പ്രായം പ്രണയത്തിന് തടസമല്ല; പ്രായ വ്യത്യാസത്തെ മറികടന്ന താരജോഡികള്‍

1996ലായിരുന്നു ഷാജി കൈലാസും ആനിയും വിവാഹതിരാവുന്നത്. പ്രണയിച്ച് വിവാഹിതരായ ഇരുവരും തമ്മില്‍ പത്ത് വയസിന്റെ വ്യത്യാസമുണ്ട്. വിവാഹശേഷം സിനിമയില്‍ സജീവമല്ലെങ്കിലും മിനിസ്‌ക്രീനില്‍ സജീവാണ് ആനി. ജഗന്നാഥന്‍, ഷാരോണ്‍, റോഷന്‍ എന്നിങ്ങനെ മൂന്ന് ആണ്‍മക്കളാണ് ദമ്പതികള്‍ക്കുള്ളത്.  

മലയാളികളുടെ എക്കാലത്തെയും പ്രിയപ്പെട്ട താരജോഡികളായ ബിജു മേനോനും സംയുക്ത വര്‍മയും തമ്മില്‍ ഒമ്പത് വയസിന്റെ വ്യത്യാസമുണ്ട്. 2002ല്‍ വിവാഹിതരായ താരങ്ങള്‍ക്ക് ദക്ഷ് ധാര്‍മിക് എന്ന പേരുള്ള ഒരു മകനുണ്ട്. വിവാഹത്തോടെ സിനിമയില്‍ നിന്നും വിട്ടുനില്‍ക്കുന്ന സംയുക്തയുടെ തിരിച്ച് വരവിനായി കാത്തിരിക്കുകയാണ് മലയാളികള്‍.    

ആറ് വര്‍ഷത്തെ പ്രണയത്തിനൊടുവില്‍ 1990ലായിരുന്നു ലിസിയും പ്രിയദര്‍ശനും തമ്മിലുള്ള വിവാഹം. ഇരുവരും തമ്മില്‍ എട്ട് വയസിന്റെ വ്യത്യാസമുണ്ട്. എന്നാല്‍ 24 വര്‍ഷത്തെ ദാമ്പത്യ ജീവിതത്തിന് വിരാമിട്ട് 2016ല്‍ ഇരുവരും വേര്‍പിരിയുകയായിരുന്നു. വിവാഹശേഷം സിനിമയില്‍ നിന്നും വിട്ടുനിന്ന ലിസി നിലവില്‍ ചെന്നൈയില്‍ ഡബ്ബിങ് സ്റ്റുഡിയോ നടത്തുകയാണ്.  

സിനിമയില്‍ തിളങ്ങി നില്‍ക്കുന്ന സമയത്തായിരുന്നു ദിലീപുമായുള്ള മഞ്ജു വാര്യരുടെ വിവാഹം നടക്കുന്നത്. ശക്തമായ സ്ത്രീ കഥാപാത്രങ്ങളിലൂടെ മലയാള സിനിമയില്‍ തന്റേതായ സ്ഥാനം ഉണ്ടാക്കിയെടുത്ത മഞ്ജു വാര്യര്‍ പക്ഷേ വിവാഹശേഷം സിനിമയില്‍ നിന്നും വിട്ടു നില്‍ക്കുകയും ചെയ്തു. പിന്നീട് നീണ്ട 14 വര്‍ഷത്തിന് ശേഷമായിരുന്നു നൃത്തവേദിയില്‍ പോലും മഞ്ജു വാര്യര്‍ തിരിച്ചെത്തിയത്. പിന്നാലെ 16 വര്‍ഷത്തെ ദാമ്പത്യജീവിതം അവസാനിപ്പിച്ച് ഇരുവരും വിവാഹമോചിതരാവുകയും ചെയ്തു.  

2014ലായിരുന്നു മലയാളത്തിന്റെ പ്രിയ താരങ്ങളായ നസ്രിയയും ഫഹദും വിവാഹിതരാവുന്നത്. പിന്നാലെ ഇരുവരും തമ്മിലുള്ള പ്രായവ്യത്യാസം വലിയ ചര്‍ച്ചയാവുകയും ചെയ്തിരുന്നു. നസ്രിയയേക്കാള്‍ പത്ത് വയസ് മൂത്തതാണ് ഫഹദ് ഫാസില്‍.വിവാഹത്തിനുശേഷം സിനിമയില്‍ നിന്നും ഇടവേളയെടുത്ത നസ്രിയ 2018ല്‍ അഞ്ജലി മേനോന്‍ സംവിധാനം ചെയ്ത കൂടെ എന്ന ചിത്രത്തിലൂടെയായിരുന്നു മലയാളത്തിലേക്ക് തിരിച്ചെത്തിയത്.