കേരളക്കര നെഞ്ചേറ്റിയ സുമിത്രയുടെ പോരാട്ടം; 770 എപ്പിസോഡ് കടന്ന് കുടുംബവിളക്ക് കുതിക്കുന്നു

സംപ്രേഷണം തുടങ്ങി വളരെ ചുരുങ്ങിയ ദിവസങ്ങള്‍ കൊണ്ട് റേറ്റിങ്ങില്‍ ഒന്നാം സ്ഥാനം നേടിയ കുടുംബവിളക്കിന് ആരാധകര്‍ ഏറെയാണ്. ശ്രീമോയി എന്ന ബംഗാളി സീരിയലിന്റെ പുനരാവിഷ്‌കരണമായ പരമ്പരയുടെ ആദ്യ എപ്പിസോഡ് 2020 ജനുവരി 27നായിരുന്നു. ചാനലിന് പുറമെ ഡിജിറ്റില്‍ പ്ലാറ്റ്‌ഫോമായ ഡിസ്‌നി ഹോട്ട്‌സ്റ്റാറിലും കുടുംബവിളക്ക് സംപ്രേഷണം ചെയ്യുന്നുണ്ട്.

സുമിത്ര എന്ന വീട്ടമ്മയുടെ ജീവിതകഥയാണ് പരമ്പരയുടെ പ്രമേയം. കൊച്ചുകുട്ടികള്‍ മുതല്‍ മുതിര്‍ന്നവര്‍ വരെ കുടുംബവിളക്കിന്റെ എപ്പിസോഡിനായി കാത്തിരിക്കുകയാണ്. നിലവില്‍ 770 എപ്പിസോഡുകള്‍ പരമ്പര പിന്നിട്ടു കഴിഞ്ഞു. ഏഷ്യാനെറ്റില്‍ സംപ്രേഷണം ചെയ്യുന്ന മിക്ക സീരിയലുകളും ടെലിവിഷന്‍ പ്രേക്ഷകരുടെ പ്രിയപ്പെട്ട പരമ്പരകളാണ്.

കുടുംബത്തിന്റെ സന്തോഷത്തിന് വേണ്ടി എന്തും സഹിക്കാന്‍ തയ്യാറായ സുമിത്രയെ ഭര്‍ത്താവ് ഒരു ഘട്ടത്തില്‍ ഉപേക്ഷിക്കുന്നതും, പിന്നീട് സുമിത്ര അറിയപ്പെടുന്ന ബിസിനസ് വുമണാവുകയും ചെയ്യുന്നു. തുടര്‍ന്ന് വിവാഹമോചിതനായി മറ്റൊരു വിവാഹം കഴിച്ച ഭര്‍ത്താവ് സിദ്ധാര്‍ത്ഥിന് വീണ്ടും സുമിത്രയോട് ഇഷ്ടം തോന്നുന്നതും പിന്നീട് അവരുടെ ജീവിതത്തില്‍ നടക്കുന്ന സംഭവങ്ങളിലൂടെയാണ് പരമ്പര നിലവില്‍ മുന്നോട്ട് പോവുന്നത്.  

തന്മാത്ര എന്ന സിനിമയിലൂടെ ശ്രദ്ധിക്കപ്പെട്ട മീര വാസുദേവാണ് പരമ്പരയിലെ പ്രധാന കഥാപാത്രമായ സുമിത്രയായി എത്തുന്നത്. സുമിത്രയുടെ ഭര്‍ത്താവ് സിദ്ധുവായി കൃഷ്ണകുമാർ മേനോനും മക്കളായി ശ്രീജിത്ത് വിജയും(ആനന്ദ് നാരായണൻ) നൂബിന്‍ ജോണി(പ്രദീഷ് മേനോൻ), പാര്‍വതി വിജയ്(അമൃത നായർ) എന്നിവരും എത്തുന്നു.ശരണ്യ ആനന്ദ്(വേദിക സിദ്ധാർത്ഥ്)എഫ്.ജെ തരകന്‍ (ശിവദാസ് മേനോന്‍), ദേവി മേനോൻ(സരസ്വതി മേനോൻ) എന്നിവരാണ് കുടുംബവിളക്കിലെ മറ്റു പ്രധാന അഭിനേതാക്കള്‍. രണ്ട് എപ്പിസോഡുകളില്‍ നടന്‍ ഇന്നസെന്റും, അജു വര്‍ഗീസും പരമ്പരയില്‍ അതിഥികളായും എത്തിയിരുന്നു.

വളരെ ചുരുങ്ങിയ നാളുകള്‍കൊണ്ടായിരുന്നു കുടുംബവിളക്ക് പ്രേക്ഷകര്‍ക്കിടയില്‍ ശ്രദ്ധിക്കപ്പെട്ടു തുടങ്ങിയത്. മീര വാസുദേവിന്റെ സുമിത്ര എന്ന കഥാപാത്രം തന്നെയാണ് സീരീയിലിന്റെ ജനപ്രീതിക്ക് പിന്നില്‍. സിനിമയില്‍ നിന്നും മാറി മീര ആദ്യമായി അഭിനയിച്ച സീരിയല്‍ കൂടിയാണ് കുടുംബവിളക്ക്. 

സുനില്‍ കാര്യാട്ടുകരയാണ് സീരിയിലിന്റെ സംവിധായകന്‍. ഏഷ്യാനെറ്റില്‍ ദിവസവും 8മണിക്കാണ് സീരിയലിന്റെ സംപ്രേഷണം. ബംഗാളി, മലയാളം എന്നീ ഭാഷകള്‍ക്ക് പുറമെ മറാത്തി, തെലുങ്ക്, ഹിന്ദി, തമിഴ് എന്നീ ഭാഷകളിലും കുടുംബവിളക്ക് സംപ്രേഷണം ചെയ്യുന്നുണ്ട്.

സീരിയലിന്റെ ഏറ്റവും പ്രധാനപ്പെട്ട എപ്പിസോഡായിരുന്നു സുമിത്രയുടെ രണ്ടാം വിവാഹം. 2023 ഫെബ്രുവരി 1ന് സംപ്രേഷണം ചെയ്ത എപ്പിസോഡിന്റെ പ്രമോഷന്‍ സോഷ്യല്‍മീഡിയയില്‍ വൈറലായിരുന്നു. മലയാള മനോരമയിലായിരുന്നു സുമിത്രയും രോഹിത്തും ഇന്ന് വിവാഹിതരാവുന്നു എന്ന തലക്കെട്ടോടെ പരസ്യം നല്‍കിയത്. തുടര്‍ന്ന് പത്ര പരസ്യം സോഷ്യല്‍മീഡിയയില്‍ ചര്‍ച്ചയാവുകയായിരുന്നു.