ലൂക്ക് ആന്റണിയും ഇട്ടിച്ചായനും മത്സരിച്ച 2022; പോയ വര്‍ഷം പ്രേക്ഷക മനസില്‍ ഇടം നേടിയ താരങ്ങള്‍

ഒറ്റവാക്കില്‍ പറഞ്ഞാല്‍ 2022 മമ്മൂട്ടി എന്ന നടന്റേതാണ്. റോഷാക്ക്, പുഴു, ഭീഷ്മ പര്‍വ്വം, സിബി ഐ 5 എന്നീ ചിത്രങ്ങളിലൂടെ മമ്മൂട്ടി പോയ വര്‍ഷം പ്രേക്ഷകരെ ഞെട്ടിച്ചു. നെഗറ്റീവ് ഷേഡുള്ള പുഴുവിലെ കഥാപാത്രമാണ് അതില്‍ വേറിട്ടത്. റോഷാക്കിലെയും ഭീഷ്മ പര്‍വ്വത്തിലെയും മമ്മൂട്ടിയുടെ കഥാപാത്രത്തെ ഒരുതരത്തില്‍ പറഞ്ഞാല്‍ ആഘോഷിക്കുകയായിരുന്നു പ്രേക്ഷകര്‍. വന്‍ഹൈപ്പിലെത്തിയ സിബിഐ 5ന് പക്ഷേ സമ്മിശ്ര പ്രതികരണമായിരുന്നു പ്രേക്ഷകരുടെ ഭാഗത്ത് നിന്നും ലഭിച്ചത്‌. 

2022 പൃഥ്വിരാജിനും മികച്ച വര്‍ഷമായിരുന്നു. നടനായും, ഡിസ്ട്രിബ്യൂട്ടറായും നിര്‍മ്മാതാവായും സംവിധായകനുമായി മികച്ച സാമ്പത്തിക വിജയമാണ് പൃഥ്വിരാജ് പോയ വര്‍ഷം നേടിയത്. നായകനായി എത്തിയ കടുവ, ജന ഗണ മന, കാപ്പ എന്നീ ചിത്രങ്ങളിലൂടെ മികച്ച പ്രകടനമാണ് 2022ല്‍ പൃഥ്വി നടത്തിയത്. എന്നാല്‍ മോഹന്‍ലാലിനെ നായകനാക്കി സംവിധാനം ചെയ്ത ബ്രോ ഡാഡിക്ക് ഏറെ വിമര്‍ശനങ്ങളും നേരിടേണ്ടി വന്നിരുന്നു. വന്‍ഹൈപ്പിലെത്തിയ ഗോള്‍ഡിനും സമ്മിശ്ര പ്രതികരണമായിരുന്നു പ്രേക്ഷകരുടെ ഭാഗത്ത് നിന്നും ലഭിച്ചത്.

നാരദന്‍, തല്ലുമാല, ഡിയണ്‍ഫ്രണ്ട്, വാശി തുടങ്ങിയ നാലു ചിത്രങ്ങളായിരുന്നു 2022ല്‍ ടൊവിനോയുടേതായി തിയേറ്ററുകളില്‍ എത്തിയത്. ഖാലിദ് റഹ്മാന്‍ സംവിധാനം ചെയ്ത തല്ലുമാല 2022ലെ മികച്ച എന്റര്‍ടെയ്‌നര്‍ കൂടിയാണ്. മണവാളന്‍ വസീമിലൂടെ 2022ല്‍ മലയാള സിനിമയില്‍ നിറഞ്ഞു നില്‍ക്കാന്‍ ടൊവീനോയ്ക്ക് സാധിച്ചിട്ടുണ്ട്. എന്നാല്‍ വാശി, നാരദന്‍, ഡിയര്‍ഫ്രണ്ട് എന്നീ ചിത്രങ്ങള്‍ക്ക് എല്ലാ തരം പ്രേക്ഷകരെയും തൃപ്തിപ്പെടുത്താന്‍ സാധിക്കാതെ പോവുകയായിരുന്നു.  

വ്യത്യസ്തമായ ഗെറ്റപ്പിലൂടെ 2022ല്‍ പ്രേക്ഷക മനസ്സില്‍ ഇടം നേടിയ താരമാണ് കുഞ്ചാക്കോ ബോബന്‍. ന്നാ, താന്‍ കേസ് കൊട് എന്ന ചിത്രത്തിലെ കൊഴുമ്മല്‍ രാജിവനായി മിന്നുന്ന പ്രകടനമാണ് പോയ വര്‍ഷം താരം നടത്തിയത്. കൂടാതെ പട, അറിയിപ്പ്, ഒറ്റ് തുടങ്ങിയ ചിത്രങ്ങളിലെ കുഞ്ചാക്കോ ബോബന്റെ പ്രകടനവും ഏറെ ശ്രദ്ധിക്കപ്പെട്ടിരുന്നു.

മമ്മൂട്ടിയെപ്പോലെ തന്നെ കരിയറിലെ ഏറ്റവും മികച്ച വര്‍ഷമാണ് ആസിഫിന് 2022. കൂമന്‍, റോഷാക്ക്, കൊത്ത് എന്നീ ചിത്രങ്ങളിലൂടെ തന്നിലെ നടനെ തേച്ചുമിനുക്കിയ ആസിഫ് ഒരു തരത്തില്‍ പറഞ്ഞാല്‍ 2022ല്‍ അഭിനയത്തിലൂടെ പ്രേക്ഷകരെ ഞെട്ടിക്കുകയായിരുന്നു. റോഷാക്കിലെ അതിഥി വേഷവും കൂമനിലെ പോലീസ് കഥാപാത്രവും പോയവര്‍ഷം അത്രത്തോളം ശ്രദ്ധിക്കപ്പെട്ടിരുന്നു.

2022ലെ ബോക്‌സോഫീസ് ഹിറ്റുകളിലൊന്നാണ് ബേസില്‍ ജോസഫും ദര്‍ശന രാജേന്ദ്രനും പ്രധാന കഥാപാത്രങ്ങളായി എത്തിയ ജയ ജയ ജയ ജയ ഹേ. രാജേഷ് എന്ന കഥാപാത്രത്തിലൂടെ പ്രേക്ഷകരെ പൊട്ടിച്ചിരിപ്പിച്ച ബേസിലിനും 2022 മികച്ച വര്‍ഷമാണ്. പാല്‍തു ജാന്‍വര്‍, ഡിയര്‍ ഫ്രണ്ട്, ന്നാ,താന്‍ കോസ് കൊട് എന്നീ ചിത്രങ്ങളിലെ ബേസിലിന്റെ പ്രകടനവും ഏറെ ശദ്ധിക്കപ്പെട്ടിരുന്നു.

2022ല്‍ സമ്മിശ്ര പ്രതികരണം ലഭിച്ച ചിത്രമായിരുന്നു മജു സംവിധാനം ചെയ്ത അപ്പന്‍. എന്നാല്‍ ചിത്രത്തില്‍ അപ്പനായി അഭിനയിച്ച അലന്‍സിയര്‍ ലോപ്പസിന്റെ കഥാപാത്രം ഏറെ ചര്‍ച്ച ചെയ്യപ്പെട്ടിരുന്നു. എല്ലാവരാലും വെറുക്കപ്പെടുന്ന ഇട്ടി എന്ന കഥാപാത്രത്തെ അതിഗംഭീരമായാണ് അലന്‍സിയര്‍ അവതരിപ്പിച്ചത്. ഒടിടിയായി റിലീസ് ചെയ്ത ചിത്രത്തില്‍ സണ്ണി വെയ്ന്‍ ആയിരുന്നു നായകന്‍.