മോഹന്‍ലാലിന്റെ ഒറ്റയാള്‍ പ്രകടനം; എലോൺ താരരാജാവിൻ്റെ തിരിച്ചുവരവാകുമോ?

12 വര്‍ഷത്തെ ഇടവേളയ്ക്ക്‌ ശേഷമാണ് മോഹന്‍ലാലും ഷാജി കൈലാസും എലോണിലൂടെ ഒന്നിക്കുന്നത്. 2009ല്‍ പുറത്തിറങ്ങിയ റെഡ് ചില്ലീസാണ് അവസാനമായി റിലീസ് ചെയ്ത മോഹന്‍ലാല്‍ നായകനായി എത്തിയ ഷാജി കൈലാസ് ചിത്രം. രാജേഷ് ജയരാമനാണ് എലോണിന്റെ തിരക്കഥാകൃത്ത്. ഷാജി കൈലാസിന്റെ മദിരാശി, ജിഞ്ചര്‍, ടൈം, സൗണ്ട് ഓഫ് ബൂട്ട് എന്നീ സിനിമകളുടെ തിരക്കഥ എഴുതിയതും രാജേഷായിരുന്നു.

മോഹന്‍ലാല്‍ മാത്രമാണ് ചിത്രത്തില്‍ അഭിനേതാവായി എത്തുന്നത്. കാളിദാസ് എന്ന കഥപാത്രമായാണ് മോഹന്‍ലാല്‍ എത്തുന്നത്. മഞ്ജു വാര്യര്‍, സിദ്ധിഖ്, പൃഥ്വിരാജ് സുകുമാരന്‍ തുടങ്ങി മലയാളത്തിലെ വന്‍താരങ്ങള്‍ ചിത്രത്തില്‍ ശബ്ദസാന്നിധ്യമായി എത്തുന്നുണ്ട്. ആദ്യമായാണ് ഇത്തരത്തിലുള്ള ഒരു അവതരണരീതിയുമായി ഷാജി കൈലാസും മോഹന്‍ലാലും ഒന്നിക്കുന്നത്.

ആശിര്‍വാദ് സിനിമാസിന്റെ ബാനറില്‍ ആന്‍ണി പെരുമ്പാവൂര്‍ ആണ് എലോണ്‍ നിര്‍മ്മിച്ചത്. ആശിര്‍വാദ് സിനിമാസിന്റെ മുപ്പതാമത്തെ ചിത്രമാണിത്. 2000ത്തില്‍ പുറത്തിറങ്ങിയ മോഹന്‍ലാല്‍ ചിത്രം നരസിംഹമായിരുന്നു ആശിര്‍വാദിന്റെ ആദ്യ നിര്‍മ്മാണ ചിത്രം.

പുതുവത്സരത്തിലായിരുന്നു എലോണിന്റെ ടീസര്‍ പ്രേക്ഷകര്‍ക്ക് മുമ്പിലെത്തിയത്. ടീസറിന് പിന്നാലെ ചിത്രം ഹൊറര്‍ ത്രില്ലറാണെന്ന് ആരാധകര്‍ സംശയം പ്രകടിപ്പിച്ചിരുന്നു. ചിത്രത്തിന്റെ മോഷന്‍ പോസ്റ്റര്‍ റിലീസ് ചെയ്തപ്പോഴും ഇതേ അഭിപ്രായമായിരുന്നു പ്രേക്ഷകര്‍ക്ക്‌. മൈക്ക് ഗാരിയുടെ വരികള്‍ക്ക് 4 മ്യൂസിക്കാണ് സംഗീതം നല്‍കിയിരിക്കുന്നത്. മൈക്ക് തന്നെയാണ് ഗാനങ്ങല്‍ ആലപിച്ചത്‌.

മുമ്പ് ഡയറക്ട് ഒടിടിയായി ചിത്രം റിലീസ് ചെയ്യുമെന്ന തരത്തില്‍ വാര്‍ത്തകള്‍ വന്നിരുന്നു. എലോണ്‍ തിയേറ്ററില്‍ റിലീസ് ചെയ്യാന്‍ പറ്റില്ലെന്നും തിയേറ്ററുകളില്‍ എത്തിയാല്‍ ലാഗ് ആണെന്ന് ജനങ്ങള്‍ അഭിപ്രായം പറയുമെന്നും ഷാജി കൈലാസ് പറഞ്ഞിരുന്നു. എന്നാല്‍ പിന്നീട് തീരുമാനം മാറ്റുകയായിരുന്നു. ഒടുവില്‍ ജനുവരി 26നാണ് എലോണ്‍ തിയേറ്ററുകളില്‍ എത്തുന്നത്.