തെലുങ്കിൽ നിന്നും 'ഇറക്കുമതി' ചെയ്ത ഹിറ്റുകൾ; മലയാളത്തിലെ റീമേക്കുകൾ

ജിസ് ജോയിയുടെ സംവിധാനത്തില്‍ 2019ല്‍ പുറത്തിറങ്ങിയ വിജയ് സൂപ്പറും പൗര്‍ണിമിയും തെലുങ്ക് ചിത്രം പെള്ളി ചൂപ്പുലുവിന്റെ റീമേക്കാണ്. തെലുങ്കില്‍ വിജയ് ദേവരകൊണ്ടയും ഋതു വര്‍മയും ചെയ്ത കഥാപാത്രങ്ങള്‍ മലയാളത്തില്‍ ആസിഫ് അലിയും ഐശ്വര്യ ലക്ഷ്മിയുമായിരുന്നു അവതരിപ്പിച്ചത്. ജിസ് ജോയി ഒരുക്കിയ ചിത്രത്തിന് സമ്മിശ്ര പ്രതികരണമായിരുന്നു മലയാളി പ്രേക്ഷകരുടെ ഭാഗത്ത് നിന്നും ലഭിച്ചത്.  

തെലുങ്ക് ചിത്രം അത്താകു യമദു അമ്മായിക് മുഗുദുവിന്റെ മലയാളം റീമേക്കാണ് മിസ്റ്റര്‍ മരുമകന്‍. ദിലീപ്, സനുഷ എന്നിവര്‍ പ്രധാന താരങ്ങളായി എത്തിയ ചിത്രം ബോക്‌സോഫീസ് കളക്ഷനുകളില്‍ മുമ്പിലെത്തിയെങ്കിലും പ്രേക്ഷകരുടെ ഭാഗത്ത് നിന്നും സമ്മിശ്ര പ്രതികരണമായിരുന്നു ലഭിച്ചത്. ജനപ്രിയ നായകന്റെ കോമഡി സിനിമയായി ദിലീപ് ആരാധകര്‍ ഇന്നും ആഘോഷിക്കുന്ന ചിത്രം ഒരുതരത്തില്‍ പറഞ്ഞാല്‍ പ്രേക്ഷകരെ വെറുപ്പിക്കുകയായിരുന്നു.  

ദിലീപിന്റെ പരാജയ ചിത്രങ്ങളിലൊന്നാണ് 2015ല്‍ പുറത്തിറങ്ങിയ ഇവന്‍ മര്യാദരാമന്‍. സുരേഷ് ദിവാകാര്‍ സംവിധാനം ചെയ്ത ചിത്രം സൂപ്പര്‍ഹിറ്റ് തെലുങ്ക് ചിത്രം മര്യാദ രാമണ്ണയുടെ റീമേക്കായിരുന്നു. എസ്.എസ് രാജമൗലിയായിരുന്നു തെലുങ്ക് ചിത്രം ഒരുക്കിയത്. ദിലീപിന്റെ കോമഡി ചിത്രം പ്രതീക്ഷിച്ച് തിയേറ്ററുകളിലെത്തിയ പ്രേക്ഷകര്‍ക്ക് തീര്‍ത്തു നിരാശയായിരുന്നു ചിത്രം നല്‍കിയത്.  

മോഹന്‍ലാല്‍ അതിഥി വേഷത്തിലെത്തിയ വാണ്ടഡ് തെലുങ്ക് ചിത്രം ഐത്തെയുടെ റീമേക്കാണ്. മുരളി നാഗവള്ളി സംവിധാനം ചെയ്ത ചിത്രം 2004ലായിരുന്നു തിയേറ്ററുകളിലെത്തിയത്. മധു വാര്യര്‍, അരവിന്ദന്‍, നിഷാന്ത് സാഗര്‍, സുചിത്ര എന്നിവരായിരുന്നു ചിത്രത്തിലെ പ്രധാന താരങ്ങള്‍. ഐപിഎസ് ഓഫീസറായ നാരായണ സ്വാമിയായിട്ടായിരുന്നു വാണ്ടഡില്‍ മോഹന്‍ലാല്‍ എത്തിയത്.    

ജഗപതി ബാബു നായകനായി എത്തിയ തെലുങ്ക് ചിത്രം ശുഭലഗ്നത്തിന്റെ മലയാളം റീമേക്കായിരുന്നു 2001ല്‍ പുറത്തിറങ്ങിയ സുന്ദര പുരുഷന്‍. ജോസ് തോമസ് ഒരുക്കിയ റീമേക്കില്‍ സുരേഷ് ഗോപി, മുകേഷ്, നന്ദിനി, ദേവയാനി എന്നിവരായിരുന്നു പ്രധാന താരങ്ങളായി എത്തിയത്.