മോഹന്‍ലാലിന്റെ സ്വപ്‌നചിത്രം, അരങ്ങില്‍ വിദേശതാരങ്ങളും; ബറോസ് മലയാളത്തിലെ മറ്റൊരു വിസ്മയമാകുമോ ?

മോഹന്‍ലാലിന്റെ ആദ്യ സംവിധാന ചിത്രമായതുകൊണ്ടു തന്നെ പ്രഖ്യാപനം മുതല്‍ ശ്രദ്ധിക്കപ്പെട്ട ചിത്രമാണ് ബറോസ്. 2019 ഏപ്രില്‍ 21നായിരുന്നു ചിത്രത്തിന്റെ പ്രഖ്യാപാനം. തുടര്‍ന്ന് 2021 മാര്‍ച്ച് 31ന് ചിത്രത്തിന്റെ ഷൂട്ടിങ്ങ് ആരംഭിക്കുകയും ചെയ്തിരുന്നു. മോഹന്‍ലാല്‍ സംവിധാനം ചെയ്യുന്ന ചിത്രമായതുകൊണ്ടുതന്നെ ചിത്രത്തിനായി കാത്തിരിപ്പിലാണ് പ്രേക്ഷകര്‍. മോഹാന്‍ലാല്‍ തന്നെയാണ് ചിത്രത്തില്‍ ബറോസ് എന്ന കേന്ദ്രകഥാപാത്രത്തെ അവതരിപ്പിക്കുന്നത്.

400 വര്‍ഷം പഴക്കമുള്ള ഒരു ഭൂതത്തിന്റെ കഥയാണ് ബറോസ് അവതരിപ്പിക്കുന്നത്. ജിജോ പുന്നൂസ് എഴുതിയ ബറോസ് ഗാഡിയന്‍ ഓഫ് ഡി ഗാമാസ് ട്രഷര്‍ എന്ന കഥയാണ് സിനിമയാവുന്നത്. കടലിലും കരയിലുമായുള്ള വാസ്‌കോ ഡ ഗാമയുടെ നിധികുംഭങ്ങള്‍ക്ക് 400 വര്‍ഷമായി പോര്‍ച്ചുഗീസ് തിരത്തു കാവല്‍ നില്‍ക്കുന്ന ബറാസ്. ഓരോ കപ്പലെത്തുമ്പോഴും അയാള്‍ കരുതുന്നു നിധിയുടെ അവകാശി അതിലുണ്ടെന്ന്. ഗാമയുടെ പിന്‍ഗാമിയെന്നുറപ്പുള്ളയാള്‍ക്കു മാത്രമേ ബറോസ് നിധി കൈമാറുകയുള്ളു. അങ്ങനെയിരിക്കെ ഒരു ദിവസം ഗാമയെ തേടി ഒരു കുട്ടി തീരത്തേക്ക് വരുന്നു. ഗാമയുടെ പിന്‍തുടര്‍ച്ചക്കാരന്‍ താനാണെന്ന് അവന്‍ പറയുന്നു. പിന്നീട് കുട്ടിയുടെ മുന്‍ഗാമികളെ കണ്ടെത്താന്‍ ബറോസ് നടത്തുന്ന യാത്രയാണ് ചിത്രത്തിന്റെ പ്രമേയം.

പാസ് വേഗ,  റഫേല്‍ അമാര്‍ഗോ എന്നീ സ്പാനിഷ് താരങ്ങളുടെ ചിത്രത്തില്‍ പ്രധാന കഥാപാത്രങ്ങളായി എത്തുന്നുണ്ട്. വാസ്‌കോഡ ഗാമയുടെ വേഷത്തിലാണ് നടന്‍ റാഫേല്‍ അമാര്‍ഗോ ചിത്രത്തിലെത്തുന്നത്. റാഫേലിന്റെ ഭാര്യയായി പാസ് വേഗ എത്തുന്നത്. ഗുരു സോമസുന്ദരം, പദ്മാവതി റാവു, ജയചന്ദ്രന്‍ പാലാഴി എന്നിവരാണ് ചിത്രത്തിലെ മറ്റു പ്രധാന താരങ്ങള്‍. ഇവര്‍ക്കൊപ്പം പൃഥ്വിരാജും പ്രധാന വേഷത്തിലെത്തുന്നുണ്ടെന്നാണ് റിപ്പോര്‍ട്ടുകള്‍.

പോര്‍ച്ചുഗീസ്, ചൈനീസ് തുടങ്ങി 20 ഭാഷകളില്‍ ചിത്രം ഡബ്ബ് ചെയ്ത് സബ് ടൈറ്റിലോടെ റിലീസ് ചെയ്യുമെന്നാണ് റിപ്പോര്‍ട്ടുകള്‍. ബിഗ് ബജറ്റിലൊരുക്കിയ ചിത്രം മികച്ച ടെക്‌നോളജികള്‍ ഉപയോഗിച്ചാണ് മോഹന്‍ലാല്‍ ഒരുക്കിയിരിക്കുന്നത്. മൈ ഡിയര്‍ കുട്ടിച്ചാത്തനിലെ ഗ്രാവിറ്റി ഇല്യൂഷന്‍ ബറോസിലുമുണ്ടെന്നാണ് പുറത്ത് വരുന്ന റിപ്പോര്‍ട്ടുകള്‍. 

ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മ്മിച്ചത്. സന്തോഷ് ശിവനാണ് ബറോസിന്റെ ഛായാഗ്രാഹകന്‍. സന്തോഷ് രാമനാണ് പ്രൊഡക്ഷന്‍ ഡിസൈനര്‍. 2022 ജൂലായ് 30നായിരുന്നു ചിത്രത്തിന്റെ പാക്കപ്പ്. പോസ്റ്റ് പ്രൊഡക്ഷന്‍ വര്‍ക്കുകള്‍ കഴിഞ്ഞ ചിത്രം ഈ വര്‍ഷം തന്നെ റിലീസിനെത്തുമെന്നാണ് റിപ്പോര്‍ട്ട്.