അന്ന ബെന്‍ മുതല്‍ ദര്‍ശന രാജേന്ദ്രന്‍ വരെ, 2020ല്‍ പ്രേക്ഷകമനസ് കീഴടക്കിയ നടിമാര്‍ ഇവരാണ്

മായാനദി, വൈറസ് എന്നീ ചിത്രങ്ങളിലൂടെ പ്രേക്ഷശ്രദ്ധ നേടിയ ദര്‍ശന രാജേന്ദ്രന്‍ ആദ്യമായി മുഴുനീള കഥാപാത്രത്തെ അവതരിപ്പിച്ച ചിത്രമായിരുന്നു സീ യു സൂണ്‍. ചിത്രത്തിലെ അനു സെബാസ്റ്റ്യന്‍ എന്ന കഥാപാത്രം ദര്‍ശനയുടെ കൈകളില്‍ ഭദ്രമായിരുന്നു. ഫഹദിന്റെയും റോഷന്റെയും കഥാപാത്രങ്ങള്‍ക്കൊപ്പം തന്നെ ദര്‍ശനയുടെ കഥാപാത്രത്തിനും മികച്ച പ്രതികരണമായിരുന്നു പ്രേക്ഷകരുടെ ഭാഗത്തു നിന്നും ലഭിച്ചത്.  

കുമ്പളങ്ങി നൈറ്റ്‌സ്, ഹെലന്‍ തുടങ്ങിയ ചിത്രങ്ങളിലൂടെ പ്രേക്ഷകരെ ഞെട്ടിച്ച അന്ന ബെന്നിന്റെ മറ്റൊരു മികച്ച കഥാപാത്രമായിരുന്നു കപ്പേളയിലെ ജെസി. ദേശീയ പുരസ്‌ക്കാര ജേതാവും നടനുമായ മുഹമ്മദ് മുസ്തഫ സംവിധാനം ചെയ്ത ചിത്രം 2020ലെ മികച്ച ചിത്രങ്ങളിലൊന്നു കൂടിയാണ്.  

2020ല്‍ പുറത്തിറങ്ങിയ വരനെ ആവശ്യമുണ്ട് എന്ന ചിത്രത്തിലൂടെയായിരുന്നു കല്യാണി പ്രിയദര്‍ന്റെ മലയാള സിനിമയിലെ അരങ്ങേറ്റം. അനൂപ് സത്യന്‍ സംവിധാനം ചെയ്ത ചിത്രത്തില്‍ നിഖിത എന്ന കഥാപാത്രത്തെയായിരുന്നു കല്യാണി അവതരിപ്പിച്ചത്. ആദ്യ മലയാള ചിത്രമാണെങ്കിലും മികച്ച പ്രകടനമായിരുന്നു കല്യാണി പ്രേക്ഷകര്‍ക്ക് നല്‍കിയത്. നീണ്ട ഇടവേളയ്ക്ക് ശേഷം ശോഭനയും സുരേഷ് ഗോപിയും വീണ്ടുമൊന്നിച്ചഭിനയിച്ച ചിത്രം കൂടിയായിരുന്നു വരനെ ആവശ്യമുണ്ട്.  

കുമ്പളങ്ങി നൈറ്റ്‌സിലെ സിമിയിലൂടെ പ്രേക്ഷക മനസ്സില്‍ ഇടം നേടിയ  ഗ്രേസ് ആന്റണിയുടെ മികച്ച കഥാപാത്രങ്ങളിലൊന്നാണ് ഹലാല്‍ ലവ് സ്റ്റോറിയിലെ സുഹറ. സക്കറിയ മുഹമ്മദ് സംവിധാനം ചെയ്ത ചിത്രം ആമസോണ്‍ പ്രൈമില്‍ ഒക്ടോബര്‍ 15നായിരുന്നു വേള്‍ഡ് വൈഡായി റിലീസ് ചെയ്തത്. ഗ്രേസ് ആന്റണി എന്ന നടിയുടെ മികച്ച പ്രകടനം തന്നെയായിരുന്നു ചിത്രത്തിന്റെ പ്രധാന ഹൈലൈറ്റ്.

2020ന്റെ തുടക്കത്തില്‍ തന്നെ വരനെ ആവശ്യമുണ്ട് എന്ന ചിത്രത്തിലൂടെ പ്രേക്ഷകരെ ഒന്നടങ്കം ഞെട്ടിച്ച അഭിനേത്രിയാണ് ഉര്‍വശി. തുടര്‍ന്ന് പുത്തംപുതുകാലൈ, സുരരൈ പോട്ര്, മൂക്കുത്തി അമ്മന്‍ എന്നീ ചിത്രങ്ങളിലൂടെ ഉര്‍വശി പ്രേക്ഷകരെ വീണ്ടും ഞെട്ടിച്ചു.  

മഹേഷിന്റെ പ്രതികാരം എന്ന തന്റെ ആദ്യ ചിത്രത്തിലൂടെ തന്നെ പ്രേക്ഷകരെ ഞെട്ടിച്ച അപര്‍ണ ബാലമുരളിയുടെ കരിയറിലെ മറ്റൊരു മികച്ച കഥാപാത്രമാണ് ബൊമ്മി. സുധ കൊങ്ങര സംവിധാനം ചെയ്ത സുരരൈ പോട്രിലെ അപര്‍ണയുടെ അഭിനയത്തിന് മികച്ച പ്രതികരണമായിരുന്നു പ്രേക്ഷകരുടെ ഭാഗത്തുനിന്നും ലഭിച്ചത്.