കേരളത്തില്‍ സൂപ്പർ ഹിറ്റുകള്‍ നേടിയ തെലുങ്ക് താരങ്ങള്‍; മലയാളികളുടെ പ്രിയപ്പെട്ട തെലുങ്ക് നടന്മാര്‍ ഇവരാണ്

ആര്യ എന്ന ഒരൊറ്റ ചിത്രത്തിലൂടെ കേരളത്തില്‍ ലക്ഷക്കണക്കിന് ഫാന്‍സിനെ ഉണ്ടാക്കിയെടുത്ത തെലുങ്ക് നടനാണ് അല്ലു അര്‍ജുന്‍.  താരത്തിന്റെ കരിയറിലെ പ്രധാന ഹിറ്റുകളിലൊന്നു കൂടിയാണ് ആര്യ. റൊമാന്റിക് കോമഡിയായി ഒരുക്കിയ ചിത്രം 2004ലായിരുന്നു തിയേറ്ററുകളിലെത്തിയത്. ആര്യയ്ക്ക് പിന്നാലെ ബണ്ണി, ഹാപ്പി, ആര്യ 2 തുടങ്ങി നിരവധി അല്ലു അര്‍ജുന്‍ ചിത്രങ്ങള്‍ മൊഴി മാറ്റി കേരളത്തില്‍ റിലീസ് ചെയ്തിരുന്നു. ഡാന്‍സും റൊമാന്‍സും ആക്ഷനുമായി ഒരു കംപ്ലീറ്റ് എന്റര്‍ടെയ്‌നറായ ആര്യയ്ക്ക് നിലവില്‍ കേരളത്തില്‍ ആരാധകര്‍ ഏറെയാണ്.  

ബിസിനസ്മാന്‍ 1, ഒരുത്തം തുടങ്ങിയ സിനിമകളിലൂടെ കേരളത്തില്‍ ഫാന്‍സിനെ ഉണ്ടാക്കിയെടുത്ത മറ്റൊരു തെലുങ്ക് താരമാണ് മഹേഷ് ബാബു. കേരളത്തില്‍ താരത്തിന്റെ പേരില്‍ ഫാന്‍സ് അസോസിയേഷനുകള്‍ രജിസ്റ്റര്‍ ചെയ്തിട്ടുണ്ടെന്നാണ് റിപ്പോര്‍ട്ടുകള്‍. കൂടാതെ കേരളത്തിലെ പ്രശസ്തമായ പാരഗണ്‍ ഫൂട്ട് വെയറിന്റെ ബ്രാന്‍ഡ് അംബാസഡര്‍ കൂടിയാണ് താരം.  

ധീര എന്ന ഒരൊറ്റ ചിത്രത്തിലൂടെ കേരള ബോക്‌സോഫീസില്‍ നിന്നും കോടികള്‍ കളക്ഷന്‍ നേടിയ തെലുങ്ക് താരമാണ് രാം ചരണ്‍. എസ്.എസ് രാജമൗലി സംവിധാനം ചെയ്ത തെലുങ്ക് ചിത്രം മഗധീര ധീര ദി വാരിയര്‍ എന്ന പേരിലാണ് മൊഴിമാറ്റി കേരളത്തില്‍ പ്രദര്‍ശനത്തിനെത്തിയത്. 40 കോടി ചിലവഴിച്ച് നിര്‍മ്മിച്ച ചിത്രം വേള്‍ഡ് വൈഡായി 150 കോടിയാണ് തിയേറ്ററുകളില്‍ നിന്നും നേടിയെന്നാണ് കണക്കുകള്‍. എന്നാല്‍ ധീരയ്ക്ക് ശേഷം നിരവധി മൊഴി മാറ്റ ചിത്രങ്ങള്‍ രാം ചരണിന്റേതായി കേരളത്തില്‍ റിലീസ് ചെയ്‌തെങ്കിലും ഒന്നും ശ്രദ്ധിക്കപ്പെട്ടിരുന്നില്ല.  

ബാഹുബലിയിലൂടെ കേരള ബോക്‌സോഫീസില്‍ റെക്കോര്‍ഡ് കളക്ഷന്‍ നേടിയ തെലുങ്ക് താരമാണ് പ്രഭാസ്. റീലിസ് ചെയ്ത ആദ്യ ദിനത്തില്‍ തന്നെ കേരളത്തില്‍ നിന്നും ഏകദേശം 50 കോടി ചിത്രം നേടിയെന്നാണ് റിപ്പോര്‍ട്ടുകള്‍. ആദ്യ ഭാഗം  പോലെ തന്നെ രണ്ടാം ഭാഗമായ ബാഹുബലി ദി കണ്‍ക്ലൂഷനും കേരള ബോക്‌സോഫീസില്‍ നിന്നും കോടികളാണ് നേടിയത്.