പഴയ ട്രാക്കില്‍ സുരാജ്, റൊമാന്‍സുമായി ഷൈനും അഹാനയും, വിഷു ആര് കൊണ്ട് പോവും ?

വിഷു റിലീസില്‍ പ്രേക്ഷകര്‍ കാത്തിരിക്കുന്ന പ്രധാന ചിത്രങ്ങളിലൊന്നാണ് മദനോത്സവം. സുധീഷ് ഗോപിനാഥ് സംവിധാനം ചെയ്തിരിക്കുന്ന ചിത്രത്തില്‍ സുരാജ് വെഞ്ഞാറമൂടാണ് നായകനായി എത്തുന്നത്. കോഴിക്കുഞ്ഞുങ്ങള്‍ക്ക് നിറം കൊടുക്കുന്ന മദനന്‍ എന്നയാളുടെ ജീവിതമാണ് ചിത്രം അവതരിപ്പിക്കുന്നത്. ഏറെ നാളത്തെ ഇടവേളയ്ക്ക് ശേഷം സീരിയസ് കഥാപാത്രങ്ങളില്‍ നിന്നും മാറി ഹാസ്യത്തിന് പ്രാധാന്യമുള്ള കഥാപാത്രത്തെയാണ് സുരാജ് ചിത്രത്തില്‍ അവതരിപ്പിക്കുന്നത്. ചിത്രത്തിന്റേതായി പുറത്തിറങ്ങിയ ട്രെയിലറിനും ഗാനത്തിനും മികച്ച പ്രതികരണമായിരുന്നു പ്രേക്ഷകരുടെ ഭാഗത്ത് നിന്നും ലഭിച്ചത്.  

അഹാന കൃഷ്ണയും ഷൈന്‍ ടോം ചാക്കോയും പ്രധാന കഥാപാത്രങ്ങളായി എത്തുന്ന ചിത്രമാണ് അടി. പ്രശോഭ് വിജയനാണ് ചിത്രം സംവിധാനം ചെയ്തിരിക്കുന്നത്. രതീഷ് രവിയാണ് അടിയുടെ തിരക്കഥാകൃത്ത്. ഗോവിന്ദ് വസന്ത സംഗീത സംവിധാനവും ഫായിസ് സിദ്ധിഖ് ഛായാഗ്രഹണവും നിര്‍വ്വഹിച്ചിരിക്കുന്നു. വേഫെറര്‍ ഫിലിംസിന്റെ ബാനറില്‍ ദുല്‍ഖര്‍ സല്‍മാനാണ് ചിത്രം നിര്‍മ്മിച്ചത്.  

കാര്‍ത്തിക് രാമകൃഷ്ണന്‍, നൈനിത മറിയ എന്നിവരെ പ്രധാന കഥാപാത്രങ്ങളാക്കി ഗോകുല്‍ രാമകൃഷ്ണന്‍ സംവിധാനം ചെയ്ത ചിത്രമാണ് താരം തീര്‍ത്ത കൂടാരം. അര്‍ജുന്‍ പ്രഭാകരനും സംവിധായകനും ചേര്‍ന്നാണ് ചിത്രത്തിന്റെ തിരക്കഥ എഴുതിയത്. മെജോ ജോസഫാണ് ചിത്രത്തിന്റെ സംഗീത സംവിധാനം നിര്‍വ്വഹിച്ചത്. വിനീത് വിശ്വം, കലാഭവന്‍ നവാസ്, മാല പാര്‍വതി എന്നിവരാണ് ചിത്രത്തിലെ മറ്റു പ്രധാന താരങ്ങള്‍.  

സാമന്ത റൂത്ത് പ്രഭുവും ദേവ് മോഹനും ഒന്നിച്ചെത്തുന്ന ചിത്രമാണ് ശാകുന്തളം. കാളിദാസന്റെ അഭിജ്ഞാന ശാകുന്തളം ആസ്പദമാക്കിയാണ് ചിത്രമൊരുക്കിയത്. സാമന്ത ശകുന്തളയായി എത്തുമ്പോള്‍ ദുഷ്യന്തനായി ദേവ് മോഹന്‍ എത്തുന്നു.