വെറും വാഗ്ദാനം മാത്രം; ഈ മമ്മൂട്ടി ചിത്രങ്ങൾക്ക് എന്തു പറ്റി ?

മമ്മൂട്ടിയെ നായകനാക്കി നാദിര്‍ഷ സംവിധാനം ചെയ്യുന്ന ചിത്രമാണ് ഐ ആം എ ഡിസ്‌കോ ഡാന്‍സര്‍. 2019 ജനുവരിയിലായിരുന്നു ചിത്രത്തിന്റെ പ്രഖ്യാപനം. ആഷിഖ് ഉസ്മാന്‍ നിര്‍മ്മിക്കുന്ന ചിത്രത്തിന്റെ പോസ്റ്ററും 2019ല്‍ പുറത്തിറങ്ങിയിരുന്നു.  എന്നാല്‍ ചിത്രവുമായി ബന്ധപ്പെട്ട് യാതൊരു വിവരവും പിന്നീട്  പുറത്ത് വന്നിരുന്നില്ല. നാദിര്‍ഷ-മമ്മൂട്ടി കൂട്ടുക്കെട്ടില്‍ ആദ്യമായി ഒരുങ്ങുന്ന ചിത്രം കൂടിയാണിത്.

പ്രഖ്യാപനം മുതല്‍ മലയാളികള്‍ കാത്തിരിക്കുന്ന ചിത്രമാണ് ഹലോ മായാവി. മമ്മൂട്ടിയെയും മോഹന്‍ലാലിനെയും നായകന്മാരാക്കി ഷാഫിയായിരുന്നു ചിത്രം സംവിധാനം ചെയ്യാന്‍ തീരുമാനിച്ചത്. സിനിമയുടെ വണ്‍ലൈന്‍ കേട്ട താരങ്ങളിരുവരും ഹലോ മായാവി ചെയ്യുമെന്ന് ഉറപ്പ് നല്‍കിയിരുന്നു. എന്നാല്‍ വര്‍ഷങ്ങള്‍ ഇത്ര കഴിഞ്ഞിട്ടും ചിത്രവുമായി ബന്ധപ്പെട്ട് ഒരു വിവരവും പുറത്ത് വന്നിട്ടില്ല. ചിത്രം പൂര്‍ണമായും ഉപേക്ഷിച്ചെന്നാണ് പ്രേക്ഷകര്‍ പറയുന്നത്.  

പോക്കിരി രാജ, മധുര രാജ എന്നീ സൂപ്പര്‍ഹിറ്റ് ചിത്രങ്ങളുടെ മൂന്നാംഭാഗമായി മിനിസ്റ്റര്‍ രാജ ഒരുങ്ങുന്നു എന്ന തരത്തില്‍ മുമ്പ് വാര്‍ത്തകള്‍ വന്നിരുന്നു. വൈശാഖ് - മമ്മൂട്ടി കൂട്ടുക്കെട്ടില്‍ വീണ്ടുമെത്തുന്ന ചിത്രത്തിനായി കാത്തിരിപ്പിലാണ് ആരാധകര്‍. എന്നാല്‍ നാളിതുവരെയായിട്ടും മിനിസ്റ്റര്‍ രാജയുടെ പുതിയ അപ്‌ഡേറ്റുകളൊന്നും വന്നിട്ടില്ല. എന്നാല്‍ 2024ല്‍ ചിത്രം തിയേറ്ററുകളിലെത്തുമെന്നാണ് ഒരു കൂട്ടം മമ്മൂട്ടി ആരാധകര്‍ പറയുന്നത്.  

പത്തേമാരി എന്ന ചിത്രത്തിനുശേഷം മമ്മൂട്ടിയെ നായകനാക്കി സലിം അഹമ്മദ് പ്രഖ്യാപിച്ച ചിത്രമായിരുന്നു മാപ്പിള ഖലാസിമാര്‍. മലബാറിന്റെ ചരിത്രത്തിലൂടെ കഥ പറയുന്ന ചിത്രത്തില്‍ മലയാളത്തില്‍ പ്രമുഖരും അണിനിരക്കുന്നുണ്ട്. എന്നാല്‍ മാപ്പിള ഖലാസിമാര്‍ എന്ന പേരില്‍ ഇതിനോടകം രണ്ട് സിനിമകള്‍ മലയാളത്തില്‍ പ്രഖ്യാപിച്ചു കഴിഞ്ഞു. ഇതിനു പിന്നാലെയായിരുന്നു മമ്മൂട്ടി ചിത്രത്തില്‍ നിന്നും പിന്മാറി എന്ന തരത്തില്‍ വാര്‍ത്തകള്‍ വന്നത്.  

മലയാളത്തിലെ വിവാദ നോവലായ ആളോഹരി ആനന്ദം പ്രമേയമാക്കി ശ്യാമപ്രസാദ് പ്രഖ്യാപിച്ച സിനിമയായിരുന്നു ആളോഹരി ആനന്ദം. അന്ന ബെന്‍, മീര ജാസ്മിന്‍, പാര്‍വതി തിരുവോത്ത് എന്നിവര്‍ പ്രധാന കഥാപാത്രങ്ങളായി എത്തുന്ന ചിത്രത്തില്‍ മമ്മൂട്ടി നായകനായി എത്തുന്നു എന്ന തരത്തില്‍ നിരവധി വാര്‍ത്തകളും വന്നിരുന്നു. എന്നാല്‍ മമ്മൂട്ടി ചിത്രത്തില്‍ അഭിനയിക്കുന്നുവെന്നതിന് നാളിതുവരെയായിട്ടും ഔദ്യോഗികമായ വിവരങ്ങളൊന്നും പുറത്തുവന്നിട്ടില്ല.