‍ തന്നെ നായകനായി എത്തിയ ചിത്രത്തില്‍ പാര്‍വ്വതി, ഇന്നസെന്റ്, ബൈജു, സുകുമാരി എന്നിവരായിരുന്നു മറ്റു പ്രധാന താരങ്ങള്‍. ശ്രീനിവാസനും ഇന്നസെന്റും മത്സരിച്ചഭിനയിച്ച ചിത്രം ഇന്നസെന്റ് എന്ന നടന്റെ കരിയറിലെ മികച്ച ചിത്രങ്ങളിലൊന്നാണ്.  

അടിച്ചു മോളെ! ഈ ഒരൊറ്റ ഡയലോഗു മതി കിലുക്കത്തിലെ കിട്ടുണ്ണിയെ ഓര്‍ത്തെടുക്കാന്‍. മലയാളത്തിലെ എക്കാലത്തെയും സൂപ്പര്‍ഹിറ്റായ കിലുക്കത്തില്‍  ഇന്നസെന്റിന്റെ കഥാപാത്രത്തിന് ഇന്നും ആരാധകര്‍ ഏറെയാണ്. പ്രിയദര്‍ശന്‍-മോഹന്‍ലാല്‍ കൂട്ടുക്കെട്ടില്‍ പുറത്തിറങ്ങിയ ചിത്രം തുടര്‍ച്ചയായി 365 ദിവസത്തിലധികം തിയേറ്ററുകളില്‍ പ്രദര്‍ശിപ്പിച്ചിരുന്നു.  

മലയാളത്തിലെ എക്കാലത്തെയും മികച്ച ബോക്‌സോഫീസ് ഹിറ്റുകളിലൊന്നാണ് സിദ്ധിഖ്-ലാല്‍ കൂട്ടുക്കെട്ടിലെത്തിയ ഗോഡ്ഫാദര്‍. മലയാളത്തിലെ വന്‍താര നിര അണിനിരന്ന ചിത്രം തിരുവനന്തപുരത്തെ ശ്രീകുമാര്‍ തിയേറ്ററില്‍ തുടര്‍ച്ചയായി 417 ദിവസം പ്രദര്‍ശിപ്പിച്ചിരുന്നു. താരങ്ങളെല്ലാം മത്സരിച്ചഭിനയിച്ച ചിത്രത്തില്‍ സ്വാമിനാഥന്‍ എന്ന കഥാപാത്രത്തെയായിരുന്നു ഇന്നസെന്റ് അവതരിപ്പിച്ചത്. കെ.പി.എ.സി ലളിതയും ഇന്നസെന്റും ജോഡികളായി എത്തിയ ചിത്രത്തിലെ ഇരുവരുടെയും പ്രകടനങ്ങള്‍ ഇന്നും മലയാളികളുടെ മനസിലുണ്ട്.  

ഹാസ്യ കഥാപാത്രങ്ങളിലൂടെ പ്രേക്ഷകരെ എന്നും ചിരിപ്പിച്ച ഇന്നസെന്റിന്റെ വേറിട്ട കഥാപാത്രമായിരുന്നു മനസ്സിനക്കരയിലെ ചാക്കോ മാപ്പിള. മുഴുക്കുടിയനായി നടന്നപ്പോഴും മകന്റെ വാക്കുകള്‍ക്ക് മുമ്പില്‍ തലകുനിച്ച് നിന്ന ചാക്കോ മാപ്പിള വര്‍ഷങ്ങള്‍ക്കിപ്പുറവും പ്രേക്ഷകരുടെ മനസില്‍ ഒരു നോവായി നിലനില്‍ക്കുന്നുണ്ട്. സത്യന്‍ അന്തിക്കാടിന്റെ സംവിധാനത്തില്‍ 2003ല്‍ പുറത്തിറങ്ങിയ ചിത്രം തിയേറ്ററുകളില്‍ നിന്നും മികച്ച വിജയം നേടുകയും ചെയ്തിരുന്നു.