കിരീടവും ആറാം തമ്പുരാനും ഒരിക്കല്‍ക്കൂടി കാണണോ; ഒടിടിയില്‍ കാണാം മോഹന്‍ലാലിന്റെ എവര്‍ഗ്രീന്‍ സിനിമകള്‍

പാട്ടുകളും, സീനുകളും ഒരുപോലെ സൂപ്പര്‍ ഹിറ്റായി മാറിയ മോഹന്‍ലാല്‍ ചിത്രമാണ് 1993ല്‍ പുറത്തിറങ്ങിയ മണിച്ചിത്രത്താഴ്. ബോക്‌സോഫീസ് റെക്കോര്‍ഡുകള്‍ തകര്‍ത്ത ചിത്രം ഏതാണ്ട് 365 ദിവസം തിയേറ്ററുകളില്‍ പ്രദര്‍ശിപ്പിച്ചിരുന്നു. ദേശീയ-സംസ്ഥാന ചലച്ചിത്ര അവാര്‍ഡുകള്‍ നേടിയ ചിത്രം കന്നട, തമിഴ്, ബംഗാളി, ഹിന്ദി എന്നീ ഭാഷകളിലേക്കും റീമേക്ക് ചെയ്തിരുന്നു.  

മോഹന്‍ലാലിന്റെ കരിയറിലെ തന്നെ മികച്ച ചിത്രങ്ങളിലൊന്നാണ് 2013ല്‍ പുറത്തിറങ്ങിയ ദൃശ്യം. മികച്ച തിരക്കഥയും, താരങ്ങളുടെ അതിഗംഭീര പ്രകടനവും കൊണ്ട് ശ്രദ്ധിക്കപ്പെട്ട ചിത്രം കുടുംബപ്രേക്ഷകര്‍ ഏറ്റെടുക്കുകയായിരുന്നു. 150 ദിവസത്തിലധികം തിയേറ്ററുകളില്‍ ഹൗസ്ഫുള്‍ ഷോകളുമായി മുന്നേറിയ ചിത്രം ഏതാണ്ട് 430 കോടിക്കടുത്ത് കളക്ഷന്‍ നേടുകയും ചെയ്തിരുന്നു. ദൃശ്യം സൂപ്പര്‍ഹിറ്റായി മാറിയതോടെ 2021ല്‍ ചിത്രത്തിന്റെ രണ്ടാംഭാഗവും വന്നിരുന്നു. ആദ്യഭാഗം പോലെ ദൃശ്യം 2ഉം പ്രേക്ഷകര്‍ ഏറ്റെടുക്കുകയായിരുന്നു.  

സിനിമയിറങ്ങി വര്‍ഷങ്ങള്‍ ഇത്ര കഴിഞ്ഞിട്ടും മലയാളികള്‍ അവര്‍ത്തിച്ച് കാണുന്ന മോഹന്‍ലാല്‍ ചിത്രങ്ങളിലൊന്നാണ് ആറാം തമ്പുരാന്‍. ഷാജി കൈലാസിന്റെ സംവിധാനത്തില്‍ 1997ല്‍ പുറത്തിറങ്ങിയ ചിത്രം എതാണ്ട് 250 ദിവസത്തിലധകം തിയേറ്ററുകളില്‍ പ്രദര്‍ശിപ്പിച്ചിരുന്നു. അക്കാലത്തെ ഏറ്റവും കൂടുതല്‍ കളക്ഷന്‍ നേടിയ ചിത്രം കൂടിയാണ് ആറാം തമ്പുരാന്‍. മഞ്ജു വാര്യര്‍, സായി കുമാര്‍, ഒടുവില്‍ ഉണ്ണികൃഷ്ണന്‍, ശ്രീവിദ്യ, കൊച്ചിന്‍ ഹനീഫ, കുഞ്ചന്‍ തുടങ്ങി മലയാളത്തിലെ വന്‍താരനിര അണി നിരന്ന ചിത്രത്തിലെ ഗാനങ്ങളും ഡയലോഗുകളും സൂപ്പര്‍ഹിറ്റായിരുന്നു.  

പ്രേക്ഷകരുടെ പ്രിയപ്പെട്ട മോഹന്‍ലാല്‍ ചിത്രങ്ങളിലൊന്നാണ് 2016ല്‍ പുറത്തിറങ്ങിയ ഒപ്പം. ക്രൈം ത്രില്ലറായി ഒരുക്കിയ ചിത്രത്തില്‍ അന്ധനായ ജയരാമന്‍ എന്ന കഥാപാത്രത്തെയായിരുന്നു അവതരിപ്പിച്ചത്. സമുദ്രക്കനി, നെടുമുടി വേണു, അനുശ്രീ, വിമല രാമന്‍ തുടങ്ങിയവര്‍ പ്രധാന താരങ്ങളായി എത്തിയ ചിത്രം ഏതാണ്ട് 65 കോടിക്കടുത്തായിരുന്നു തിയേറ്ററുകളില്‍ നിന്നും നേടിയത്.  

അന്നുവരെയുണ്ടായിരുന്ന മലയാളത്തിലെ സകല കളക്ഷന്‍ റെക്കോര്‍ഡുകളും തിരുത്തിക്കുറിച്ച് 100 കോടി ക്ലബില്‍ ഇടം പിടിച്ച മോഹന്‍ലാല്‍ ചിത്രമായിരുന്നു ലൂസിഫര്‍. സ്റ്റീഫന്‍ നെടുമ്പള്ളിയായി മോഹന്‍ലാല്‍ നിറഞ്ഞാടിയ ചിത്രം പൃഥ്വിരാജിന്റെ ആദ്യ സംവിധാന ചിത്രം കൂടിയായിരുന്നു. 2019ല്‍ ഏറ്റവും കൂടുതല്‍ കളക്ഷന്‍ നേടിയ സൗത്ത് ഇന്ത്യന്‍ സിനിമകളുടെ പട്ടികയില്‍ ഇടം നേടിയ ചിത്രം കൂടിയാണ് ലൂസിഫര്‍.  

മലയാളികള്‍ എക്കാലവും ഓര്‍മ്മിക്കുന്ന മോഹന്‍ലാല്‍ ചിത്രങ്ങളിലൊന്നാണ് 1989ല്‍ പുറത്തിറങ്ങിയ കിരീടം. സേതുമാധവനും അച്യുതന്‍ നായരുമായി മോഹന്‍ലാലും തിലകനും മത്സരിച്ചഭിനയിച്ച ചിത്രം ഇരുവരുടെയും കരിയറിലെ മികച്ച ചിത്രം കൂടിയാണ്. സംസ്ഥാന-ദേശീയ ചലച്ചിത്ര അവാര്‍ഡുകള്‍ ലഭിച്ച ചിത്രം ഏതാണ്ട് ആറ് ഭാഷകളിലേക്ക് റീമേക്കും ചെയ്തിരുന്നു.