വെറുപ്പിച്ച് മടുപ്പിച്ച് ജനപ്രിയ നായകന്‍; ദിലീപിന്റെ പരാജയ ചിത്രങ്ങള്‍

ദിലീപിനെ നായകനാക്കി സുരേഷ് ദിവാകര്‍ സംവിധാനം ചെയ്ത ചിത്രമായിരുന്നു ഇവന്‍ മര്യാദരാമന്‍. തെലുങ്ക് ചിത്രമായ മര്യാദ രാമന്നയുടെ റീമേക്കായി എത്തിയ ചിത്രം തിയേറ്ററുകളില്‍ വന്‍ പരാജയമായിരുന്നു ഏറ്റുവാങ്ങിയത്. നിക്കി ഗല്‍റാണി, അബു സലിം, ആനന്ദ്, താര കല്യാണ്‍ എന്നിവരായിരുന്നു ചിത്രത്തിലെ മറ്റു താരങ്ങള്‍. 15 കോടി ബജറ്റില്‍ ഒരുക്കിയ ചിത്രം ജനപ്രിയനായകന്റെ പരാജയ ചിത്രങ്ങളിലൊന്നാണ്.  

ദിലീപ് ആരാധകരുടെ പ്രിയപ്പെട്ട ചിത്രങ്ങളിലൊന്നാണ് 2012ല്‍ പുറത്തിറങ്ങിയ മിസ്റ്റര്‍ മരുമകന്‍. സന്ധ്യ മോഹന്‍ സംവിധാനം ചെയ്ത ചിത്രത്തില്‍ ഭാഗ്യരാജ്, സനുഷ, ഷീല, ഖുശ്ബു എന്നിവരായിരുന്നു പ്രധാന താരങ്ങളായി എത്തിയത്. ജനപ്രിയ നായകന്‍ അഭിനയിച്ച് വെറുപ്പിച്ച മിസ്റ്റര്‍ മരുമകന്‍ ദിലീപ് ആരാധകര്‍ക്ക് മാത്രം ആഘോഷിക്കാനുള്ള ചിത്രമാണ്.  

ദിലീപിന്റെ കരിയറിലെ മറ്റൊരു പരാജയ ചിത്രമാണ് 2014ല്‍ പുറത്തിറങ്ങിയ വില്ലാളി വീരന്‍. ആക്ഷന്‍ കോമഡിയായി ഒരുക്കിയ ചിത്രത്തിന് ആദ്യ ദിനം മുതല്‍ സമ്മിശ്ര പ്രതികരണമായിരുന്നു പ്രേക്ഷകരുടെ ഭാഗത്ത് നിന്നും ലഭിച്ചത്. മോശം തിരക്കഥയും, ലോജിക്കില്ലാത്ത തമാശകളുമായിരുന്നു ചിത്രത്തിന്റെ പരാജയത്തിന് പിന്നില്‍.  

ജനപ്രിയ നായകന്റെ കംപ്ലീറ്റ് കോമഡി എന്റര്‍ടെയ്‌നറായി ദിലീപ് ആരാധകര്‍ കണക്കാക്കുന്ന വെല്‍കം ടു സെന്‍ട്രല്‍ ജയില്‍ പ്രേക്ഷകരെ വെറുപ്പിച്ചതിന് കണക്കില്ല. സുന്ദര്‍ദാസ് തിരക്കഥ എഴുതി സംവിധാനം ചെയ്ത ചിത്രത്തിന്റെ പരാജയത്തിനു പ്രധാന കാരണം മോശം തിരക്കഥയും താരങ്ങളുടെ ഓവര്‍ ആക്ടിങ്ങുമായിരുന്നു. ഏതാണ്ട് 25.4 കോടിയുടെ ബജറ്റില്‍ ഒരുക്കിയ ചിത്രത്തിന് അതിന്റെ പകുതി പോലും തിയേറ്ററുകളില്‍ നിന്നും നേടാന്‍ സാധിച്ചില്ല എന്നതാണ് സത്യം.  

ഓവര്‍ ആക്ടിങ്ങ് കാരണം ഇന്നും ട്രോള്‍ പേജുകളില്‍ നിറഞ്ഞു നില്‍ക്കുന്ന ദിലീപ് ചിത്രമാണ് ശൃംഗാരവേലന്‍. ജോസ് തോമസിന്റെ സംവിധാനത്തില്‍ 2013ല്‍ പുറത്തിറങ്ങിയ ചിത്രത്തിന് ശരാശരി ദിലീപ് ആരാധകരെ പോലും തൃപ്തിപ്പെടുത്താന്‍ സാധിച്ചില്ല എന്നതാണ് സത്യം. വേദിക, ലാല്‍, കലാഭവന്‍ ഷാജോണ്‍, ജോയ് മാത്യു, ബാബു രാജ് തുടങ്ങി മലയാളത്തിലെ വന്‍താരനിര അണിനിരന്ന ദിലീപ് ചിത്രം കൂടിയാണ് ശൃംഗാരവേലന്‍.